ຈີນພ້ອມປົກປ້ອງ ສປປ ເກົາຫລີ ຖ້າອາເມລິກາຖະຫລົ່ມກ່ອນ
ສື່ຂອງລັດຖະບານປັກກິ່ງຢືນຢັນວ່າ: ຈີນຈະປົກປ້ອງ ສປປ ເກົາຫລີ ໃນກໍລະນີທີ່ຕົກເປັນຝ່າຍຖືກໂຈມຕີກ່ອນຈາກອາເມລິກາ ແລະ ສ.ເກົາຫລີ, ແຕ່ຖ້າລັດຖະບານພຽງຢາງເປັນຝ່າຍເປີດສາກໂຈມຕີອາເມລິກາ, ຈີນຈະຢູ່ໃນສະຖານະເປັນກາງ.
ສຳນັກຂ່າວຕ່າງປະເທດລາຍງານຈາກນະຄອນຫລວງປັກກິ່ງ ປະເທດຈີນ ໃນວັນທີ 11 ສິງຫາວ່າ: ບົດບັນນາທິການໃນສະບັບວັນທີ 11 ສິງຫາ ຂອງໜັງສືພິມເດິ ໂກລບອນ ທາມ ເຊິ່ງເປັນໜຶ່ງໃນສື່ສິ່ງພິມກະບອກສຽງຂອງພັກກອມມູນິດຈີນ ລະບຸວ່າລັດຖະບານປັກກິ່ງບໍ່ສາມາດຊັກຊວນໃຫ້ອາເມລິກາ ແລະ ສປປ ເກົາຫລີ ຍອມຫລຸດຜ່ອນທ່າທີແຂງແກ່ນໄດ້. ເຖິງຢ່າງໃດກໍຕາມ, ຖ້າການກະທຳຂອງທັງສອງຝ່າຍເປັນອັນຕະລາຍຕໍ່ຜົນປະໂຫຍດຂອງຈີນ, ລັດຖະບານປັກກິ່ງຈະຕອບໂຕ້ເຖິງທີ່ສຸດ ພ້ອມທັງເຕືອນວ່າ: ແຫລມເກົາຫລີຖືເປັນໜຶ່ງໃນພື້ນທີ່ສຳຄັນທາງຍຸດທະສາດທີ່ເປັນສູນກາງຂອງຜົນປະໂຫຍດດ້ານຄວາມໝັ້ນຄົງ ແລະ ບໍ່ສົມຄວນມີຝ່າຍໃດຝ່າຍໜຶ່ງຕັ້ງຕົວເປັນໃຫຍ່ພຽງຜູ້ດຽວ.
ນອກຈາກນີ້, ຖ້າ ສປປ ເກົາຫລີ ເປັນຝ່າຍຍິງລູກສອນໄຟໂຈມຕີອາເມລິກາກ່ອນ ແລະ ຜະເຊີນກັບການຕອບໂຕ້ຈາກອີກຝ່າຍ, ຈີນຈະວາງຕົວເປັນກາງ. ແຕ່ໃນກໍລະນີອາເມລິກາ ແລະ ສ.ເກົາຫລີ ໃຊ້ກຳລັງທາງທະຫານກັບ ສປປ ເກົາຫລີ ແລະ ພະຍາຍາມລົ້ມລ້າງອຳນາດລັດຖະບານພຽງຢາງ ຕາມດ້ວຍການປ່ຽນແປງຮູບແບບການເມືອງ ຢູ່ແຫລມເກົາຫລີ, ລັດຖະບານປັກກິ່ງຈະຂັດຂວາງບໍ່ໃຫ້ເກີດຂຶ້ນ. ທັງນີ້ ສປປ ເກົາຫລີ ປຽບໄດ້ດັ່ງລັດກັນຊົນຂອງຈີນຈາກ ສ.ເກົາຫລີ ເຊິ່ງເປັນສະຖານທີ່ຕັ້ງຂອງຖານທັບອາເມລິກາ ຕະຫລອດຮອດຍີ່ປຸ່ນທີ່ຢູ່ຫ່າງອອກໄປອີກເບື້ອງໜຶ່ງຂອງທະເລ, ສ່ວນສຳນັກຂ່າວຊິນຮົວເຕືອນຍີ່ປຸ່ນຢ່າໃຊ້ສະຖານະການຢູ່ແຫລມເກົາຫລີເປັນຂໍ້ອ້າງໃນການເສີມສ້າງແສນຍານຸພາບທາງທະຫານ.
ເຖິງຢ່າງໃດກໍຕາມ, ມີການວິເຄາະວ່າ: ການທີ່ຈີນຍັງບໍ່ສະແດງທ່າທີຢ່າງເປີດເຜີຍຕໍ່ບັນຍາກາດເຄັ່ງຕຶງຮອບຫລ້າສຸດຢູ່ແຫລມເກົາຫລີໃນຄັ້ງນີ້ ທີ່ອາເມລິກາ ແລະ ສປປ ເກົາຫລີ ຕ່າງຂົ່ມຂູ່ຈະໂຈມຕີກັນດ້ວຍລູກສອນໄຟ ເປັນເພາະລັດຖະບານປັກກິ່ງມີເລື່ອງສຳຄັນກວ່າໃນຕອນນີ້ ນັ້ນຄືການກຽມສຳລັບກອງປະຊຸມໃຫຍ່ຄະນະກຳມະການກາງພັກກອມມູນິດ ໃນເດືອນຕຸລານີ້.
