ນູນເຢສ ປະຕິເສດຮ່ວມງານ ແມນຢູ ເນື່ອງຈາກບໍ່ມີປີ້ແຊ໊ມປຽນລີກ

ແມນເຊສເຕີ ຢູໄນເຕັດ ຫມົດຫວັງ ຫລັງຖືກ ດາວິນ ນູນເຢສ ດາວຍິງຜົນງານດີຂອງ ເບນຟີກາ ປະຕິເສດຮ່ວມທີມ ຫລັງບໍ່ສາມາດຄວ້າປີ້ຢູຟາ ແຊ໊ມປຽນລີກ ລະດູການຫນ້າ.

ແມນເຊສເຕີ ຢູໄນເຕັດ ທີມໃຫຍ່ແຫ່ງພຣີເມຍລີກອັງກິດ ຕ້ອງອົກຫັກຢ່າງແຮງ ຫລັງ ດາວິນ ນູນເຢສ ກອງຫນ້າດາວຮຸ່ງຂອງ ເບນຟີກາ ປະຕິເສດທີ່ຈະຍ້າຍມາຮ່ວມທີມ ເນື່ອງຈາກຕ້ອງການລົງລ່າຕາໜ່າງໃຫ້ກັບສະໂມສອນທີ່ໄດ້ລົງແຂ່ງຂັນໃນ ແຊ໊ມປຽນ ລີກ ຫລາຍກວ່າ.

ເອຣິກ ເທນ ຮາກ ຜູ້ຈັດການທີມຄົນໃຫມ່ຂອງ ແມນເຊສເຕີ ຢູໄນເຕັດ ຢາກໄດ້ກອງຫນ້າຕົວໃຫມ່ເຂົ້າມາຊ່ວຍງານ ຄຣິສຕຽນໂນ ໂຣນັລໂດ ໃນລະດູການຫນ້າ ແລະ ມຸ້ງເປົ້າໄປທີ່ ນູນເຢສ ທີ່ຍິງໄປແລ້ວເຖິງ 34 ປະຕູ ຈາກການລົງຫລິ້ນ 41 ນັດໃຫ້ ເບນຟີກາ ໃນລະດູການນີ້.

ແຕ່ຫລ້າສຸດ ‘‘ ອາແອມເຊ ’’ ສື່ຊື່ດັງຂອງຝຣັ່ງ ລາຍງານວ່າ ແມນຢູ ຕ້ອງຜິດຫວັງອີກແລ້ວ ຫລັງຖືກ ນູນເຢສ ທີ່ຖືກຕັ້ງຄ່າຕົວໄວ້ທີ່ 68 ລ້ານປອນ ປະຕິເສດໄປຮຽບຮ້ອຍ ເນື່ອງຈາກພວກເຂົາບໍ່ສາມາດຄວ້າປີ້ໄປລຸຍ ແຊ໊ມປຽນ ລີກ ໃນລະດູການຫນ້າໄດ້ດັ່ງກ່າວ.

ທັງນີ້ ນອກຈາກ ແມນຢູ ແລ້ວ ນູນເຢສ ຍັງປະຕິເສດທີ່ຈະຍ້າຍໄປຫລິ້ນໃຫ້ ນິວຄາສເຊິລ ຢູໄນເຕັດ ເສດຖີໃຫມ່ແຫ່ງວົງການບານເຕະອັງກິດນຳອີກ ດ້ວຍເຫດຜົນດຽວກັນ.