ທົດລອງໃຫ້ພະນັກງານຢຸດສົ່ງອີເມວເພື່ອຫລຸດຄວາມເຄັ່ງຄຽດ

ຕາມການລາຍງານຂ່າວຕ່າງປະເທດລະບຸວ່າ : ບໍລິສັດ ເຄື່ອງຖັກທໍ Gabel  ໃນແຂວງໂຄໂມ ເຂດລອມບາເດຍ ທາງພາກເໜືອຂອງປະເທດອີຕາລີ ໄດ້ທົດລອງໃຫ້ພະນັກງານຢຸດສົ່ງອີເມວສື່ສານກັບເພື່ອນຮ່ວມງານ ເປັນເວລາ 1 ອາທິດ ເພື່ອຫລຸດລະດັບຄວາມເຄັ່ງຄຽດຈາກການເຮັດວຽກ.

ບໍລິສັດໄດ້ໃຫ້ຜູ້ຊ່ຽວຊານມາສຳພາດພະນັກງານໃນອົງກອນກ່ຽວກັບສິ່ງທີ່ສ້າງຄວາມວິຕົກກັງວົນໃນການເຮັດວຽກຫລາຍທີ່ ສຸດ ເຊິ່ງລູກຈ້າງສ່ວນຫລາຍບອກວ່າການຈັດການກັບອີເມວໃນຈຳນວນມະຫາສານທີ່ພະນັກງານໃຊ້ສື່ສານກັນພາຍໃນອົງກອນເປັນພາລະຂອງການເຮັດວຽກໃນແຕ່ລະມື້ ດ້ວຍເຫດຜົນນີ້ຝ່າຍບໍລິຫານ ບໍລິສັດຈຶ່ງປະກາດອາທິດປອດອີເມວ ເຊິ່ງຈະດຳເນີນໄປຈົນເຖິງທ້າຍປີ ໂດຍໃຫ້ລູກຈ້າງທີ່ເຮັດວຽກໃນສຳນັກງານດຽວກັນງົດສົ່ງອີເມວສື່ສານກັນ ແລ້ວຫັນໄປໃຊ້ວິທີການສື່ສານແບບຄົນຍຸກກ່ອນ ໂດຍການຕິດຕໍ່ໂອ້ລົມກັນແບບເຫັນໜ້າເຫັນຕາກັນ ເພື່ອໃຫ້ພະນັກງານໄດ້ຕິດຕໍ່ພົວພັນກັນໂດຍກົງຫລາຍຂຶ້ນ.

ທີ່ຜ່ານມາມີວຽກງານວິໄຈຫລາຍເທື່ອທີ່ບົ່ງບອກວ່າການໄດ້ຮັບອີເມວໃນປະລິມານຫລາຍໆ ເຮັດໃຫ້ລະດັບຄວາມເຄັ່ງຄຽດໃນການເຮັດວຽກເພີ່ມສູງຂຶ້ນ ໂດຍເມື່ອ 2 ປີກ່ອນ ນັກວິໄຈລະບຸວ່າ : ການໄດ້ຮັບອີເມວກ່ຽວກັບວຽກຈຳນນວນຫລາຍ ເຮັດໃຫ້ລະດັບຄວາມດັນເລືອດສູງຂຶ້ນ ແລະ ເຮັດໃຫ້ອັດຕາການເຕັ້ນຂອງຫົວໃຈໄວຂຶ້ນ ແລະ ເມື່ອປີກ່ອນ ການສຶກສາຂອງມະຫາວິທະຍາໄລບຣິຕິສ ໂກລອມບີ ພົບວ່າ : ການຈຳກັດການໃຊ້ອີເມວລະຫ່ວາງການເຮັດວຽກຊ່ວຍຫລຸດລະດັບຄວາມເຄັ່ງ ຄຽດຂອງຄົນເຮົາໄດ້ຫລາຍ.