ຍີ່ປຸ່ນໄຟຂຽວ ຮັບນັກທ່ອງທ່ຽວ ເດີນທາງເຂົ້າປະເທດເພີ່ມສູງສຸດ 20.000 ຄົນຕໍ່ວັນ
ວັນທີ 1 ມິຖຸນາ 2022, ສຳນັກຂ່າວຊິນຮົວລາຍງານວ່າ: ຍີ່ປຸ່ນປະກາດເພີ່ມຈຳນວນນັກເດີນທາງຂາເຂົ້າສູງສຸດຕໍ່ວັນຈາກ 10.000 ຄົນ ເປັນ 20.000 ຄົນ ພ້ອມຫລຸດຜ່ອນການກວດພະຍາດໂຄວິດ ແລະ ຫລຸດໄລຍະເວລາກັກຕົວອັນເຂັ້ມງວດ ຂະນະກຽມກັບມາເປີດຊາຍແດນຢ່າງເຕັມຮູບແບບ.
ລາຍງານລະບຸວ່າ: ນັກເດີນທາງຂາເຂົ້າຈາກ 98 ປະເທດ ແລະ ພາກພື້ນທີ່ຖືກກຳນົດເປັນ “ສີຟ້າ” ຫລື ພື້ນທີ່ສ່ຽງຕິດເຊື້ອລະດັບຕໍ່າສຸດ ເຊິ່ງລວມທັງອາເມລິກາ, ອັງກິດ, ຈີນ, ສ.ເກົາຫລີ, ອິນໂດເນເຊຍ ແລະ ໄທ ຈະບໍ່ຈຳເປັນຕ້ອງກັກຕົວ ຫລື ສະແດງຜົນກວດພະຍາດໂຄວິດເມື່ອເດີນທາງເຂົ້າຍີ່ປຸ່ນ ເນື່ອງຈາກຄວາມກັງວົນກ່ຽວກັບການລະບາດໃຫຍ່ເລີ່ມຫລຸດລົງ.
ຂະນະດຽວກັນ 99 ປະເທດ ແລະ ພາກພື້ນທີ່ຖືກກຳນົດເປັນ “ສີເຫລືອງ” ເຊິ່ງລວມທັງຫວຽດນາມ, ອິນເດຍ ແລະ ບຣູໄນ ຈະບໍ່ຈຳເປັນຕ້ອງເຂົ້າຮັບການກວດພະຍາດ ຫລື ກັກຕົວ ຖ້າພວກເຂົາໄດ້ຮັບວັກຊີນທີ່ກຳນົດຄົບ 3 ໂດສ, ສ່ວນນັກເດີນທາງທີ່ມາຈາກປະເທດ ແລະ ພາກພື້ນທີ່ຖືກຳນົດເປັນ “ສີແດງ” ເຊິ່ງລວມທັງປາກິດສະຖານ, ຟິຈິ, ແອລເບເນຍ ແລະ ເຊຍຣາລີໂອນ ຈະຍັງຢູ່ພາຍໃຕ້ລະບຽບການປ້ອງກັນພະຍາດໂຄວິດ.
ທັງນີ້, ຍີ່ປຸ່ນວາງແຜນກັບມາເປີດຕ້ອນຮັບນັກທ່ອງທ່ຽວຕ່າງປະເທດເປັນໄລຍະນັບແຕ່ວັນທີ 10 ມິຖຸນານີ້ ຕາມມາດຕະການຫລຸດຜ່ອນຮອບຫລ້າສຸດທີ່ປະກາດໃນວັນທີ 1 ມິຖຸນາ ໂດຍທ່ານ ຮິໂຣຄາສຸ ມັດສິໂນະ ຫົວໜ້າເລຂາທິການຄະນະລັດຖະບານ ແລະ ໂຄສົກລະດັບສູງຂອງລັດຖະບານຍີ່ປຸ່ນ ຖະແຫລງວ່າການເດີນໜ້າຫລຸດຜ່ອນມາດຕະການຄວບຄຸມຊາຍແດນເປັນໄລຍະ ຈະດຳເນີນໄປຄຽງຄູ່ກັບການສ້າງສົມດູນລະຫວ່າງການປ້ອງກັນການຕິດເຊື້ອ ແລະ ກິດຈະກຳທາງເສດຖະກິດ ແລະ ສັງຄົມ.
ອ້າງອີງ:
‘ญี่ปุ่น’ ไฟเขียวรับนักเดินทางขาเข้าเพิ่มสูงสุด 20,000 คนต่อวัน
