ເນມ່າ ຍິງປະຕູທີ 74 ບຽດເອົາຊະນະ ຍີ່ປຸ່ນ 1-0 ໃນເກມອຸ່ນເຄື່ອງ ໃກ້ທຳລາຍສະຖິຕິ ຍິງຫຼາຍສຸດໃນທີມຊາດຂອງ ເປເລ່
ເນມ່າ ຊຸບເປີສະຕາຂອງ ປາຣີສ ໃກ້ທຳລາຍສະຖິຕິການຍິງປະຕູຫຼາຍທີ່ສຸດໃນທີມຊາດຂອງ ເປເລ່ ຫຼັງຈາກຍິງໄດ້ອີກໜຶ່ງປະຕູໃນເກມອຸ່ນເຄື່ອງທີ່ ບຣາຊິລ ບຽດເອົາຊະນະ ຍີ່ປຸ່ນ 1-0 ເຮັດໃຫ້ຍອດລວມທັງໝົດຢູທີ່ 74 ປະຕູ, ໂດຍເຫຼືອອີກ 3 ປະຕູຈະເທົ່າກັບ ເປເລ່.
ກ່ອນຫນ້ານີ້, ຫົວຫອກ PSG ກໍ່ຍິງສອງຈຸດໂທດໃນເກມທີ່ບຸກຖະຫຼົ່ມ ເກົາຫຼີໃຕ້ 5-1 ເມື່ອວັນພະຫັດທີ 2 ມິຖຸນາ ຜ່ານມາ, ບວກ 1 ປະຕູຈາກເກມຫຼ້າສຸດ. ເຮັດໃຫ້ຍອດລວມສະຖິຕິການຍິງປະຕູໃຫ້ກັບທີມບ້ານເກີດທັງໝົດມີ 74 ປະຕູ, ຍັງເຫຼືອພຽງ 3 ປະຕູ ກໍ່ຈະທຽບເທົ່າກັບເຈົ້າຂອງສາຍາ ມຸກດຳ ໄວ 81 ປີ ທີ່ຍິງໄດ້ 77 ປະຕູໃນລະຫວ່າງປີ 1957-1971
ສຳລັບທີມຊາດ ບຣາຊິລ ຈະມີໂປຣແກມລົງແຂ່ງຂັນບານໂລກ 2022 ຮອບຄັດເລືອກທີ່ອາເມຣິກາໃຕ້. ນັດທີ່ຕົກຄ້າງທີ່ຈະພົບກັບ ອາເຈນຕິນ່າ ໃນວັນທີ 22 ກັນຍາ, ເຖິງແມ່ນວ່າຈະຜ່ານເຂົ້າຮອບສຸດທ້າຍແລ້ວ. ແຕ່ສະຫະພັນບານເຕະສາກົນ ຫຼື FIFA, ຢືນຢັນໃຫ້ລົງແຂ່ງ ຫຼັງຈາກທີ່ຕ້ອງຍົກເລີກການແຂ່ງຂັນເນື່ອງນັກເຕະ 4 ຄົນ ຈາກທີມ ຟ້າຂາວ ທີ່ຫຼິ້ນຢູ່ໃນອັງກິດ ກັກຕົວບໍ່ຄົບຕາມກົດລະບຽບການປ້ອງກັນ COVID-19
ຢ່າງໃດກໍ່ຕາມ, ຄາດວ່າ ເນມ່າ ຈະສາມາດທໍາລາຍສະຖິຕິເກົ່າຂອງ ເປເລ່ ໃນການແຂ່ງຂັນບານໂລກ 2022 ຮອບສຸດທ້າຍທີ່ປະເທດກາຕ້າໃນທ້າຍປີນີ້. ໂດຍຮອບທຳອິດ ບຣາຊິລ ຢູ່ໃນກຸ່ມ G, ພ້ອມກັບເຊີເບຍ, ສະວິດເຊີແລນ ແລະ ແຄມເມີຣູນ, ໃນວັນທີ 24 ພະຈິກ.
