ດື່ມກາເຟຫລາຍເກີນໄປ ສ່ຽງ 5 ພະຍາດໂດຍບໍ່ຮູ້ໂຕ.

ຫລາຍຄົນເລືອກດື່ມກາເຟ ຍ້ອນເປັນເຄື່ອງດື່ມທີ່ຊ່ວຍໃຫ້ຮູ້ສຶກສົດຊື່ນຫ້າວຫັນ ແລະ ສະໝອງຕື່ນໂຕ ເຊິ່ງຊ່ວຍໃຫ້ເຮັດວຽກໄດ້ຢ່າງຄ່ອງແຄ້ວ, ແຕ່ໃນຂະນະດຽວກັນ ການດື່ມກາເຟທີ່ຫລາຍຈົນເກີນໄປ ກໍມີສ່ວນເຮັດໃຫ້ເກີດອັນຕະລາຍຕໍ່ສຸຂະພາບຮ່າງກາຍໄດ້ຄືກັນ. ມາເບິ່ງນຳກັນວ່າອັນຕະລາຍຈາກການດື່ມກາເຟໃນປະລິມານທີ່ຫລາຍຈົນເກີນໄປນັ້ນ ສ່ຽງເຮັດໃຫ້ເກີດພະຍາດຫຍັງໄດ້ແດ່ ດັ່ງຕໍ່ໄປນີ້ :

1. ພະຍາດຫົວໃຈ : ການດື່ມກາເຟໃນປະລິມານຫລາຍເກີນໄປ ມີສ່ວນເຮັດໃຫ້ສ່ຽງເປັນພະຍາດຫົວໃຈ ບໍ່ວ່າຈະເປັນພະຍາດຫົວໃຈເຕັ້ນໄວ, ຫົວໃຈເຕັ້ນຜິດຈັງຫວະ ລວມທັງພະຍາດທີ່ກ່ຽວຂ້ອງກັບກ້າມຊີ້ນຫົວໃຈ ນັ້ນເປັນຍ້ອນກາເຟອີນຈະໄປກະຕຸ້ນໃຫ້ຫົວໃຈຂອງທ່ານເຕັ້ນຜິດຈັງຫວະ ຈົນບາງເທື່ອອາດເຮັດໃຫ້ເກີດອາການໃຈສັ່ນ ຍິ່ງຖ້າທ່ານເປັນພະຍາດຫົວໃຈຢູ່ແລ້ວ ກໍຈະຍິ່ງເຮັດໃຫ້ອາການຮຸນແຮງຫລາຍຍິ່ງຂຶ້ນ.
2. ມຶນຊາ-ຈັງ : ໂດຍປົກກະຕິແລ້ວເມື່ອຮ່າງກາຍຂາດວິຕາມິນ B1 ຈະສົ່ງຜົນໃຫ້ເກີດອາການມຶນຊາ ຫລື ຈັງ ກ້າມຊີ້ນອ່ອນແຮງ, ມີອາການບວມ ບາງເທື່ອອາດເຖິງຂັ້ນເຮັດໃຫ້ຫົວໃຈວາຍ ແລະ ເສຍຊີວິດໄດ້ ທັງນີ້ 1 ໃນສາເຫດທີ່ເຮັດໃຫ້ຮ່າງກາຍຂາດວິຕາມິນ B1 ກໍມາຈາກການທີ່ທ່ານດື່ມກາເຟຫລາຍຈົນເກີນໄປ ເພາະກາເຟອີນຈະເຂົ້າໄປຂັດຂວາງການດູດຊຶມວິຕາມິນຊະນິດນີ້ ແລະ ເຖິງວ່າທ່ານຈະກິນອາຫານທີ່ມີວິຕາມິນ B1 ຫລາຍປານໃດ ຖ້າພຶດຕິກຳການດື່ມກາເຟຂອງທ່ານຫລາຍກ່ວາ ກໍບໍ່ໄດ້ຊ່ວຍຫຍັງໄດ້ຄືກັນ.
3. ກະດູກຜ່ອຍ : 1 ໃນສາເຫດທີ່ເຮັດໃຫ້ເປັນພະຍາດກະດູກຜ່ອຍກໍແມ່ນການດື່ມກາເຟຫລາຍເກີນໄປ ເພາະກາເຟອີນມີສ່ວນເຂົ້າໄປຂັດຂວາງການດູດຊຶມທາດການຊຽມ ທັງຍັງຂັດຂວາງການນຳເອົາທາດການຊຽມໄປໃຊ້ນຳອີກ ຈຶ່ງສົ່ງຜົນໃຫ້ກະດູກບໍ່ໄດ້ຮັບການບຳລຸງ ຈົນເກີດອາການກະດູກຜ່ອຍ ແລະ ບາງຕາມມາ.
4. ຄວາມດັນເລືອດສູງ : ສຳລັບໃຜທີ່ເປັນຄວາມດັນເລືອດສູງຢູ່ແລ້ວ ຈຳເປັນຢ່າງຍິ່ງທີ່ຈະຕ້ອງລະມັດລະວັງໃນການດື່ມກາເຟ ເພາະຫາກມີພຶດຕິກຳການດື່ມກາເຟທີ່ຫລາຍເກີນໄປ ຈະເຮັດໃຫ້ເກີດການກະຕຸ້ນການຫລັ່ງອະດຣີນາລີນ ສົ່ງຜົນໃຫ້ຫົວໃຈເຮັດວຽກເພີ່ມຂຶ້ນ ແລະ ນັ້ນກໍຈະເຮັດໃຫ້ຫົວໃຈເຕັ້ນໄວ ແລະ ເຕັ້ນແຮງຂຶ້ນ, ຄວາມດັນເລືອດກໍຈະເພີ່ມຂຶ້ນໄດ້ ແລະ ເມື່ອໃດທີ່ຄວາມດັນເລືອດສູງເກີນໄປ ກໍຈະເຮັດໃຫ້ເກີດພະຍາດອື່ນໆໄດ້ນຳ.
5. ພະຍາດກະເພາະອາຫານ : ການດື່ມກາເຟໃນປະລິມານຫລາຍເກີນໄປ ຈະກະຕຸ້ນໃຫ້ນຳ້ຍ່ອຍຫລັ່ງອອກມາຫລາຍນຳ ເຊິ່ງການທີ່ມີນຳ້ຍ່ອຍ ຫລື ກົດຫລັ່ງອອກມາຫລາຍກໍຈະເພີ່ມໂອກາດໃນການທີ່ກະເພາະອາຫານຈະຖືກທຳຮ້າຍຫລາຍຂຶ້ນ. ສຳລັບຄົນທີ່ເປັນພະຍາດກະເພາະອາຫານຢູ່ແລ້ວ ຫາກດື່ມກາເຟຫລາຍເກີນໄປກໍຈະຍິ່ງກະຕຸ້ນໃຫ້ເກີດບາດແຜໃນກະເພາະຫລາຍຂຶ້ນ ຈົນເຮັດໃຫ້ເກີດອາການເຈັບທ້ອງແຮງຂຶ້ນໄດ້.

• ແນ່ນອນວ່າການດື່ມກາເຟໃຫ້ຜົນດີຕໍ່ຮ່າງກາຍຫລວງຫລາຍ, ແຕ່ຫາກດື່ມໃນປະລິມານທີ່ຫລາຍເກີນໄປ ກໍຍ່ອມສົ່ງຜົນຮ້າຍຕໍ່ຮ່າງກາຍໄດ້ຄືກັນ. ດັ່ງນັ້ນ, ບັນດາທ່ານຈຶ່ງຕ້ອງພະຍາຍາມຄວບຄຸມການດື່ມກາເຟໃນປະລິມານທີ່ເໝາະສົມ ລວມທັງຕ້ອງເອົາໃຈໃສ່ການກິນອາຫານໃຫ້ຄົບ 5 ໝວດຄຽງຄູ່ກັນ ເພື່ອໃຫ້ຮ່າງກາຍໄດ້ຮັບສານອາຫານທີ່ຄົບຖ້ວນ ແລະ ຫລຸດຄວາມສ່ຽງໃນການເປັນພະຍາດຕ່າງໆໄດ້ນຳ.