ມົ້ວສຸມຢາເສບຕິດ ຖືກນຳຕົວມາສຶກສາອົບຮົມ

ເພຈຂ່າວ ປກສ ນະຄອນຫລວງວຽງຈັນລາຍງານໃຫ້ຮູ້ວ່າ: ວັນທີ 26 ພຶດສະພາ 2022, ພັທ ສົມໄຊ ສຸລິພົນ ຫົວໜ້າ ປກສ ກຸ່ມໂພນເຄັງ ເມືອງໄຊເສດຖາ ນະຄອນຫລວງວຽງຈັນ ໄດ້ນໍາເອົາ ກຸ່ມມົ້ວສຸມຢາເສບຕິດ ຢູ່ຕະຫລາດເກົ່າເຂດບ້ານ ວຽງຈະເລີນ ເປັນຈຸດບ່ອນພັກເຊົາ ແລະ ມົ້ວສຸມ ຈໍານວນ 4 ຄົນ. ກຸ່ມຄົນດັ່ງກ່າວນີ້ ບໍ່ມີບ່ອນຢູ່ທີ່ແນ່ນອນ ມາສຶກສາອົບຮົມ ໃຫ້ປ່ຽນພຶດຕິກຳການເຄື່ອນໄຫວທີ່ຜິດຕໍ່ລະບຽບການດຳລົງຊີວິດຂອງສັງຄົມ. ທັງ4ຄົນ ບໍ່ມີວຽກເຮັດງານທຳ, ຄອບຄົວຂາດເຂີນ, ຈິ່ງເຮັດໃຫ້ພວກກ່ຽວເຂົ້າໄປຫຍຸ້ງກ່ຽວກັບຢາເສບຕິດ, ຜ່ານມາເຄີຍຖືກກ່າວເຕືອນມາແລ້ວ 1 ຄັ້ງ ແຕ່ບໍ່ມີການປ່ຽນແປງ ຈິ່ງໄດ້ນຳຕົວມາສືກສາອົບຮົມເປັນຄັ້ງທີ 2 ໂດຍຍົກໃຫ້ເຫັນຜົນຮ້າຍໄພອັນຕະລາຍຂອງຢາເສບຕິດ ທີ່ສົ່ງຜົນກະທົບຕໍ່ຕົນເອງ, ຄອບຄົວ-ສັງຄົມ ແລະ ປະເທດຊາດ.

ການສຶກສາອົບຮົມ ແມ່ນຈັດຂຶ້ນ ຢູ່ຫ້ອງການ ປກສ ກຸ່ມໂພນເຄັງ, ໂດຍມີຕາງໜ້າອໍານາດການປົກຄອງບ້ານໂພນເຄັງ ແລະ ພາກສ່ວນກ່ຽວຂ້ອງ ເຂົ້າຮ່ວມ.