ມູຣິນໂຢ ຢືນຢັນບໍ່ຖິ້ມ ໂຣມາ ຫລັງຄວ້າແຊ໊ມຄອນເຟີເຣນລີກ

ໂຈເຊ ມູຣິນໂຢ ຢືນຢັນພ້ອມຄຸມ ໂຣມາ ຕໍ່ໄປແນ່ນອນໃນລະດູການຫນ້າ ຫລັງພາທີມຄວ້າແຊ໊ມບັນລັງແຊ໊ມ ຢູໂຣປາ ຄອນເຟີເຣນ ລີກ ໄດ້ສຳເລັດ.

ໂຈເຊ ມູຣິນໂຢ ຍອດຜູ້ຈັດການທີມຊາວໂປຮຕຸເກສ ຢືນຢັນຈະບໍ່ຫນີ ໂຣມາ ຕົ້ນສັງກັດໃນເວທີ ກັລໂຊ ເຊເຣຍ ອາ ອິຕາລີ ແນ່ນອນໃນລະດູການຫນ້າ ຫລັງພາທີມ ໂຣມາ ຄວ້າແຊ໊ມ ຢູໂຣປາ ຄອນເຟີເຣນ ລີກ ມາຄອງໄດ້ເປັນທີມທຳອິດໃນປະຫວັດສາດ.

ໂຣມາ ຄວ້າແຊ໊ມລາຍການທຳອິດນັບຕັ້ງແຕ່ປີ 2008 ມາຄອງໄດ້ສຳເລັດ ຫລັງໂຄ່ນ ເຟເຢນູດ ຈາກ ຮອນແລນ ລົງໄດ້ຫວຸດຫວິດ 1-0 ໃນຮອບຊີງຊະນະເລີດທີ່ນະຄອນຕີຣານາ ປະເທດແອລເບເນຍ ເມື່ອຄືນວັນພຸດທີ່ຜ່ານມາ ໂດຍ ມູຣິນໂຢ ເຊື່ອວ່າ ແລະ ລູກທີມໄດ້ຂຽນປະຫວັດສາດຫນ້າໃຫມ່ໃຫ້ກັບທີມ ໂຣມາ ຮຽບຮ້ອຍ.

ມູຣິນໂຢ ເຊິ່ງສ້າງປະຫວັດສາດເປັນຜູ້ຈັດການທີມຄົນທຳອິດທີ່ຄວ້າແຊ໊ມຢູໂຣບໄດ້ຄົບທັງ 3 ລາຍການທີ່ຍັງແຂ່ງຂັນກັນຢູ່ໃນປັດຈຸບັນກ່າວວ່າ : ‘‘ ຂ້ອຍຈະຢູ່ກັບທີມຕໍ່ໄປແນ່ນອນ ມີຫລາຍຢ່າງຜ່ານເຂົ້າມາໃນຫົວຂອງຂ້ອຍຫລາຍໆຢ່າງໃນເວລາດຽວກັນ ຂ້ອຍຢູ່ກັບ ໂຣມາ ມາແລ້ວ 11 ເດືອນ ຂ້ອຍຮູ້ຕັ້ງແຕ່ຄັ້ງທຳອິດທີ່ມາເຖິງທີ່ນີ້ວ່າມັນຄືຊະຕາຟ້າລິຂິດພວກເຂົາພວມຖ້າສິ່ງນີ້ ’’.

‘‘ ຄືກັບທີ່ຂ້ອຍບອກກັບທີມໃນຫ້ອງແຕ່ຕົວທີ່ຕູຣິນ ເຮົາເຮັດໃນສິ່ງທີ່ເຮົາຈຳເປັນຕ້ອງເຮັດ ນັ້ນຄືການຜ່ານເຂົ້າໄປຫລິ້ນໃນຢູໂຣປາ ລີກ ເຮົາເຮັດວຽກໄດ້ຢ່າງສຸດຍອດຕະຫລອດລະດູການ ຄືນນີ້ບໍ່ແມ່ນການເຮັດວຽກ ນີ້ຄືປະຫວັດສາດ ເຮົາຕ້ອງຂຽນປະຫວັດສາດຂຶ້ນມາ ແລະ ເຮົາກໍຂຽນມັນຂຶ້ນມາແລ້ວ ’’ ມູຣິນໂຢ ກ່າວ.