ຝ່າຍຄ້ານເກນຢາຍັງບໍ່ຍອມຮັບ ຜົນເລືອກຕັ້ງປະທານາທິບໍດີ
ມີຜູ້ເສຍຊີວິດຢ່າງໜ້ອຍ 11 ຄົນ ຈາກເຫດຮຸນແຮງທີ່ເກີດຂຶ້ນຫລັງປະທານາທິບໍດີ ອູຮູຣູ ເກນຍັດຕາ ຊະນະການເລືອກຕັ້ງຜູ້ນຳເກນຢາເປັນສະໄໝທີ 2, ແຕ່ຝ່າຍຄ້ານຍັງປະຕິເສດຍອມຮັບການເສຍໄຊ.
ສຳນັກຂ່າວຕ່າງປະເທດລາຍງານຈາກນະຄອນຫລວງໄນໂຣບີ ປະເທດເກນຢາ ໃນວັນທີ 13 ສິງຫານີ້ວ່າ: ສະຖານະການທາງການເມືອງພາຍໃນເກນຢາຍັງປົກຄຸມໄປດ້ວຍຄວາມເຄັ່ງຕຶງ, ເຖິງວ່າຄະນະກຳມະການການເລືອກຕັ້ງປະກາດໃຫ້ປະທານາທິບໍດີ ອູຮູຣູ ເກນຍັດຕາ ຄືຜູ້ຊະນະການເລືອກຕັ້ງປະທານາທິບໍດີທີ່ມີຂຶ້ນໃນວັນທີ 8 ສິງຫາ ສາມາດຮັກສາຕຳແໜ່ງຜູ້ນຳປະເທດໄດ້ເປັນສະໄໝທີສອງ, ແຕ່ສະຫະພາບພັກຝາຍຄ້ານຂອງທ່ານ ໄຣລາ ໂອດິນກາ ອະດີດນາຍົກລັດຖະມົນຕີ ເຊິ່ງເປັນຜູ້ທ້າຊີງສູສີທີ່ສຸດພຽງຄົນດຽວ ຍັງຢືນຢັນຈະຮ້ອງຮຽນຜົນການເລືອກຕັ້ງຄັ້ງນີ້ຕໍ່ສານ ເນື່ອງຈາກເຊື່ອວ່າມີການສຸຈະລິດຢ່າງແຜ່ຫລາຍ ສົ່ງຜົນໃຫ້ຍັງມີການປະທະກັນຢ່າງດຸເດືອດລະຫວ່າງເຈົ້າໜ້າທີ່ຝ່າຍຄວາມໝັ້ນຄົງກັບກຸ່ມຜູ້ສະໜັບສະໜູນທ່ານ ໂອດິນກາ ໃນຫລາຍເມືອງ ເປັນເຫດໃຫ້ມີຜູ້ເສຍຊີວິດແລ້ວ 11 ຄົນ ແລະ ໄດ້ຮັບບາດເຈັບອີກເປັນຈຳນວນຫລາຍ.
ທັງນີ້, ເກນຢາເປັນປະເທດທີ່ມັກຜະເຊີນເຫດຮຸນແຮງຫລັງການເລືອກຕັ້ງເລື້ອຍໆ ໂດຍຄັ້ງຮຸນແຮງທີ່ສຸດເກີດຂຶ້ນໃນປີ 2007 ມີຜູ້ເສຍຊີວິດເຖິງ 1.100 ຄົນ ແລະ ປະຊາຊົນອີກ 600.000 ຄົນບໍ່ມີບ່ອນຢູ່ອາໄສ. ເຖິງຢ່າງໃດກໍຕາມ, ກະຊວງປ້ອງກັນຄວາມສະຫງົບຂອງເກນຢາເຊື່ອວ່າ: ສະຖານະການຫລັງການເລືອກຕັ້ງຄັ້ງນີ້ອາດບໍ່ຮຸນແຮງເທົ່າເຫດການເມື່ອ 10 ປີຜ່ານມາ ແລະ ເຈົ້າໜ້າທີ່ຈະສາມາດຄວບຄຸມສະຖານະການໄດ້.
