ກຽມກໍ່ສ້າງທາງປູຢາງ 2 ຊັ້ນ ຢູ່ 3 ບ້ານຂອງ ເມືອງຮົ່ມ ແຂວງໄຊສົມບູນ ມູນຄ່າ 191 ຕື້ກວ່າກີບ
ວັນທີ 27 ພຶດສະພາ 2022 ພະແນກໂຍທາທິການ ແລະ ຂົນສົ່ງແຂວງ ໄດ້ມີການເຊັນສັນຍາ ບໍລິສັດເອກະຊົນ ໃນໂຄງການກໍ່ສ້າງທາງປູຢາງ 2 ຊັ້ນ ຢູ່ 3 ບ້ານ ຄືບ້ານຜາລະແວກ, ບ້ານ ນໍ້າປຸງ ແລະ ບ້ານພູກະທະເມືອງຮົ່ມ ຄວາມຍາວກວ່າ 28 ກິໂລແມັດ ເຂົ້າຮ່ວມໂດຍ ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ພ້ອມດ້ວຍພາກສ່ວນກ່ຽວຂ້ອງ.
ໂຄງການກໍ່ເສັ້ນທາງ ດັ່ງກ່າວນີ້ ມີລາຍລະອຽດທາງຄື: ມີຄວາມຍາວ 28,40 ກິໂລແມັດ ໜ້າທາງກວ້າງ 6 ແມັດ, ປູຢາງ 2 ຊັ້ນ ໂຄງການຈະໃຊ້ເວລາກໍ່ສ້າງ 3 ປີ ຫຼ 36 ເດືອນ ໂດຍ ມີມູນຄ່າ 191 ຕື້ກວ່າກີບ ແລະ ໃນເສັ້ນທາງຈະມີກໍ່ສ້າງຂົວເບຕົງອັດແຮງເສີມເຫຼັກ 2 ແຫ່ງຍາວ 58 ແມັດພ້ອມດ້ວຍລະບົບລະບາຍນໍ້າຄົບຊຸດ ເຊິ່ງຈະເລີ່ມລົງມືແຕ່ພາຍຫຼັງເຊັນສັນຍາເປັນຕົ້ນໄປ.
ເປົ້າໝາຍເພື່ອເປັນການພັດທະນາພື້ນຖານໂຄງລ່າງສຳຄັນຕໍ່ການພັດທະນາເສດຖະກິດ-ສັງຄົມ, ສົ່ງເສີມການຄ້າ, ການລົງທຶນ ແລະການທ່ອງທ່ຽວຂອງ ແຂວງໄຊສົມບູນ ໂດຍສະເພາະເມືອງຮົ່ມ ທັງເຮັດໃຫ້ຊີວິດການເປັນຢູ່ຂອງປະຊາຊົນທີ່ດຳລົງຊີວິດຢູ່ຕາມເສັ້ນທາງ ແລະ ອ້ອມຂ້າງ ສະດວກສະບາຍ ແລະ ນັບມື້ນັບດີຂຶ້ນ ເພາະວ່າ ເສັ້ນທາງນີ້ເປັນເສັ້ນທາງຫຼວງຂອງເມືອງ, ເປັນປາຍແຫຼມຂອງການພັດທະນາເສດຖະກິດ-ສັງຄົມລວມທັງເປັນເສັ້ນທາງເຊື່ອມຕໍ່ຈາກແຂວງໄຊສົມບູນຫາແຂວງບໍລິຄຳໄຊ.
