ໃກ້ໆນີ້ ຈະທະລຸເປົ້າໝາຍເນື້ອທີ່ປ່າປົກຫຸ້ມ 70% ແທ້ຫລືບໍ່?

ເປົ້າໝາຍກໍຄືເປົ້າໝາຍ ຕັ້ງໄວ້ແມ່ນດີ ເຮັດໄປແລ້ວໄດ້ຫລືບໍ່ໄດ້ຕ້ອງຫາສາເຫດ ເຊິ່ງຖ້າບໍ່ໄດ້ເປັນຍ້ອນຫຍັງ!ຄາຂອດໃດ?ແລະ ຈະເຮັດແນວໃດ? ແນວໃດກໍດີທຸກເປົ້າໝາຍທີ່ວາງໄວ້ໂດຍສະເພາະເປົ້າໝາຍເພີ່ມເນື້ອທີ່ປ່າປົກຫຸ້ມໃນທົ່ວປະເທດຈະບັນລຸ 70% ຫລື ປະມານ 16,5 ລ້ານເຮັກຕາຈະໄດ້ຫລືບໍ່. ຂະນະທີ່ການປູກໄມ້ປີນີ້ກໍຢູ່ໃນຈຸດປະສົງຄາດໝາຍໂດຍໄດ້ຕັ້ງໄວ້ 37.200 ເຮັກຕາ.

ເຖິງວ່າວັນປູກຕົ້ນໄມ້ແຫ່ງຊາດປີນີ້ ບໍ່ໄດ້ຈັດເປັນຂະບວນການໃຫຍ່ ຍ້ອນການລະບາດຂອງພະຍາດໂຄ ວິດ-19, ແຕ່ພົບເຫັນຫລາຍເຂດສືບຕໍ່ປະຕິບັດຕາມເປົ້າໝາຍຄືເນື້ອທີ່ປ່າປົກຫຸ້ມ 70% ເຊິ່ງປັດຈຸບັນ ປູກ ໄດ້ແລ້ວກວ່າ 60% ໂດຍເປັນຜົນມາຈາກທຸກຄົນເຫັນຄວາມສໍາຄັນຂອງການປູກໄມ້ຕາມນະໂຍບາຍຂອງພັກ-ລັດ ຕາມທິດພັດທະນາສີຂຽວ ແລະ ຍືນຍົງ, ເພີ່ມຄວາມອຸດົມສົມບູນຊັບພະຍາກອນປ່າໄມ້-ຊີວະນາ ນາພັນ, ເປັນແຫລ່ງຟອກອາກາດທີ່ສົດຊື່ນ ແລະ ຜົນປະໂຫຍດຕ່າງໆ.

ໃນຄວາມເປັນຈິງນັ້ນ, ພວກເຮົາໄດ້ພ້ອມກັນເຮັດໄປໃນລວງດຽວກັນ ເຊິ່ງສອດຄ່ອງກັບສະພາບ, ເງື່ອນໄຂ ແລະ ຈຸດພິເສດຂອງແຕ່ລະບ່ອນ ໂດຍແນວພັນໄມ້ທີ່ປູກມີທັງໄມ້ເນື້ອແຂງ ບໍ່ວ່າຈະເປັນໄມ້ແຕ້, ໄມ້ດູ່, ໄມ້ສັກ, ໄມ້ແຄນ, ໄມ້ຂະຍູງ…ໄມ້ເນື້ອອ່ອນແດ່ ໄມ້ເປັນຮົ່ມເງົາ ແລະ ໄດ້ກິນໝາກພ້ອມກໍມີຫລວງຫລາຍ.

ເມື່ອເວົ້າເຖິງການປູກໄມ້ແລ້ວ ກໍຄິດເຫັນການປູກໄມ້ໃຫຍ່ໄວເພື່ອໃຊ້ປະໂຫຍດແຕ່ລະມື້ ແລະ ໄກກວ່ານັ້ນກໍຄືປູກເປັນສິນຄ້ານັ້ນເອງ. ຜ່ານມາ, ພັກ-ລັດ ໄດ້ສົ່ງເສີມແທ້ ແລະ ທົ່ວສັງຄົມກໍພ້ອກັນປູກ ທັງໄດ້ຮັບໝາກຮັບຜົນເປັນທີ່ປະຈັກມາແລ້ວ ເຊັ່ນ ການປູກໄມ້ຕິ້ວ ທີ່ປະຊາຊົນເຮົານໍາມາໃຊ້ຟືນ ແລະ ເຜົາເຮັດຖ່ານດັງໄຟເພາະທັງແຕ່ອະດີດຮອດປັດຈຸບັນຕ່າງກໍຍອມນັບວ່າ: ດັງດີ ໄຟກ້າໄໝ້ດົນ ຖ້າເອົາໄປຂາຍ ລາຄາດີກວ່າ.

ຂະນະດຽວກັນຖ່ານໄມ້ຕິ້ວ ຕະຫລາດທັງພາຍໃນ ແລະ ຕ່າງປະເທດລ້ວນແຕ່ຕ້ອງການຫລາຍທີ່ສຸດ, ແຕ່ໄມ້ຈາກ ທໍາມະຊາດພັດບໍ່ສາມາດຕອບສະໜອງໄດ້ເຮັດໃຫ້ຜູ້ມີເງື່ອນໄຂທັງດິນແດ່ທຶນພ້ອມຈໍານວນໜຶ່ງ ໄດ້ອອກເຫື່ອເທແຮງປູກ ແລະ ໄດ້ຜົນສົມຄວນ, ແຕ່ປານນັ້ນຍັງບໍ່ທັນພຽງພໍຕາມຄວາມຕ້ອງການ.

ກ່ອນໜ້ານີ້ 2-3 ປີ, ເຄີຍໄດ້ໄປຮ່ວມຂະບວນການປູກໄມ້ຕິ້ວຢູ່ເຂດເມືອງສັງທອງນະຄອນຫລວງວຽງຈັນ ແລະ ຖືໂອກາດສອບຖາມວ່າ ເປັນຫຍັງຈຶ່ງປູກໄມ້ຕິ້ວ? ຄຳຕອບຄື ປູກງ່າຍ ໃຫຍ່ໄວ, 2-3 ປີ ກໍໃຊ້ໄດ້ ແລະ ສາມາດຂາຍໄດ້ແລ້ວ ໂດຍສະເພາະຖ່ານໄມ້ຕິ້ວທີ່ໄດ້ຮັບຄວາມນິຍົມຫລາຍທີ່ສຸດ ລາຄາຂາຍສອບໜຶ່ງຫລາຍໝື່ນກີບລະ.

ຜູ້ມີເນື້ອທີ່ດິນເປົ່າວ່າງບໍ່ໄດ້ປູກຫຍັງ ຖ້າປູກໄວ້ກໍຄົງບໍ່ເສຍຫາຍຫຍັງດີບໍ່ດີຖ້າປູກໄດ້ກໍສາມາດສ້າງລາຍຮັບທີ່ກຸ້ມຄ່າກັບການລົງທຶນສຸມແຮງປູກດ້ວຍຊໍ້າໄປ, ແຕ່ຖ້າເຜົາເຮັດຖ່ານຂາວ ກໍສາມາດສົ່ງຂາຍຕ່າງປະເທດ ສ້າງລາຍຮັບໄດ້ຫລາຍເທົ່າ.

ໄມ້ໃຫຍ່ມີຫລາຍຊະນິດ, ແຕ່ເມື່ອປູກແລ້ວກໍຕ້ອງເອົາໃຈໃສ່ບົວລະບັດເບິ່ງແຍງໃຫ້ດີ. ການປູກໄມ້ປູກໄດ້ທຸກມື້ ແລະ ເຮັດໃຫ້ໄດ້ຕາມຄຳຂວັນ “ຈົ່ງຊ່ວຍການປູກໄມ້ໃຫ້ເປັນປ່າເພື່ອເປັນສິນຄ້າ ແລະ ປະກອບ ສ່ວນປົກປັກຮັກສາສິ່ງແວດລ້ອມ, ຫລຸດຜ່ອນການປ່ຽນແປງດິນຟ້າອາກາດ”.