BBC ສືີ່ອັງກິດຂໍໂທດສະໂມສອນ ແມນຢູ ຫລັງຫລົງຂຶ້ນຂໍ້ຄວາມ “ແມນຢູທີມອ່ອນ” ໃນຂະນະອອກອາກາດ
May 25, 2022 - 9:14 AM
ຄວາມຜິດພາດສາມາດເກີດຂຶ້ນໄດ້ທຸກເວລາ ແລະ ເກີດຂຶ້ນໄດ້ກັບທຸກຄົນ. ບໍ່ເວັ້ນແຕ່ສື່ຊັ້ນນຳຂອງໂລກຢ່າງ BBC ທີ່ຜິດພາດຫລົງກ່າວຫາ ແມນເຊັສເຕີ ຢູໄນເຕັດ ໃນລະຫວ່າງການອອກຂ່າວສົດທາງໂທລະພາບຈົນຕ້ອງຟ້າວອອກມາຂໍໂທດໃນທັນທີ.
ເລື່ອງລາວເກີດຂຶ້ນ ໃນຂະນະທີ່ BBC ກຳລັງນຳສະເໜີຜົນການແຂ່ງຂັນເທັນນິສ ຝຣັ່ງ ໂອເພັນ ລະຫວ່າງ ຄາເມຣອນ ນໍຣີ ເອົາຊະນະ ມານູເອວ ກີນາດ 3-0 ເຊັດ ເມື່ອຕອນເຊົ້າວັນພຸດ (24 ພຶດສະພາ) ເວລາ 09:35 ໂມງ ຕາມເວລາທ້ອງຖິ່ນ. ເຊິ່ງໃນເວລານັ້ນ, ຂໍ້ຄວາມຢູ່ດ້ານລຸ່ມຂອງຫນ້າຈໍປະກົດວ່າ “Manchester United are rubbish” ຫລືແປວ່າ “ແມນ ຢູໄນເຕັດ ເປັນທີມທີ່ອ່ອນ” ໂດຍຂໍ້ຄວາມທີ່ວ່ານີ້ບໍ່ກ່ຽວຂ້ອງກັບຂ່າວທີ່ນຳສະເໜີມາແຕ່ຢ່າງໃດ
ເບິ່ງຄລິບ :
ຫຼັງຈາກນັ້ນບໍ່ດົນ, BBC ກໍ່ໄດ້ອອກມາຂໍໂທດຕໍ່ ແມນເຊັສເຕີ ຢູໄນເຕັດ ໂດຍຜູ້ປະກາດຂ່າວ ແອນນິຕ້າ ແມດເວສ ໄດ້ກ່າວຄໍາຂໍໂທດຈາກ BBC ເຖິງສະໂມສອນໂດຍຜ່ານການຖ່າຍທອດສົດວ່າ “ຊ່ວງກ່ອນຫນ້ານີ້ ພວກເຈົ້າອາດຈະສັງເກດເຫັນບາງສິ່ງບາງຢ່າງທີ່ຜິດປົກກະຕິຢູ່ໃນຂໍ້ຄວາມ ticker ທີ່ແລ່ນຢູ່ດ້ານລຸ່ມຂອງຫນ້າຈໍທີ່ພ້ອມຂ່າວ ເທັນນິສ ແຕ່ກ່າວເຖິງ ແມນເຊັສເຕີ ຢູໄນເຕັດ ແລະ ຂ້ອຍຫວັງວ່າແຟນ ແມນ ຢູໄນເຕັດ ຈະບໍ່ໂກດແຄ້ນກັບສິ່ງທີ່ເກີດຂຶ້ນ.”
“ຂ້ອຍຂໍອະທິບາຍສິ່ງທີ່ເກີດຂື້ນໃນຂະນະນັ້ນ ໃນທີມງານທີ່ຢູ່ເບື້ອງຫລັງມີຄົນທີ່ກໍາລັງຝຶກຮຽນຮູ້ວິທີການຍິງຂໍ້ຄວາມເພື່ອການອອກອາກາດສົດ ດັ່ງນັ້ນພວກເຂົາພຽງແຕ່ຂຽນແບບສຸ່ມ ບໍ່ໄດ້ຈິງຈັງ ກ່ອນທີ່ມັນຈະປາກົດຂຶ້ນ. ພວກເຮົາຂໍອະໄພຖ້າຫາກທ່ານໄດ້ເຫັນ ແລະ ເຮັດໃຫ້ທ່ານຜິດຫວັງ, ໂດຍສະເພາະແມ່ນແຟນ ແມນເຊັສເຕີ ຢູໄນເຕັດ”
“ແນ່ນອນວ່ານັ້ນແມ່ນຄວາມຜິດພາດ ແລະ ບໍ່ໄດ້ຕັ້ງໃຈໃຫ້ປາກົດຢູ່ເທີງໜ້າຈໍ. ສໍາລັບສິ່ງທີ່ເກີດຂຶ້ນ ພວກເຮົາຕ້ອງການທີ່ຈະອະທິບາຍໃຫ້ຜູ້ຊົມໄດ້ຮັບຮູ້ເປັນສິ່ງທີ່ດີທີ່ສຸດ.”
ຄລີບກ່າວຂໍໂທດ ແມນເຊັສເຕີ ຢູໄນເຕັດ :
