ຄົນລາວ ເຮົາເສຍຊີວິດ ຍ້ອນພະຍາດທີ່ເກີດຈາກການສູບຢາ ປະມານ 7.000 ຄົນ/ປີ ແລະ ສະເລຍມີຜູ້ເສຍຊີວິດຍ້ອນ 19 ຕໍ່ມື້
ທ່ານ ດຣ ພອນປະເສີດ ອຸນາພົມ ຫົວຫນ້າກົມອະນາໄມ ແລະ ສົ່ງເສີມສຸຂະພາບ ໃຫ້ສໍາພາດວັນທີ 25 ພຶດສະພາ 2022 ຜ່ານມາ ວ່າ: ວັນທີ 31 ພຶດສະພາ ຂອງທຸກໆປີແມ່ນວັນຕ້ານການສູບຢາໂລກ (World No tobacco day) ສະນັ້ນໃນວັນດັ່ງກ່າວຄົນທັງ ໂລກຈົ່ງໄດ້ມີການສໍາມະນາເຜີຍແຜ່ເພື່ອໃຫ້ຄົນໄດ້ເຂົ້າໃຈເຖິງຜົນຮ້າຍຂອງການສູບຢາ ແລະ ຫຼຸດຜ່ອນການສູບຢາກໍລະນີໃໝ່ໃຫ້ໜ້ອຍລົງ ແລະ ຫຼຸດຜ່ອນອັດການເຈັບເປັນ ແລະ ການຕາຍຍ້ອນຜົຍຮ້າຍຂອງຢາສູບ ຄົນລາວ ເຮົາເສຍຊີວິດ ຍ້ອນພະຍາດທີ່ເກີດຈາກການສູບຢາ ປີໜຶ່ງປະມານ 7.000 ຄົນ ແລະ ສະເລຍມີຜູ້ເສຍຊີວິດຍ້ອນ 19 ຕໍ່ມື້ ຢາສູບເປັນສາເຫດການຕາຍດ່ຽວອັນດັບ 1 ຂອງຄົນໃນໂລກ ມີຜູ້ເສຍ ຊີວິດປະມານ 8 ລ້ານຄົນຕໍ່ປີ ຖ້າບໍ່ມີການຄວບຄຸມທີ່ມີປະສິດທິຜົນການຕາຍນີ້ຈະເພີ້ມຂຶ້ນເປັນ 2 ເທົ່າ ຫຼື ປະມານ 1 ຕື້ຄົນ ພາຍໃນ ສັດຕະວັດນີ້.
ການສໍາຫຼວດການສູບຢາ ປີ 2012 ຄົນລາວ ສູບຢາ 25% ແລະ ເພີ່ມຂຶ້ນເປັນ 28% ໃນປີ 2015 ໃນນັ້ນແມ່ນເພດຍົງຢູ່ປະມານ 07-08% ສ່ວນການສູບຢາຂອງໄວໜຸ່ມພົບວ່າການສູບຢາສູບໄຟຟ້າກໍາລັງມາແຮງເຊິ່ງເປັນຍຸດທະວິທີໃໝ່ຂອງບໍລິສັດຢາສູບທີ່ດຶງດູດລໍ້ລວງຈົດໃຈຂອງຄົນໄວໜຸ່ມໃຫ້ມີຄວາມຫຼົງໃຫຼ ກັບ ອຸປະກອນການສູບທີ່ທັນສະໄຫມ ແລະ ຍັງເຂົ້າໃຈຜິດວ່າ ບໍ່ແມ່ນຢາສູບຈາກການສໍາຫຼວດໄວໜຸ່ມພົບວ່າໄວໜຸ່ມຊາຍສູບຢາສູບໄຟຟ້າ 05% ໄວໜຸ່ມຍົງ 3,7% (2016) ຜົນຮ້າຍຂອງຢາສູບ ກໍ່ໃຫ້ເກີດພະຍາດຮ້າຍແຮງຕ່າງໆນໍາໄປສູ່ການເຈັບປ່ວຍຊໍາເຮືອ ແລະ ເສຍຊີວິດກ່ອນໄວອັນຄວນ ເປັນຈໍານວນຫຼາຍໃນແຕ່ລະວັນ ເຊັ່ນ: ມະເຮັງ 16 ອະໄວຍະວະໃນຮ່າງກາຍພະຍາດ ຫົວໃຈເສັ້ນເລືອດປອດຊໍາເຮື້ອເບົາຫວານຄວາມດັນເລືອດສູງວັນນະໂລກກະດູກຜ່ອຍ ແລະ ອື່ນໆ.
ກົດໝາຍສະບັບໃໝ ໄດ້ປັບປຸງເນື້ອໃນຫຼັກໂດຍເລັ່ງໃສ່ໃຫ້ມີການຫຼຸດຜ່ອນການສູບຢາ: ຍ້າຍບ່ອນອະນຸຍາດສູບຢາ ອອກຈາກອາຄານ ທັງໝົດຕິດປ້າຍຄໍາເຕືອນ ພ້ອມສະຫຼາກ 75% ໃສ່ຊອງຢາສູບ ລາຍງານສ່ວນປະກອບ ສ່ວນປະສົມ ເເລະ ສານທີ່ເກີດຈາກການເຜົາໄໝ້ຂອງ ຢາສູບແຕ່ລະຍີ່ຫໍ້ໃຫ້ກະຊວງສາທາລະນະສຸກ ເພື່ອເປີດເຜີຍຕໍ່ປະຊາຊົນຜູ້ທີ່ຊົມໃຊ້ ໃຫ້ຮູ້ເຖິງໄພອັນຕະລາຍທີ່ຈະເກົດຕໍ່ສຸຂະພາບ ຜູ້ຂາຍ ຍົກ-ຂາຍຍ່ອຍຕ້ອງໄດ້ຮັບອະນຸຍາດໃນຂະແໜງອຸດສາຫະກໍາ ປົກປົດບໍ່ໃຫ້ເຫັນຊອງຢາສູບເວລາຂາຍຢູ່ຫນ້າຮ້ານ ຫ້າມຜະລິດ, ນໍາເຂົ້າ-ສົ່ງອອກສົ່ງຜ່ານຊື້ຂາຍຢາສູບຮູບ ແບບໃໝ່ ຫ້າມການໂຄສະນາທຸກຮູບແບບຫ້າມການສ້າງຕັ້ງໂຮງງານ-ຂຶ້ນມາໃໝ່ຫ້າມເດັກທີ່ມີອາຍຸຕໍ່າ ກວ່າ 18 ປີຊົມໃຊ້ຢາສູບ.
ສະນັ້ນ ໃນໂອກາດວັນຕ້ານຢາສູບໂລກ ຂ້າພະເຈົ້າຂໍຮຽກຮ້ອງມາຍັງທຸກພາກສ່ວນທົ່ວສັງຄົມທັງພາກລັດ ແລະ ເອກະຊົນ ລວມທັງຫົວໜ່ວຍ ທຸລະກົດຢາສູບ ພ້ອມກັນເອົາໃຈໃສ່ປະກອບສ່ວນເຂົ້າໃນການຈັດຕັ້ງປະຕິບັດກົດໝາຍສະບັບນີ້ໃຫ້ມີປະສິດທິພາບ ແລະ ປະສິດທິຜົນ.
