ຄວາມຈິງແລ້ວ ການປູກຕົ້ນໄມ້ ປູກມື້ໃດກໍໄດ້ ບໍ່ຖ້າແຕ່ວັນທີ 1 ມິຖຸນາ

ປີນີ້ກໍຄືຊຸມປີຜ່ານມາ, ພາກລັດໄດ້ກ້າເບ້ຍ ແລະ ປູກໄມ້ໄດ້ຫລາຍ ໂດຍຖືເອົາວັນທີ 1 ມິຖຸນາເປັນເລີກງາມຍາມດີ ເນື່ອງຈາກເປັນໄລຍະເລີ່ມຕົ້ນຂອງລະດູຝົນ. ທີ່ສຳຄັນ, ລັດໄດ້ກໍານົດເປັນວັນປູກຕົ້ນໄມ້ແຫ່ງຊາດ ກົງກັບວັນເດັກນ້ອນສາກົນ ທີ 1 ມິຖຸນາ ຖືວ່າມີຄວາມໝາຍຄວາມສໍາຄັນທີ່ສຸດ.

ລະດູການປູກໄມ້ເປັນທາງການ ໄດ້ເລີ່ມຂຶ້ນແລ້ວ ເພາະກ້າວເຂົ້າສູ່ລະດູຝົນອໍານວຍໃຫ້ແກ່ການປູກພືດໂດຍປີນີ້ບັນດາຂະແໜງການລັດ, ພາກທຸລະກິດເອກະຊົນ, ຄອບຄົວ-ບຸກຄົນ ກໍໄດ້ລົງມືປູກຕາມເງື່ອນໄຂຕົວຈິງຂອງໃຜລາວທ່າມກາງສະພາບລະບາດຂອງພະຍາດໂຄວິດ-19 ທີ່ຮວ້າຍລົງ. ຄວາມຈິງແລ້ວ,ການປູກໄມ້ ຂໍໃຫ້ຖືເປັນພັນທະຂອງພົນລະເມືອງຕໍ່ຊາດ ເພື່ອສ້າງເນື້ອທີ່ປ່າປົກຫຸ້ມໃຫ້ຫລາຍ, ຢ່າງໜ້ອຍກໍປູກເປັນຮົ່ມເງົາ, ປະດັບເອ້ເຮືອນຊານ ໄຮ່ນາຮົ້ວສວນໃຫ້ສວຍງາມ ລວມທັງບັນດາຕົ້ນໄມ້ໃຫ້ໝາກທັງຫລາຍທີ່ໄດ້ໃຊ້ຫລາຍປະໂຫຍດ ແລະ ເຖິງວ່າມື້ປູກໄມ້ກໍານົດໄວ້ເປັນທາງການມື້ດຽວວັນທີ 1 ມິຖຸນາ ຊຶ່ງໃນຕົວຈິງ ພວກເຮົາສາມາດປູກໄດ້ຕະຫລອດປີ, ແຕ່ຍາມທີ່ດີແທ້ກໍຍັງແມ່ນລະດູຝົນເພາະດິນຟ້າອາກາດອໍານວຍກວ່າລະດູແລ້ງ.

ກ່ອນເຖິງວັນທີ 1 ມິຖຸນາ ເຫັນຫລາຍເຂດຫລາຍແຂວງຈັດພິທີປູກຕົ້ນໄມ້ຢ່າງຄຶກຄັກຕາມເງື່ອນໄຂເນື້ອ ທີ່ດິນ ແລະ ອື່ນໆ ຊຶ່ງເຫັນວ່ານີ້ຄືຄວາມຕື່ນຕົວ ແລະ ການເຫັນໄດ້ຄວາມສໍາຄັນຂອງການປູກຕົ້ນໄມ້ ທີ່ເປັນມູນເຊື້ອດີງາມຂອງພວກເຮົາ. ເມື່ອເຫັນຂ່າວຄາວ ແລະ ພາບດັ່ງກ່າວແລ້ວກໍດີໃຈທີ່ການປູກໄມ້ໄດ້ກາຍເປັນກິດຈະກໍາທີ່ທຸກຄົນໃຫ້ຄວາມສໍາຄັນ ແລະ ປະກອບສ່ວນສ້າງເນື້ອທີ່ສີຂຽວໃນຂອບເຂດທົ່ວປະ ເທດ. ແນວໃດກໍດີ ຜ່ານມາມັກຈະເຫັນ ແລະ ໄດ້ຍິນຫາງສຽງຂອງສັງຄົມວ່າ ປູກແລ້ວ ກໍໃຫ້ເອົາໃຈໃສ່ບົວລະບັດ ເສຍຫຍ້າຂ້າແມງໄມ້…ຕະຫລອດແດ່ ເພື່ອຮັບປະກັນໃຫ້ມັນລອດ ແລະ ບໍ່ຫວນກັບໄປປູກຢູ່ຂຸມເກົ່າອີກ. ອີກຈຸດໜຶ່ງທີ່ໜ້າຈະແກ້ໄຂໃຫ້ໄດ້ຢ່າງຂາດໂຕມາດົນແລ້ວຄືຢູ່ບ້ານເຮົາເມືອງເຮົາບໍ່ເວັ້ນແຕ່ນະຄອນຫລວງຂອງປະເທດຍັງເຫັນມີການປ່ອຍສັດລ້ຽງ ຊຶ່ງຕ້ອງເຮັດຮົ້ວເຮັດຮາວຄັກແນ່ ຫລືວ່າ ຕ້ອງເອົາໃຈໃສ່ບົວລະບັດຮັກສາອີຫລີ.

ການປູກໄມ້ ສາມາດປູກໄດ້ຕະຫລອດລະດູຝົນ ແລະ ຕະຫລອດປີ ຕາມເງື່ອນໄຂຂອງໃຜລາວ, ສໍາຄັນເຮັດແນວໃດປູກແລ້ວໃຫ້ມັນໃຫຍ່ໃຫ້ມັນຂຽວສົດງົດງາມກາຍເປັນຮົ່ມເງົາ, ໃຫ້ໝາກ ແລະ ໃຊ້ປະໂຫຍດໄດ້ໃນອະນາຄົດ ແລະ ເພື່ອອະນາຄົດຂອງລູກຫລານໂດຍທຸກຄົນຕ້ອງໄດ້ຮ່ວມກັນປູກ.