ກະຊວງພາຍໃນຈັດກິດຈະກຳ ຈົດທະບຽນແຕ່ງດອງ ແລະ ການເກີດເຄື່ອນທີ່

ກະຊວງພາຍໃນ ໄດ້ຈັດກິດຈະກໍາການຈົດທະບຽນແຕ່ງດອງ ແລະ ການເກີດເຄື່ອນທີ່ ເພື່ອສະເຫຼີມສະຫຼອງ ວັນແມ່ຍິງສາກົນ ຄົບຮອບ 112 ປີ, ວັນເດັກນ້ອຍສາກົົນ, ວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີ ແລະ ວັນສົນທິສັນຍາ ວ່າດ້ວຍສິດທິເດັກ 22 ພະຈິກ ຂຶ້ນ ເມື່ອວັນທີ 31 ພຶດສະພານີ້ ທີ່ກະຊວງດັ່ງກ່າວ ໂດຍການເປັນປະທານຂອງ ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ, ມີພາກສ່ວນກ່ຽວຂ້ອງເຂົ້າຮ່ວມ.

ການຈົດທະບຽນເຄື່ອນທີ່ຄັ້ງນີ້ ຖືເປັນຄັ້ງທຳອິດທີ່ຈັດຂຶ້ນຢູ່ ກະຊວງພາຍໃນ ເປັນການຈັດກິດຈະກຳທີ່ຕິດພັນກັບວຽກງານວິຊາສະເພາະ, ຊຶ່ງເປັນການຈັດຕັ້ງຜັນຂະຫຍາຍຍຸດທະສາດຈົດທະບຽນ ແລະ ສະຖິຕິພົນລະເມືອງ ທັງເປັນການສະເຫຼີມສະຫຼອງ 2 ວັນປະຫວັດສາດ ທີ່ມີຄວາມໝາຍສຳຄັນຕໍ່ເດັກ ແລະ ແມ່ຍິງ, ການຈົດທະບຽນການແຕ່ງດອງ ແລະ ການຈົດທະບຽນການເກີດ ແມ່ນການປົກປ້ອງສິດ ແລະ ຜົນປະໂຫຍດອັນຊອບທຳຂອງແມ່ຍິງ ແລະ ເດັກໂດຍກົງ ເຊັ່ນ: ສິດທິໃນການເລືອກສັນຊາດ, ຊື່ ແລະ ສາຍພົວພັນຄອບຄົວ, ການປົກປ້ອງຕໍ່ການແຕ່ງດອງໃນໄວເດັກ, ການນຳໃຊ້ແຮງງານເດັກ, ການເປັນທະຫານ, ການຄ້າມະນຸດ, ການລັກພາຕົວ ແລະ ການຮັບເປັນລູກລ້ຽງຢ່າງຜິດກົດໝາຍ, ການເຂົ້າເຖິງການສຶກສາ ແລະ ການບໍລິການສັງຄົມ, ສິດໃນການຮຽກຮ້ອງການສືບທອດມໍລະດົກ; ສິດໃນສິນສົມສ້າງ ແລະ ອື່ນໆ, ການຈົດທະບຽນການແຕ່ງດອງ ແລະ ການຈົດທະບຽນການເກີດ ແມ່ນນອນໃນ 7 ໜ້າວຽກຂອງການຈົດທະບຽນຄອບຄົວ ທີ່ກະຊວງພາຍໃນຮັບຜິດຊອບ ວຽກງານຈົດທະບຽນຄອບຄົວ ແມ່ນວຽກໜຶ່ງທີ່ສຳຄັນ ແລະ ຈຳເປັນ ມັນຕິດພັນກັບຜົນປະໂຫຍດຂອງປະຊາຊົນ, ແຜນພັດທະນາເສດຖະກິດ-ສັງຄົມແຫ່ງຊາດ, ການປົກປັກຮັກສາ ແລະ ສ້າງສາພັດທະນາປະເທດຊາດ. ລັດຖະບານໄດ້ວາງວິໄສທັດຮອດ ປີ 2030 ສິດທິຂອງພົນລະເມືອງມີການຮັບປະກັນດ້ວຍການຄຸ້ມຄອງລັດດ້ວຍກົດໝາຍທີ່ສັກສິດ ຊຶ່ງໄລຍະຜ່ານມາ ລັດຖະບານລາວກໍໄດ້ອອກກົດໝາຍຫຼາຍສະບັບທີ່ກ່ຽວຂ້ອງກັບການປົກປ້ອງສິດ ແລະ ຜົນປະໂຫຍດຂອງພົນລະເມືອງລາວ; ພ້ອມທັງໄດ້ວາງຄາດໝາຍສູ້ຊົນຮອດປີ 2025 ພົນລະເມືອງລາວໃນເກນອາຍຸຕ້ອງໄດ້ສໍາເລັດການສຶກສາຂັ້ນມັດທະຍົມຕົ້ນ, ປະຊາຊົນໄດ້ຮັບການບໍລິ ການດ້ານສາທາລະນະສຸກທີ່ມີຄຸນນະພາບຢ່າງທົ່ວເຖິງ ແລະ ມີອາຍຸຍືນສະເລ່ຍສູງກວ່າ 73 ປີ, ກໍາລັງແຮງງານ ໄດ້ຮັບການພັດທະນາທາງດ້ານປະລິມານ ແລະ ຄຸນນະພາບ ໃນນັ້ນສູ້ຊົນໃຫ້ບັນລຸເປົ້າໝາຍການພັດທະນາທີ່ຍືນຍົງ (SDGs ).

ການສ້າງກິດຈະກຳການຈົດທະບຽນແຕ່ງດອງ ແລະ ຈົດທະບຽນການເກີດຄັ້ງນີ້ ມີຜູ້ມາໃຊ້ບໍລິການຈົດທະບຽນການແຕ່ງດອງ ຈຳນວນ 47 ຄູ່ ແລະ ການຈົດທະບຽນການເກີດ ຈຳນວນ 331 ຄົນ ແລະ ໄດ້ມອບໃບຢັ້ງຢືນໃຫ້ກັບຜູ້ທີ່ມາຈົດທະບຽນດັ່ງກ່າວຕື່ມອີກ. ນອກນັ້ນ ຍັງມີກິດຈະກຳຖາມ-ຕອບ ກ່ຽວກັບເດັກ ແລະ ແມ່ຍິງ, ແຈກຂອງຂວັນໃຫ້ເດັກນ້ອຍ.

ໃນໄລຍະຜ່ານມາ, ເນື່ອງໃນໂອກາດວັນສະເຫຼີມສະຫຼອງວັນເດັກສາກົນ, ກະຊວງພາຍໃນກໍໄດ້ຈັດໃຫ້ມີກິດຈະກຳ ການຈົດທະບຽນ ແລະ ອອກໃບຢັ້ງຢືນການເກີດເຄື່ອນທີ່ ໃຫ້ແກ່ເດັກໃນ 6 ຕົວເມືອງ ຂອງນະຄອນຫຼວງວຽງຈັນ. ໃນນັ້ນຍັງໄດ້ຈົດທະບຽນການເກີດເຄື່ອນທີ່ ສໍາລັບເດັກຢູ່ເຂດທີ່ໄດ້ຮັບຜົນກະທົບຈາກໄພພິບັດ ຢູ່ເມືອງສະໜາມໄຊ, ແຂວງອັດຕະປື ຕື່ມອີກ.
(ຂ່າວ-ພາບ: ສຳນານ)