ກາຕ້າ ກຽມນຳຮູບປັ້ນ ຊີດານ ເອົາຫົວຕຳ ມາເຕຣັສຊີ ມາຕິດຕັ້ງຕ້ອນຮັບບານໂລກ 2022
ກາຕ້າ ເຈົ້າພາບຈັດການແຂ່ງຂັນເຕະບານໂລກ 2022 ຮອບສຸດທ້າຍ ເປີດເຜີຍວ່າ ມີແຜນທີ່ຈະນຳຮູບປັ້ນທີ່ຈຳລອງເຫດ ການໃນປະຫວັດສາດຂອງການແຂ່ງຂັນ ເຊິ່ງ ຊີເນດິນ ຊີດານ ຕຳນານກອງກາງທີມຊາດຝຣັ່ງ ໃຊ້ຫົວຕຳ ມາໂກ ມາເຕຣັສຊີ ອະດີດກອງຫລັງທີມຊາດອິຕາລີ ໃນການແຂ່ງຂັນບານໂລກ 2006 ຮອບຊີງຊະນະເລີດ ມາຈັດສະແດງອີກເທື່ອຫນຶ່ງ ກ່ອນ ເລີ່ມການແຂ່ງຂັນໃນເດືອນພະຈິກນີ້.
ເຫດການດັ່ງກ່າວເກີດຂຶ້ນຈາກ ຊີດານ ຖືກ ມາເຕຣັສຊີ ເວົ້າຈາກໍ່ກວນດ້ວຍການກ່າວຫາຄົນໃນຄອບຄົວແບບເສຍຫາຍ ເຮັດໃຫ້ກອງກາງທີມຝຣັ່ງເກີດອາການໂມໂຫ ໃຊ້ຫົວຕຳໃສ່ຫນ້າເອິກຂອງຄູ່ກໍລະນີຈົນຖືກໃບແດງໄລ່ອອກຈາກສະຫນາມກ່ອນທີ່ຈະສະເຫມີ 1-1 ໃນເວລາ 120 ນາທີ ແລະ ສຸດທ້າຍເປັນອິຕາລີ ທີ່ຍິງລູກໂທດຊະນະ 5-3 ຄວ້າແຊ໊ມໂລກສະໄຫມທີ 4 ໄປຄອງ.
ຫລັງຈາກນັ້ນ ອາເດລ ອັບເດສເຊເຫມັດ ສິລະປະນຊາວຝຣັ່ງກໍໄດ້ສ້າງຮູບປັ້ນ ດັ່ງກ່າວ ຂຶ້ນມາຈັດສະແດງໃນປີ 2012 ແຕ່ກໍຖືກຮື້ຖອນອອກໄປໃນປີ 2013 ດ້ວຍເຫດຜົນວ່າເປັນຜົນງານທີ່ສື່ເຖິງການສະແດງຄວາມຮຸນແຮງ ເຊິ່ງເປັນສິ່ງ ທີ່ບໍ່ເຫມາະສົມ ແລະ ຖືກວິຈານຢ່າງຫນັກໃນຫລາຍປະເທດມຸດສະລິມ.
ແນວໃດກໍຕາມ ຫລ້າສຸດ ເຊກ ອັລ ມາຢັດຊາ ອັນ ທານີ ປະທານພິພິຕະພັນແຫ່ງຊາດກາຕາ ໄດ້ອະທິບາຍເຖິງເຫດຜົນທີ່ກຽມ ນຳຮູບປັ້ນດັ່ງກ່າວມາຈັດສະແດງໃນງານບານເຕະໂລກ 2022 ວ່າ : ‘‘ ສັງຄົມລ້ວນມີວິວັດທະນາການເກີດຂຶ້ນ ເຖິງມັນຕ້ອງ ໃຊ້ເວລາ ແລະ ຜູ້ຄົນອາດວິພາກວິຈານບາງສິ່ງບາງຢ່າງສຳລັບການເລີ່ມຕົ້ນສິ່ງໃຫມ່ ແຕ່ຫລັງຈາກນັ້ນພວກເຂົາກໍຈະເຂົ້າໃຈ ແລະ ເຮັດຄວາມຄຸ້ນເຄີຍກັບມັນ ’’.
‘‘ ຊີດານ ຖືເປັນມະຫາມິດຂອງ ກາຕາ ແລະ ລາວກໍເປັນບຸກຄົນຢ່າງທີ່ດີສຳລັບໂລກອາຣັບ ສິລະປະຄືກັບສິ່ງອື່ນໆໃນໂລກໃບນີ້ ເປັນເລື່ອງຂອງລົດນິຍົມ ເຊິ່ງເປົ້າຫມາຍຂອງເຮົາຄືການສ້າງພະລັງໃຫ້ກັບຜູ້ຄົນ ’’.
