ເທນ ຮາກ ເປີດຕົວກັບແມນຢູ ຢ່າງເປັນທາງການ, ພ້ອມປະກາດຍາດແຊ໊ມກັບ ເປບ-ຄລອບ

ເທນ ຮາກ ໄດ້ກ່າວໃນງານຖະແຫລງຂ່າວເປີດຕົວກັບ ແມນເຊສເຕີ ຢູໄນເຕັດ ດ້ວຍການປະກາດທ້າແຂ່ງກັບ ເປບ ກວາດີໂອລາ ຜູ້ຈັດການທີມ ແມນເຊສເຕີ ຊິຕີ ທີມຮ່ວມເມືອງຄວ້າແຊ໊ມພຣີເມຍລີກ ສະໄຫມທີ 4 ໃນ 5 ລະດູການຫລັງສຸດ ລວມເຖິງ ເຈີເກັນ ຄລອບ ຜູ້ຈັດການທີມ ລີເວີພູລ ເຊິ່ງພາທີມຂັບຄ້ຽວຍາດແຊ໊ມພຣີເມຍລີກກັບ ແມນຊິຕີ ຢ່າງດຸເດືອດຕະຫລອດຫລາຍປີຜ່ານມາ ແລະ ມີໂອກາດແຊ໊ມ 4 ລາຍການໃນລະດູການນີ້ ກ່ອນພາດແຊ໊ມລີກສູງສຸດໄປຫມາດໆ.

ເທນ ຮາກ ກ່າວວ່າ : ‘‘ ໃນເວລານີ້ຂ້ອຍຊື່ນຊົມພວກເຂົາທັງຄູ່ ພວກເຂົາມີແນວທາງການຫລິ້ນບານທີ່ສຸດຍອດ ແຕ່ເຈົ້າຈະເຫັນວ່າຍຸກສະໄຫມຫນຶ່ງສາມາດຈົບລົງໄດ້ສະເຫມີ ຂ້ອຍຕັ້ງຕາຄອຍຖ້າຈະໄດ້ຕໍ່ສູ້ກັບພວກເຂົາ ແລະ ຂ້ອຍຫມັ້ນໃຈວ່າສະໂມສອນອື່ນໆ ກໍຕ້ອງການເຮັດແບບນັ້ນຄືກັນ ’’.

ສ່ວນການໄດ້ຮັບຄຳເຕືອນທີ່ວ່າ ອາດເອົາຊື່ສຽງທີ່ເຄີຍເຮັດໄວ້ກັບ ອາແຈັກ ມາຖິ້ມ ໄວ້ແມນຢູ, ເທນ ຮາກ ກໍຕອບວ່າ : ‘‘ ຂ້ອຍບໍ່ເຫັນວ່າມັນເປັນຄວາມສ່ຽງ ຂ້ອຍຄິດວ່າສະໂມສອນແຫ່ງນີ້ມີປະຫວັດສາດທີ່ດີ ແລະ ຍິ່ງໃຫຍ່ ແລະຕອນນີ້ເຮົາຈະມາສ້າງອະນາຄົດນຳກັນ ’’.

ສຳລັບ ເທນ ຮາກ ນັ້ນ ຫາກໍພາ ອາແຈັກ ອຳເຕີດຳ ຄວ້າແຊ໊ມລີກສູງສຸດສະໄຫມທີ 36 ຂອງສະໂມສອນ ແລະ ເປັນແຊ໊ມລາຍການທີ 6 ຂອງລາວ ນັບຕັ້ງແຕ່ເຂົ້າມາເຮັດວຽກໃນປີ 2017 ເຊິ່ງພາທີມໄດ້ແຊ໊ມລີກເຖິງ 3 ສະໄຫມ ລະດູການຫລ້າສຸດ ແລະຍັງໄດ້ແຊ໊ມ ດັດຄັບ ອີກ 2 ສະໄຫມ ລວມເຖິງເຂົ້າຮອບຮອງຊະນະເລີດ ຢູຟາ ແຊ໊ມປຽນລີກ ລະດູການ 2018-2019.