ທ່ານ ທຣຳ ຍັງບໍ່ເລີກຂູ່ໃຊ້ມາດຕະການ ທາງທະຫານຕໍ່ ສປປ ເກົາຫລີ
ປະທານາທິບໍດີອາເມລິກາຍັງກ່າວເຖິງການໃຊ້ມາດຕະການທາງທະຫານຕໍ່ ສປປ ເກົາຫລີ ລະຫວ່າງການສົນທະນາທາງໂທລະສັບກັບປະທານາທິບໍດີຝຣັ່ງ.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດອາເມລິກາ ໃນວັນທີ 13 ສິງຫານີ້ວ່າ: ທຳນຽບຂາວອອກຖະແຫລງການກ່ຽວກັບການສົນທະນາທາງໂທລະສັບລະຫວ່າງປະທານາທິບໍດີ ໂດນັນ ທຣຳ ກັບປະທານາທິບໍດີ ເອມມານູເອລ ມາຄຣົງ ຜູ້ນຳຝຣັ່ງ ໃນວັນທີ 12 ສິງຫາວ່າ: ສະຖານະການຢູ່ແຫລມເກົາຫລີມີຄວາມອັນຕະລາຍຫລາຍຂຶ້ນ ຈາກພຶດຕິກຳທຳລາຍ ແລະ ການຂົ່ມຂູ່ຂອງລັດຖະບານພຽງຢາງ ໂດຍມີການລະບຸອີກວ່າ: ອາເມລິກາ ແລະ ພັນທະມິດ ພ້ອມຈະໃຊ້ມາດຕະການຂັ້ນເດັດຂາດ ທັງໃນທາງການທູດ, ເສດຖະກິດ ແລະ ການທະຫານ ເພື່ອຢຸດພຶດຕິກຳອັນຮ້າຍແຮງຂອງ ສປປ ເກົາຫລີ.
ເຖິງຢ່າງໃດກໍຕາມ, ຖະແຫລງການຂອງທຳນຽບເລລີເຊໃນນະຄອນຫລວງປາຣີລະບຸວ່າ: ຜູ້ນຳຝຣັ່ງມີຄວາມກັງວົນຕໍ່ໄພຄຸກຄາມຈາກການໂຈມຕີດ້ວຍລູກສອນໄຟ ແລະ ລະເບີດນິວເຄຼຍຂອງ ສປປ ເກົາຫລີ, ແຕ່ເຊື່ອວ່າຫົນທາງເໝາະສົມທີ່ສຸດຄືການນຳເອົາລັດຖະບານພຽງຢາງໃຫ້ກັບຄືນສູ່ໂຕະເຈລະຈາຕາວິທີການທູດ ແລະ ການເຈລະຈາຕ້ອງເປັນໄປໂດຍປາສະຈາກເງື່ອນໄຂ.
ທັງນີ້, ການສົນທະນາທາງໂທລະສັບລະຫວ່າງທ່ານ ທຣຳ ກັບທ່ານ ມາຄຣົງ ເກີດຂຶ້ນພາຍຫລັງການສົນທະນາທາງໂທລະສັບໃນວັນດຽວກັນ ລະຫວ່າງຜູ້ນຳອາເມລິກາກັບປະທານາທິບໍດີ ສີຈິ້ນຜິງ ເຊິ່ງຜູ້ນຳຈີນເຫັນພ້ອມກັບການທີ່ລັດຖະບານພຽງຢາງຕ້ອງຢຸດການເດີນໜ້າພັດທະນາໂຄງການອາວຸດ, ແຕ່ຂະນະດຽວກັນ ທ່ານ ທຣຳ ຄວນຫລີກເວັ້ນການສະແດງອອກທັງທາງວາຈາ ແລະ ການກະທຳທີ່ອາດຍິ່ງເປັນການເພີ່ມຄວາມເຄັ່ງຕຶງຢູ່ແຫລມເກົາຫລີ.
