ຊົວເຣສ ບໍ່ເຄີຍຄິດເລື່ອງຍ້າຍທີມຈາກ ແອັດມາດຣິດ ຫລັງຕົ້ນສັງກັດບໍ່ຕໍ່ສັນຍາ

ຫລຸຍ ຊົວເຣສ ດາວຍິງປະສົບການຫລາຍທີມຊາດອຸຣຸໄກວ ເປີດເຜີຍບໍ່ເຄີຍຄິດຢາກອຳລາ ແອັດເລຕີໂກ ມາດຣິດ ຫລັງບໍ່ໄດ້ຮັບການຕໍ່ສັນຍາ ແລະຕ້ອງເກັບເຄື່ອງຂອງອອກຈາກທີມໃນລະດູການນີ້ ພ້ອມເຜີຍວ່າ ໄດ້ຮັບແຈ້ງວ່າຕ້ອງໄປ ກ່ອນມີການປະກາດເລື່ອງການບໍ່ຕໍ່ສັນຍາພຽງມື້ດຽວ.

ຫລຸຍ ຊົວເຣສ ກອງຫນ້າປະສົບການຫລາຍຂອງ ແອັດເລຕີໂກ ມາດຣິດ ທີມໃນລາລີກາ ສະເປນ ອອກມາເຜີຍວ່າ ລາວບໍ່ເຄີຍຄິດຢາກອຳລາທີມ, ຫລັງຍອດທີມຈາກສະເປນຕັດສິນໃຈບໍ່ຕໍ່ສັນຍາກັບລາວ ສົ່ງຜົນໃຫ້ດາວຍິງທີມຊາດອຸຣຸໄກວຈະກາຍເປັນນັກເຕະບໍ່ມີສັງກັດໃນໄລຍະລະດູການນີ້ ພ້ອມເຜີຍວ່າ ລາວບໍ່ໄດ້ຮັບແຈ້ງວ່າຈະບໍ່ໄດ້ຮັບການຕໍ່ສັນຍາ ກ່ອນຈະມີການປະກາດເລື່ອງນີ້ຢ່າງເປັນທາງການພຽງ 1 ມື້ເທົ່ານັ້ນ.

ຊົວເຣສ ເຜີຍຜ່ານ ‘‘ ເອລ ລາກົວໂຣ ’’ ສະຖານີວິທະຍຸຊື່ດັງໃນສະເປນວ່າ : ‘‘ ຂ້ອຍຢາກຢູ່ກັບທີມຕໍ່ໄປ ແຕ່ຜູ້ອຳນວຍການດ້ານການສື່ສານຂອງສະໂມສອນ ແຈ້ງຂ້ອຍມາວ່າ ຂ້ອຍຈະບໍ່ໄດ້ຮັບການຕໍ່ສັນຍາ ກ່ອນທີ່ມັນຈະຖືກປະກາດຢ່າງເປັນທາງການພຽງມື້ດຽວເທົ່ານັ້ນ ຂ້ອຍກໍເລີຍໄດ້ແຕ່ຄິດວ່າມັນກໍຍັງດີທີ່ມີໃຜຈັກຄົນ ມາບອກເລື່ອງເຫລ່ົານີ້ໃຫ້ຂ້ອຍຮູ້ແດ່ ຂ້ອຍໄດ້ລົມກັບ ດີເອໂກ ຊິເມໂອເນ ຜູ້ຈັດການທີມ ຫລື ຍັງ ? ຄຳຕອບຄືຍັງ ແລະຂ້ອຍບໍ່ລົມກັບ ອັນເດຣຍ ເບຕາ ຜູ້ອຳນວຍການສະໂມສອນຂອງ ແອັດ ມາດຣິດ ຫລື ຍັງ ? ຄຳຕອບຄືຍັງເຊັ່ນດຽວກັນ ’’.