ເປີດແຂ່ງຂັນປິ່ງປ່ອງ ຊີງແຊ໋ມທົ່ວປະເທດ ຊີງຂັນປະທານ ຄອລ ເພື່ອເລືອກເຟັ້ນນັກກິລາ ເຍົາວະຊົນດີເດັ່ນກຽມຮ່ວມຊີງແຊ໋ມອາຊີ 2022

ການແຂ່ງຂັນກິລາປິ່ງປ່ອງຊີງແຊ໋ມທົ່ວປະເທດ ຊີງຂັນປະທານຄະນະກຳມະການໂອແລມປິກແຫ່ງຊາດລາວ (ຄອລ), ປະທານສະຫະພັນປິ່ງປ່ອງແຫ່ງຊາດລາວ ຫຼື ສປລ ຄັ້ງທີ 1 ປະຈຳປີ 2022 ເພື່ອຄັດເລືອກນັກກິລາເຍົາວະຊົນດີເດັ່ນ ກຽມຮ່ວມຊີງແຊ໋ມອາຊີ 2022 ໄດ້ເປີດສາກຂຶ້ນຢ່າງເປັນທາງການ ໃນຕອນເຊົ້າມື້ນີ້ 4 ມິຖຸນາ ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ນາງ ແສງເດືອນ ຫຼ້າຈັນທະບູນ ປະທານ ຄອລ ທັງເປັນປະທານ ສປລ ພ້ອມດ້ວຍຄະນະ, ຜູ້ໃຫ້ການສະໜັບສະໜູນຫຼັກ ບໍລິສັດ STS ຂາອອກ-ຂາເຂົ້າ ຈຳກັດຜູ້ດ່ຽວ ບັນດາຄະນະນຳ, ຄູຝຶກ ແລະ ນັກກິລາ ຈາກບັນດາແຂວງ ແລະ ສະໂມສອນອ້ອມຂ້າງສູນກາງເຂົ້າຮ່ວມ.

ໂອກາດນີ້, ທ່ານ ນາງ ສົມໃຈ ວົງສາ ເລຂາທິການ ສປລ ລາຍງານຄວາມຄືບໜ້າໃນການຈັດການແຂ່ງຂັນກິລາປິ່ງປ່ອງທົ່ວປະເທດ ຊີງຂັນປະທານ ຄອລ ແລະ ສປລ ຄັ້ງນີ້ ກໍເພື່ອເປັນການກຽມຄວາມພ້ອມຄັດເລືອກນັກກິລາຮຸ່ນສືບທອດ ກຽມສົ່ງເຂົ້າຮ່ວມແຂ່ງຂັນທັງພາຍໃນ ແລະ ຕ່າງປະເທດ ໃນປີ 2022 ໂດຍສະເພາະ ແມ່ນກຽມຄວາມພ້ອມໃຫ້ແກ່ ສປປ ລາວ ຈະເປັນເຈົ້າພາບ ຈັດລາຍການ ຊີງແຊ໋ມເຍົາວະຊົນອາຊີ ຄັ້ງທີ່ 26 ຈະຈັດຂຶ້ນ ໃນວັນທີ່ 1-6 ກັນຍາ 2022 ທີ່ສູນການຄ້າລາວ-ໄອເຕັກ.

ລາຍການປິ່ງປ່ອງ ຊີງແຊ໋ມປະເທດລາວ ປີນີ້ ມີນັກກິລາເຂົ້າຮ່ວມ 80 ຄົນ, ໃນນັ້ນ ຊາຍ 65 ຄົນ ແລະ ຍິງ 15 ຄົນ ຈາກ 2 ແຂວງ ຄື ແຂວງຈຳປາສັກ ແລະ ແຂວງຄຳມ່ວນ ແລະ 6 ສະໂມສອນ ພິເສດມີນັກກິລາຈາກສ ເກົາຫຼີ, ສປ ຈີນ ຮ່ວມແຂ່ງຂັນ ແລະ ມີການຊີງໄຊທັງໝົດ 4 ຮຸ່ນອາຍຸ ດຳເນີນແຂ່ງຂັນລະຫວ່າງວັນທີ 3-5 ມິຖຸນາ 2022 ມີການຊີງຂັນຊະນະເລີດທັງໝົດ 11 ລາຍການ ສ່ວນທີ 2 ຈະໄດ້ຮັບຫຼຽນລາງວັນ ຈຳນວນ 34 ຫຼຽນ ແລະ ທີ 3 ຮ່ວມ ກໍຈະໄດ້ຮັບຫຼຽນລາງວັນຮ່ວມມີ 56 ຫຼຽນ.

ໂດຍ: ສົງການ ພັນແພງດີ