ລູກໃນທ້ອງໃຫຍ່ຊ້າ ແລະ ມີນ້ຳໜັກໜ້ອຍຍ້ອນຫຍັງ ?
ເດັກນ້ອຍທີ່ເກີດອອກມາແລ້ວມີນຳ້ໜັກໂຕທີ່ໜ້ອຍກ່ວາ 2.277 ກຣາມ ຖືວ່າຕໍ່າກ່ວາເກນຕາມຄ່າສະເລ່ຍ ສາເຫດໜຶ່ງມາ ຈາກລູກໃຫຍ່ຊ້າຂະນະຢູ່ໃນທ້ອງ ເຊິ່ງອາດເຮັດໃຫ້ລູກມີພັດທະນາການທາງຮ່າງກາຍ ແລະ ຄວາມສາມາດໃນການຮຽນຮູ້ທີ່ຕໍ່າກ່ວາເດັກປົກກະຕິ.
– ລູກໃນທ້ອງໃຫຍ່ຊ້າ : ໝາຍເຖິງລູກທີ່ບໍ່ສາມາດຈະເລີນເຕີບໃຫຍ່ໄດ້ເຕັມສັກກະຍະພາບທີ່ຄວນຈະເປັນ, ລູກຈະໂຕນ້ອຍ ແລະ ນຳ້ໜັກໜ້ອຍກ່ວາອາຍຸ, ແຕ່ບໍ່ໄດ້ໝາຍຄວາມວ່າລູກທີ່ໂຕນ້ອຍ ແລະ ນຳ້ໜັກໜ້ອຍຈະເຕີບໃຫຍ່ຊ້າໃນທ້ອງທັງໝົດ ຫາກພໍ່ ແລະ ແມ່່ເປັນຄົນໂຕນ້ອຍ ລູກກໍອາດຈະໂຕນ້ອຍນຳ ເຖິງວ່າການຈະເລີນເຕີບໃຫຍ່ຈະປົກກະຕິກໍຕາມ.
+ ຈະຮູ້ໄດ້ແນວໃດວ່າລູກໃນທ້ອງເຕີບໃຫຍ່ຊ້າ : ແພດຈະກວດບົ່ງມະຕິວ່າແມ່ມີຄວາມສ່ຽງວ່າລູກໃນທ້ອງໃຫຍ່ຊ້າຫລືບໍ່ ຈາກການສອບປະຫວັດ ເຊັ່ນ :
– ແມ່ມີພະຍາດປະຈຳໂຕທີ່ກ່ຽວຂ້ອງຫລືບໍ່.
– ແມ່ເຄີຍຢູ່ໃນສະພາບເຕີບໃຫຍ່ຊ້າມາກ່ອນຫລືບໍ່.
– ນີ້ແມ່ນການຖືພາເທື່ອທຳອິດຫລືບໍ່.
– ແມ່ຖືພາກ່ອນອາຍຸ 19 ປີຫລືບໍ່.
– ແມ່ມີອາຍຸຫລາຍກ່ວາ 35 ປີຂຶ້ນໄປຫລືບໍ່.
– ແມ່ຖືພາຫລາຍກ່ວາ 5 ເທື່ອຫລືບໍ່.
+ ເບິ່ງຈາກນຳ້ໜັກຕາມອາຍຸຂອງການຖືພາ : ເດັກນ້ອຍເກີດໃໝ່ຈະມີນຳ້ໜັກສະເລ່ຍປະມານ 3 ກິໂລກຣາມ ແລະ ນຳ້ໜັກໂຕຂອງແມ່ຄວນເພີ່ມຂຶ້ນປະມານ 12 – 15 ກິໂລກຣາມຕະຫລອດການຖືພາ ທັງນີ້ບໍ່ໄດ້ໝາຍຄວາມວ່າແມ່ທີ່ນຳ້ໜັກເພີ່ມຂຶ້ນ 20 ກິໂລກຣາມ ແລ້ວລູກຈະໂຕໃຫຍ່ໄປນຳ, ແຕ່ຖ້າແມ່ນຳ້ໜັກຂຶ້ນຫລາຍໆ ແຕ່ລູກໂຕນ້ອຍ ກໍແມ່ນຍ້ອນສິ່ງທີ່ແມ່ກິນເຂົ້າໄປນັ້ນບໍ່ເຖິງລູກ, ແຕ່ກາຍໄປເປັນສ່ວນເກີນທີ່ແມ່ຍາກຈະຫລຸດລົງໄດ້ ເຖິງວ່າຈະເກີດລູກໄປດົນແລ້ວກໍຕາມ.
+ ເບິ່ງຈາກລະດັບຍອດມົດລູກຂອງແມ່ :
– ອາຍຸການຖືພາ 12 ອາທິດ ຍອດມົດລູກຈະຢູ່ເໜືອກະດູກຫົວເໜົ່າ ໂດຍແບ່ງສ່ວນທີ່ຕໍ່າກ່ວາສາຍບືເປັນ 3 ສ່ວນ.
– ອາຍຸການຖືພາ 16 ອາທິດ ຍອດມົດລູກຈະຢູ່ເໜືອກະດູກຫົວເໜົ່າປະມານ 1 ໃນ 3.
– ອາຍຸການຖືພາ 20 ອາທິດ ຍອດມົດລູກເລີ່ມສູງປະມານ 2 ໃນ 3 ເໜືອກະດູກຫົວເໜົ່າ.
– ອາຍຸການຖືພາ 24 ອາທິດ ຍອດມົດລູກຈະຢູ່ບ່ອນສາຍບືພໍດີ.
– ອາຍຸການຖືພາ 28 ອາທິດ ຍອດມົດລູກຈະສູງປະມານ 1 ໃນ 4 ເໜືອສາຍບື.
– ອາຍຸການຖືພາ 32 ອາທິດ ຍອດມົດລູກຈະສູງ 2 ໃນ 4.
– ອາຍຸການຖືພາ 36 ອາທິດ ຍອດມົດລູກຈະສູງ 3 ໃນ 4.
– ອາຍຸການຖືພາ 37 ອາທິດ ຍອດມົດລູດຈະຢູ່ສູງສຸດ 4 ໃນ 4.
– ຫາກເປັນການຖືພາເທື່ອທຳອິດເມື່ອຫົວເດັກເຂົ້າສູ່ຜົ້ງມົດລູກ ທ້ອງຈະເລີ່ມຫລຸດຕໍ່າລົງ.
+ ເບິ່ງຈາກການເອກໂກ : ແພດຈະເອກໂກໂດຍວັດແທກຂະໜາດຂອງອະໄວຍະວະສຳຄັນ ໄດ້ແກ່ : ຄວາມກ້ວາງຂອງຫົວ, ເສັ້ນຮອບວົງຫົວ, ເສັ້ນຮອບທ້ອງ, ຄວາມຍາວກະດູກກົກຂາ ເພື່ອນຳໄປສູ່ການບົ່ງມະຕິທີ່ຖືກຕ້ອງວ່າລູກໃນທ້ອງຢູ່ໃນສະພາບເຕີບໃຫຍ່ຊ້າຫລືບໍ່.
+ ສາເຫດທີ່ລູກໃນທ້ອງບໍ່ໃຫຍ່ເກີດຂຶ້ນໄດ້ຈາກ 3 ສາເຫດຫລັກ :
- ເກີດຈາກຄວາມຜິດປົກກະຕິຂອງແມ່ : ແມ່ມີພະຍາດປະຈຳຕົວ ເຊັ່ນ : ພະຍາດເບົາຫວານ, ຄວາມດັນເລືອດສູງ, ເຫລືອງຈືດ, ຫົວໃຈເຮັດວຽກຜິດປົກກະຕິ ເຮັດໃຫ້ການສົ່ງອົກຊີແຊນໄປຍັງລູກບໍ່ພຽງພໍ, ດື່ມເຫລົ້າລະຫ່ວາງການຖືພາ ເຮັດໃຫ້ລູກຜິດປົກກະຕິ, ພິການ, ປັນຍາອ່ອນໄດ້, ສູບຢາ ເຊິ່ງຈະມີຜົນເຮັດໃຫ້ແຮ່ເສ່ືອມໄວ, ຂາດອາຫານ, ນຳ້ໜັກໂຕໜ້ອຍ.
- ເກີດຈາກຄວາມຜິດປົກກະຕິຂອງລູກ : ໂກຣໂມໂຊມຜິດປົກກະຕິ ເຊັ່ນ : ປັນຍາອ່ອນ, ມີຄວາມພິການແຕ່ກຳເນີດ, ຖືພາລູກແຝດທີ່ເກີດຈາກໄຂ່ໜ່ວຍດຽວທີ່ມີການເຊື່ອມຕໍ່ຜິດປົກກະຕິຂອງຫລອດເລືອດ, ມີການຕິດເຊື້ອຕັ້ງແຕ່ຢູ່ໃນທ້ອງ.
- ເກີດຈາກຄວາມຜິດປົກກະຕິຂອງມົດລູກ, ສາຍແຮ່ ແລະ ສາຍບື : ມົດລູກມີຮູບຮ່າງຜິດປົກກະຕິ, ແຮ່ເສື່ອມ, ແຮ່ລອກໂຕບາງສ່ວນ, ແຮ່ຈັບຕໍ່າ, ມີຊີ້ນປົ່ງຂອງແຮ່, ສາຍບືພັນກັນ ຫລື ຜູກເປັນບ້ວງ ເຮັດໃຫ້ເລືອດໄປລ້ຽງລູກບໍ່ພຽງພໍ ລູກຈຶ່ງຈະເລີນເຕີບໃຫຍ່ໄດ້ບໍ່ເຕັມທີ່.
+ ຄວາມຮຸນແຮງຂອງບັນຫາລູກໃນທ້ອງບໍ່ໃຫຍ່ : ລູກໃນທ້ອງຈະເລີນເຕີບໃຫຍ່ຊ້າ ອັນຕະລາຍປານໃດຂຶ້ນຢູ່ກັບສາເຫດທີ່ເຮັດໃຫ້ລູກໃຫຍ່ຊ້າ ດັ່ງນີ້ :
– ຫາກເກີດຈາກແຮ່ເສື່ອມ ຫລື ແມ່ມີຄວາມດັນເລືອດສູງ, ຖືພາເກີນກຳນົດ ຫລື ລູກຂາດອົກຊີແຊນບໍ່ດົນ ເມື່ອເກີດອອກມາ ແລະ ໄດ້ຮັບອາຫານທີ່ພຽງພໍ ລູກກໍຈະສາມາດເຕີບໃຫຍ່ໄດ້ດີຄືເດັກປົກກະຕິ.
– ຫາກເກີດຈາກຄວາມຜິດປົກກະຕິຂອງໂກຣໂມໂຊມ ລູກອາດມີຊີວິດຫລັງເກີດ ຫລື ເສຍຊີວິດຫລັງເກີດ ຂຶ້ນຢູ່ກັບຄວາມຮຸນ ແຮງຂອງຄວາມຜິດປົກກະຕິນັ້ນ.
– ຫາກເກີດຈາກການຕິດເຊື້ອຕັ້ງແຕ່ຢູ່ໃນທ້ອງ ອາດເຮັດໃຫ້ລູກພິການແຕ່ກຳເນີດໄດ້.
+ ສາມາດປ້ອງກັນບໍ່ໃຫ້ລູກໃນທ້ອງໃຫຍ່ຊ້າໄດ້ຫລືບໍ່ : ແມ່ຄວນຫລີກເວັ້ນປັດໄຈສ່ຽງທີ່ສາມາດເຮັດໄດ້ ເຊັ່ນ : ການດື່ມເຄື່ອງດື່ມອານກໍຮໍ, ການສູບຢາ, ພຶດຕິກຳການກິນອາຫານ, ການພັກຜ່ອນ, ຄວາມເຄັ່ງຄຽດ, ລະມັດລະວັງເລື່ອງການຕິດເຊື້ອຕ່າງໆ ແລະ ຫາກມີພະຍາດປະຈຳໂຕກໍຕ້ອງປະຕິບັດຕາມຄຳແນະນຳຂອງແພດຢ່າງເຄັ່ງຄັດ.
