ປະທານຟີຟາ ຄາດບານໂລກ 2022 ຈະທຸບສະຖິຕິຍອດຜູ້ຊົມ
ຈານນີ ອິນຟານຕີໂນ ປະທານສະຫະພັນບານເຕະນາໆຊາດ (FIFA) ຄາດວ່າ ບານເຕະໂລກ 2022 ທີ່ປະເທດກາຕ້າ ຈະມີຜູ້ຊົມທົ່ວໂລກເຖິງ 5,000 ລ້ານຄົນ ເຊິ່ງເປັນການທຸບສະຖິຕິຄົນເບິ່ງຂອງບານໂລກ.
ໂດຍການແຂ່ງຂັນບານເຕະໂລກ 2018 ທີ່ປະເທດຣັສເຊຍນັ້ນ ກາຍເປັນບານໂລກທີ່ມີຍອດຜູ້ຊົມຜ່ານໂທລະພາບຫລາຍທີ່ສຸດໃນປະຫວັດສາດ ດ້ວຍຈຳນວນປະມານ 3,500 ລ້ານຄົນທົ່ວໂລກ.
ແນວໃດກໍຕາມຫລ້າສຸດ ອິນຟານຕີໂນ ປະທານຟີຟາ ຄາດການວ່າບານໂລກ 2022 ລະຫວ່າງວັນທີ 21 ພະຈິກ – 18 ທັນວານີ້ ຈະກາຍເປັນບານໂລກຄັ້ງທຳອິດທີ່ຈັດໃນຕາເວັນອອກກາງຈະມີຍອດຜູ້ຊົມທຳລາຍສະຖິຕິດ້ວຍຈຳນວນປະມານ 5,000 ລ້ານຄົນ.
ຂະນະທີ່ຝ່າຍຈັດການແຂ່ງຂັນບານໂລກ 2022 ຍັງອອກມາຢ້ຳວ່າ ລາຍການດັ່ງກ່າວຍິນດີຕ້ອນກຸ່ມແຟນບານ ແລະ ນັກທ່ອງທ່ຽວເຊິ່ງເປັນບຸກຄົນທີ່ມີຄວາມຫລາກຫລາຍທາງເພດ (LGBT) ຫລັງມີລາຍງານວ່າ ກຸ່ມຄົນດັ່ງກ່າວອາດຖືກກີດກັນເນື່ອງຈາກການຮັກຮ່ວມເພດເປັນສິ່ງທີ່ຜິດກົດຫມາຍໃນປະເທດກາຕ້າ ແຕ່ຕ້ອງລະມັດລະວັງເລື່ອງການສະແດງຄວາມຮັກໃນບ່ອນສາທາລະນະ.
