UN ເຜີຍ ປະເທດອາຊຽນຢຶດຢາບ້າ ເພີ່ມຂຶ້ນສູງສຸດເປັນສະຖິຕິໃໝ່

ສຳນັກງານປ້ອງກັນຢາເສບຕິດ ແລະ ປາບປາມອາດຊະຍາກຳແຫ່ງສະຫະປະຊາຊາດ (UNODC) ເປີດເຜີຍລາຍງານລະບຸວ່າ: ການຢຶດຢາເສບຕິດປະເພດແອມເຟຕາມີນ ຫລື ຢາບ້າ ໃນພາກພື້ນອາຊີຕາເວັນອອກ ແລະ ອາຊີຕາເວັນອອກສຽງໃຕ້ ປະຈຳປີ 2021 ເພີ່ມຂຶ້ນສູງສຸດເປັນສະຖິຕິໃໝ່.

ວັນທີ 30 ພຶດສະພາ 2022, ທ່ານ ເຈເຣມີ ດັກລາສ ຜູ້ແທນສຳນັກງານປ້ອງກັນຢາເສບຕິດ ແລະ ປາບປາມອາດຊະຍາກຳແຫ່ງສະຫະປະຊາຊາດ (UNODC) ເປີດເຜີຍລາຍງານວ່າ: ປະລິມານຢາບ້າ ແລະ ຢາໄອສ໌ ທີ່ຖືກລັກລອບຂາຍໃນອາຊີຕາເວັນອອກ ແລະ ຕາເວັນອອກສຽງໃຕ້ນັ້ນເພີ່ມສູງຂຶ້ນຈົນໜ້າຕົກໃຈ ເຊິ່ງກຸ່ມອາດຊະຍາກອນຂ້າມຊາດ ແລະ ກຸ່ມຕິດອາວຸດ ອາໄສການລະເລີຍໃນໄລຍະທີ່ມີການແພ່ລະບາດໃຫຍ່ຂອງໂຄວິດ-19 ແລະ ຄວາມບໍ່ສະຫງົບທາງການເມືອງ ເພີ່ມປະລິມານການສົ່ງອອກຢາເສບຕິດ.

ໂດຍໃນປີຜ່ານມາ, UN ສາມາດຢຶດຢາບ້າ ແລະ ຢາໄອສ໌ຫລາຍເປັນປະຫວັດສາດເຖິງ 171,5 ໂຕນ ຫລາຍກວ່າໃນໄລຍະສິບປີຜ່ານມາເຖິງ 7 ເທົ່າ ແລະ ການຈັບກຸມປະມານ 90% ເກີດຂຶ້ນຢູ່ໄທ, ລາວ, ມຽນມາ ແລະ ກຳປູເຈຍ.