ນະຄອນຫຼວງວຽງຈັນ ວາງແຜນປູກຕົ້ນໄມ້ໃຫ້ໄດ້ 400 ກວ່າເຮັກຕາ ໃນປີນີ້
ປີນີ້ນະຄອນຫຼວງວຽງຈັນ ວາງແຜນປູກຕົ້ນໄມ້ໃຫ້ໄດ້ 400 ກວ່າເຮັກຕາ ໃນໂອກາດວັນປູກຕົ້ນໄມ້ແຫ່ງຊາດວັນທີ 1 ມິຖຸນາ ໂດຍເນັ້ນໜັກໃສ່ປະເພດໄມ້ປະດັບ ແລະ ໄມ້ເສດຖະກິດທີ່ຕະຫຼາດມີຄວາມຕ້ອງການສູງ.
ທ່ານ ສີເມືອງ ສຸດທິວົງນໍລາດ ຫົວໜ້າຂະແໜງປ່າໄມ້ ພະແນກກະສິກໍາ ແລະ ປ່າໄມ້ນະຄອນຫຼວງວຽງຈັນໃຫ້ສຳພາດຜ່ານວິທະຍຸກະຈາຍສຽງແຫ່ງຊາດ ວັນທີ 25 ພຶດສະພາ 2022 ຜ່ານມານີ້ວ່າ: ໃນປີ 2022 ນີ້ ນະຄອນຫຼວງວຽງຈັນ ມີແຜນປູກຕົ້ນໄມ້ໃຫ້ໄດ້ 400 ກວ່າເຮັກຕາ ໂດຍຈະສຸມໃສ່ປູກໄມ້ປະດັບຕາມແຄມທາງສວນສາທາລະນະ 5 ເຮັກຕາ, ໄມ້ເສດຖະກິດທີ່ຕະຫຼາດຕ້ອງການເພື່ອເປັນສິນຄ້າ 300 ເຮັກຕາ ແລະ ປູກເພື່ອຟື້ນຟູປ່າຊຸດໂຊມ 100 ເຮັກຕາ ໂດຍມອບໃຫ້ 5 ຕົວເມືອງນອກ ທີ່ມີເນື້ອທີ່ປ່າໄມ້ກວມອັດຕາສ່ວນຫຼາຍເປັນຜູ້ຈັດຕັ້ງປະຕິບັດເຊັ່ນ: ເມືອງສັງທອງ, ປາກງື່ມ, ໄຊທານີ, ຫາດຊາຍຟອງ ແລະ ເມືອງນາຊາຍທອງ ມາຮອດປັດຈຸບັນການກະກຽມເບັ້ຍໄມ້ຕ່າງໆສໍາເລັດເກືອບທັງໝົດແລ້ວ.
ທ່ານ ສີເມືອງ ສຸດທິວົງນໍລາດ ໃຫ້ຮູ້ຕື່ມວ່າ: ສໍາລັບການສະເຫຼີມສະຫຼອງວັນປູກຕົ້ນໄມ້ແຫ່ງຊາດໃນປີນີ້ ຈະສຸມໃສ່ຈັດຕັ້ງປະຕິບັດນະໂຍບາຍ ສ ສີຂຽວຂອງນະຄອນຫຼວງວຽງຈັນ ແລະ ຍຸດທະສາດການເຕີບໂຕສີຂຽວແຫ່ງຊາດໃຫ້ມີປະສິດທິຜົນສູງຕາມຄໍາຂັວນ ປຸກຂະບວນການສີຂຽວເພື່ອສະເຫຼີມສະຫຼອງວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2022 ໂດຍສຸມໃສ່ພັດທະນາເສັ້ນທາງເລກທີ 11 ເໜືອ ແລະ ເສັ້ນທາງດອນກອຍ, ໜອງໄຮ ແລະ ເສັ້ນທາງຕັດໃໝ່ບ້ານຫ້ວຍຫົງ ຫາ ໂຮງໝໍແມ່ ແລະ ເດັກ ເປັນເສັ້ນທາງສີຂຽວ, ສ້າງສໍານັກງານ, ຫ້ອງການ, ໂຮງແຮມ, ໂຮງຮຽນ, ວັດສີຂຽວ ລວມເຖິງການປົກປັກຮັກສາປ່າທຳມະຊາດ, ປ່າສະຫງວນ.
