ລະນຶກວັນຜ່າວົງປິດລ້ອມ ຂອງກອງພັນທີ 2 ວິລະຊົນ ຄົບຮອບ 64 ປີ
ການຜ່າວົງປິດລ້ອມຂອງກອງພັນທີ 2 ໄດ້ເລີ່ມຕົ້ນໃນ ເວລາ 19:30 ໂມງຂອງວັນທີ 18 ພຶດສະພາ 1959, ຄະນະພັກ- ຄະນະບັນຊາກອງພັນ ໄດ້ຮຽກຮ້ອງພະນັກງານສະມາຊິກພັກທັງໝົດໃນກອງພັນ ເພື່ອປະກາດລຶບຊື່ຮູບການຈັດຕັ້ງຂອງກອງທັບລາຊະອານາຈັກ ແລ້ວສ້າງຕັ້ງຄະນະບັນຊາໃໝ່ຂຶ້ນແທນໂດຍໄດ້ແຕ່ງຕັ້ງໃຫ້ທ່ານຈໍານຽນ ບຸນລອດ ເປັນຫົວໜ້າກອງພັນ, ທ່ານ ທອງສະຫວັດ ໄຂຄໍາພິທູນ ເປັນກໍາມະການ-ການເມືອງ, ທ່ານ ສວຍ ບຸນຈະ ເລີນ ເປັນຮອງກອງພັນ, ທ່ານ ຫຼວຍແສນຄຳ ກົມມະດໍາ ເປັນ ຮອງກໍາມະການ-ການເມືອງແລ້ວອອກຄໍາສັ່ງໃຫ້ບັນດາກົມ ກອງ ເລີ່ມຕົ້ນປະຕິບັດແຜນການຖອນທັບໄປທາງທິດບ້ານໂຕນ ແລະ ໄດ້ຜັນຂະຫຍາຍຄໍາສັ່ງຖອນກໍາລັງຄັ້ງນັ້ນໃຫ້ທົ່ວເຖິງທຸກກອງຮ້ອຍຢ່າງວ່ອງໄວ ແລະ ປິດລັບທີ່ສຸດ.
ຕົກມາຮອດຄໍ່າຄືນຂອງວັນ ທີ 18 ພຶດສະພາ 1959 ພາຍໃຕ້ ການບັນຊາຂອງຄະນະພັກກອງ ພັນ, ແຕ່ລະກົມກອງພ້ອມກັບຄອບຄົວພະນັກງານ-ນັກຮົບທັງໝົດ ໄດ້ນໍາໃຊ້ຄວາມມືດຖອນທັບໄປທາງທິດບ້ານໂຕນ-ນາ ແຖງ-ໜອງເຕີ້ແລ້ວເຂົ້າໄປຕາມທິດບ້ານມາຍ (ທິດຕາເວັນຕົກສຽງໃຕ້ປະມານ 15 ກິໂລແມັດ) ຢ່າງປິດລັບ. ມາຮອດ 7 ໂມງເຊົ້າ ຂອງມື້ຕໍ່ມາພວກສັດຕູເຂົ້າປົດອາວຸດກອງພັນທີ 2 ແຕ່ພວກເຂົາຕົກສະເງີ້ເພາະຢູ່ໃນຄ້າຍມີແຕ່ຄວາມມິດງຽບ-ຫວ່າງເປົ່ານັບທັງເຮືອນຫ້ອງແຖວຄອບຄົວພະນັກງານກໍບໍ່ມີຮອດເງົາຄົນ, ພາຍຫຼັງກອງພັນທີ 2 ອອກຈາກທົ່ງໄຫຫີນແລ້ວກໍໄດ້ເຄື່ອນທັບໄປຕາມທົ່ງຫຍ້າປ່າຄັງອັນຕຶບໜາເພື່ອໃຫ້ຫວິດຈາກວົງປິດລ້ອມຂອງພວກສັດຕູໂດຍມີກອງຮ້ອຍທີ 3 ເຊິ່ງເປັນກອງຮ້ອຍເຂັ້ມແຂງອາດຫານນໍາໜ້າເດີນທາງໄປກ່ອນ.
ສັງລວມແລ້ວໃນໄລຍະເຄື່ອນທັບ 10 ກວ່າວັນ, ກອງພັນທີ 2 ໄດ້ສູ້ຮົບກັບສັດຕູທັງນ້ອຍ ແລະ ໃຫຍ່ 10 ຄັ້ງ, ສຸດທ້າຍກອງພັນທີ 2 ພ້ອມກັບ 91 ຄອບຄົວກໍສາມາດຜ່າວົງປິດລ້ອມທີ່ແໜ້ນໜາຂອງສັດຕູໄປສູ່ເຂດທີ່ໝັ້ນດ້ວຍຄວາມປອດໄພ. ການຜ່າວົງປິດລ້ອມຂອງກອງພັນທີ 2 ວິລະຊົນ ແມ່ນມີຄວາມສໍາຄັນສ່ອງແສງໃຫ້ເຫັນເຖິງການນໍາພາຖືກຕ້ອງສະ ຫຼາດສ່ອງໃສຂອງພັກ, ແມ່ນໄຊຊະນະອັນໃຫຍ່ຫຼວງຂອງກໍາລັງປະກອບອາວຸດເຮົາທີ່ຢູ່ພາຍໃຕ້ການນໍາພາຂອງພັກ, ເປັນເຫດການປະຫວັດສາດອັນສໍາຄັນຂອງຊາດ, ຂອງພັກ, ຂອງກອງທັບເຮົາ ແລະ ເປັນບົດຮຽນອັນລໍ້າຄ່າທີ່ສຸດໃຫ້ແກ່ຂະບວນຕໍ່ສູ້ຂອງກອງທັບ ແລະ ປະຊາຊົນເຮົາ, ພ້ອມທັງໄດ້ສະແດງໃຫ້ ເຫັນເຖິງຄວາມບໍລິສຸດຜຸດຜ່ອງ, ຄວາມຈົງຮັກພັກດີ, ຄວາມສາມັກຄີເປັນຈິດໜຶ່ງໃຈດຽວ, ຄວາມອົດທົນໝັ້ນໜຽວ, ບໍ່ຄອນແຄນຕໍ່ການນາບຂູ່, ຫຼອກລວງຂອງສັດຕູ, ນໍ້າໃຈສູ້ຮົບ ແລະ ພິກໄຫວຂອງກອງພົນທີ 2 ໄດ້ເປັນແວ່ນແຍງ, ເປັນການປຸກລະດົມອັນແຮງກ້າໃຫ້ແກ່ຂະບວນການປະຕິວັດ, ພ້ອມດຽວກັນນັ້ນ, ກໍເຮັດໃຫ້ກຳລັງປະຕິວັດ, ໂດຍສະເພາະກຳລັງປະກອບອາວຸດປະຊາຊົນນັບມື້ເຕີບໃຫຍ່ຂະຫຍາຍຕົວເຮັດໃຫ້ຊື່ສຽງຂອງກຳລັງ ຝ່າຍປະເທດລາວ(ແນວລາວ ຮັກຊາດ) ນັບມື້ພົ້ນເດັ່ນໃນເວທີສາກົນ.
ຂ່າວ: ເພຈຂ່າວກອງທັບປະຊາຊົນລາວ
