ທູດລາວ ປະຈຳ ສສ ຫວຽດນາມ ພ້ອມຄະນະ ຢ້ຽມຢາມ ແລະ ເຮັດວຽກຢູ່ ແຂວງຫວິງຝຸກ

ຂປລ. ໃນວັນທີ 1 ມິຖຸນາ 2022 ຜ່ານມາ, ສະຫາຍ ແສງເພັດ ຮຸ່ງບຸນຍວງເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດ ນາມ ພ້ອມຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຫວິງຝຸກ ໂດຍໄດ້ພົບປະ ແລະ ເຮັດວຽກກັບ ສະຫາຍ ຟ້າມ ຮວ່າງ ແອງ ຮອງເລຂາພັກແຂວງຜູ້ປະຈໍາການ, ປະທານສະຫະພັນບັນດາອົງການຈັດຕັ້ງມິດຕະພາບແຂວງຫວິງຝຸກ ເຊິ່ງການພົບປະຄັ້ງນີ້, ການນໍາແຂວງ ກໍໄດ້ສະແດງຄວາມຍິນດີຕ້ອນຮັບ, ຕີລາຄາສູງທີ່ສະຫາຍເອກອັກຄະລັດຖະທູດ ພ້ອມຄະນະ ໄດ້ເດີນທາງມາຢ້ຽມຢາມ, ພົບປະ ແລະ ເຂົ້າຮ່ວມກິດຈະກໍາຈຳນວນໜຶ່ງ ເພື່ອເປັນການສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ ປີ 2022 ຄື: ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45 ປີ.

ໂອກາດນີ້, ສະຫາຍ ຟ້າມ ຮວ່າງ ແອງ ໄດ້ແຈ້ງໃຫ້ຮູ້ວ່າ: ຕະຫລອດໄລຍະ ຜ່ານມາ ແຂວງຫວິງຝຸກ ໄດ້ຜັນຂະຫຍາຍຢ່າງຕັ້ງໜ້າຕໍ່ແນວທາງນະໂຍບາຍຂອງພັກ, ລັດສອງປະເທດ ເຊິ່ງໄດ້ເອົາໃຈໃສ່ໃນການຮັດແໜ້ນ ການພົວພັນຮ່ວມມືກັບນະຄອນ ຫລວງວຽງຈັນ ແລະ 8 ແຂວງພາກເໜືອຂອງ ສປປ ລາວ; ສອງຝ່າຍມີການພົບປະ, ແລກປ່ຽນຄະນະຜູ້ແທນ, ຊ່ວຍເຫລືອ, ສະໜັບສະໜູນ ເຊິ່ງກັນ ແລະ ກັນຢ່າງເປັນປົກກະຕິ. ພິເສດແຂວງຫວິງຝຸກ ໄດ້ໃຫ້ການຊ່ວຍເຫລືອທຶນຮອນຈຳນວນໜຶ່ງ ເພື່ອປະກອບສ່ວນເຂົ້າໃນການກໍ່ສ້າງພື້ນຖານໂຄງລ່າງຢູ່ພາກເໜືອ ລວມທັງໃຫ້ທຶນການສຶກສາຈຳນວນ 30 ທຶນ/ປີ ໃຫ້ແກ່ລູກຫລານປະຊາຊົນບັນດາແຂວງພາກເໜືອຂອງລາວ.

ສະຫາຍ ຟ້າມ ຮວ່າງ ແອງ ຍັງໄດ້ແຈ້ງໃຫ້ຊາບວ່າ: ໃນເດືອນ 8/2022 ແຂວງ ຫວິງຝຸກ ຈະເຊີນຄະນະຜູ້ແທນ 8 ແຂວງພາກເໜືອຂອງລາວ ມາຢ້ຽມຢາມ ແລະ ເຂົ້າຮ່ວມກອງປະຊຸມ ເພື່ອຕີລາຄາຄືນການປະຕິບັດແຜນການຮ່ວມມື ລະຫວ່າງແຂວງຫວິງ ຝຸກ ກັບ 8 ແຂວງພາກເໜືອຂອງລາວ ໃນໄລຍະຜ່ານມາ ແລະ ຈະນໍາພາຄະນະຜູ້ແທນຂັ້ນສູງແຂວງຫວິງຝຸກ ເດີນທາງໄປຢ້ຽມຢາມ ແລະ ເຮັດວຽກກັບ 3 ແຂວງພາກ ເໜືອຂອງລາວ ໃນເດືອນກັນຍາ 2022 ໂດຍຈະຖືໂອກາດດັ່ງກ່າວມອບເງິນຊ່ວຍເຫລືອປະມານ 1 ລ້ານໂດລາສະຫະລັດ ໃຫ້ແກ່ແຂວງຫລວງນໍ້າທາ ເພື່ອກໍ່ສ້າງອາຄານປິ່ນປົວຄົນເຈັບຢູ່ໂຮງໝໍແຂວງ, ພ້ອມທັງຈະເຊື້ອເຊີນຄະນະຜູ້ແທນຂັ້ນສູງຂອງບັນດາແຂວງພາກເໜືອຂອງລາວ ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຫວິງຝຸກ ໃນທ້າຍປີ 2022 ເພື່ອສະຫລຸບການຈັດຕັ້ງປະຕິບັດ ບັນດາກິດຈະກໍາສະເຫລີມສະຫລອງປີສາມັກຄີມິດຕະພາບ.

ສະຫາຍເອກອັກຄະລັດຖະທູດ ກໍໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງແຂວງຫວິງຝຸກ ກັບບັນດາແຂວງພາກເໜືອຂອງລາວ ໃນໄລຍະຜ່ານມາ ແລະ ໄດ້ຢືນ ຢັນວ່າ ຈະເຮັດສຸດຄວາມສາມາດຂອງຕົນ ເພື່ອເປັນຂົວຕໍ່ໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ໂດຍສະເພາະແມ່ນແຂວງຫວິງຝຸກ ກັບບັນດາແຂວງພາກເໜືອຂອງລາວ ໃຫ້ນັບມື້ແຕກດອກອອກຜົນ ແລະ ຈະເລີນງອກງານຍິ່ງຂຶ້ນ, ສະແດງຄວາມຂອບໃຈຢ່າງຈິງໃຈມາຍັງອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ຫວິງຝຸກ ທີ່ໄດ້ໃຫ້ການສະໜັບສະໜູນ, ຊ່ວຍເຫລືອ, ຄຽງບ່າຄຽງໄຫລ່ກັບປະຊາຊົນລາວບັນດາແຂວງພາກເໜືອຂອງລາວຕະຫລອດມາ ພິເສດແມ່ນການຊ່ວຍກໍ່ສ້າງບຸກຄະລາກອນໃຫ້ແກ່ລາວ ທີ່ຈະເປັນກຳລັງຫລັກ ແລະ ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງຊາດ.

ໂອກາດນີ້, ສະຫາຍ ແສງເພັດ ຮຸ່ງບຸນຍວງ ກໍສະເໜີໃຫ້ສອງຝ່າຍສືບຕໍ່ເສີມຂະຫຍາຍ ມູນເຊື້ອສາຍພົວພັນອັນດີງາມ ໃຫ້ມີປະສິດທິຜົນຍິ່ງໆຂຶ້ນ, ພ້ອມທັງສະເໜີໃຫ້ແຂວງຫວິງຝຸກ ຊ່ວຍດຶງດູດດນັກລົງທຶນຂອງແຂວງມາລົງທຶນຢູ່ບັນດາແຂວງພາກເໜືອງຂອງລາວໃຫ້ຫລາຍຂຶ້ນ ເພື່ອເປັນການປະກອບສ່ວນເຮັດໃຫ້ມີການພັດທະນາແບບຍືນຍົງ.

ໃນວັນດຽວກັນ, ສະຫາຍເອກອັກຄະລັດຖະທູດ ຍັງໄດ້ນຳພາຄະນະໄປເຂົ້າຮ່ວມພິທີພົບປະອະດີດທະຫານອະສາສະໝັກຫວຽດນາມ ທີ່ເຄີຍປະກອບສ່ວນເຂົ້າໃນການປະຕິວັດລາວ ເພື່ອຮ່ວມກັນສະເຫລີມສະຫລອງ ວັນສ້າງວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ (5/9/1962-5/9/2022) ແລະ ວັນເຊັນສົນທິ ສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45 ປີ (18/7/1977-18/7/2022), ພ້ອມທັງມອບລາງວັນໃຫ້ແກ່ຜູ້ຊະນະການແຂ່ງຂັນ “ສາຍພົວພັນລາວ-ຫວຽດນາມ ທີ່ເຕັມໄປດ້ວຍນໍ້າໃຈບໍລິສຸດ” ໂດຍມີຜູ້ເຂົ້າສົ່ງປະກວດຈຳນວນ 5.301 ບົດທີ່ເວົ້າເຖິງສາຍພົວພັນທີ່ມີລັກສະນະພິເສດ ລະຫວ່າງສອງຊາດ ລາວ-ຫວຽດນາມ.

ໂອກາດນີ້, ສະຫາຍ ແສງເພັດ ຮຸ່ງບຸນຍວງ ກໍໄດ້ຕີຄາລາສູງຕໍ່ການຈັດກິດຈະກໍາແຂ່ງຂັນຄັ້ງນີ້ ເຊິ່ງສຸດທີ່ມີຄວາມໝາຍສຳຄັນ ເພື່ອເປັນການໂຄສະນາ ແລະ ສຶກສາອົບຮົມໃຫ້ແກ່ຄົນຮຸ້ນໜຸ່ມຜູ້ທີ່ສືບທອດ ໄດ້ເຂົ້າໃຈຢ່າງເລິກເຊິ່ງ ແລະ ພ້ອມກັນປົກປັກຮັກສາ, ຖະນຸຖະໜອມສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ສອງກອງທັບ ແລະ ປະຊາຊົນສອງຊາດລາວ-ຫວຽດນາມ-ລາວໃຫ້ຂຽວສົດງົດງາມ ແລະ ໝັ້ນຄົງທະນົງແກ່ນຕະ ຫລອດກາລະນານ.
ຂ່າວ-ພາບ: ສະຖານທູດລາວທີ່ຮ່າໂນ້ຍ