ຈີນພົບບັນຫາສານເສບຕິດສັງເຄາະລະບາດໜັກ

     ລັດຖະບານຈີນຖະແຫລງໃນວັນທີ 27 ມີນານີ້ວ່າ: ສະຖານະການຢາເສບຕິດຢູ່ຈີນເຂົ້າຂັ້ນຮ້າຍແຮງ ແລະ ລະບາດໜັກຂຶ້ນ ໂດຍສະເພາະຢ່າງຍິ່ງມີການເສບ ແລະ ຜະລິດສານເສບຕິດສັງເຄາະ ເຊິ່ງກາຍເປັນໄພຄຸກຄາມ ສາທາລະນະສຸກຄັ້ງໃຫຍ່ທົ່ວໂລກ.

ທ່ານ ຫລິວ ເຢຈິນ ຮອງຜູ້ອຳນວຍການຄະນະກຳມະການປ້ອງກັນ ແລະ ປາບປາມຢາເສບຕິດຈີນ ກ່າວໃນການຖະແຫລງຂ່າວວ່າ: ຈີນຢຶດຢາບ້າ, ຢາເຄ ແລະ ສານເສບຕິດສັງເຄາະອື່ນໆ ທີ່ຜ່ານກຳມະວິທີທາງເຄມີເພີ່ມຂຶ້ນເຖິງ 106% ໃນປີ 2016. ຂະນະດຽວກັນ ການຜະລິດສານຕັ້ງຕົ້ນກໍເພີ່ມຂຶ້ນຕາມນຳ ໂດຍອາໄສຊ່ອງທາງກົດໝາຍ ແລະ ຂະຫຍາຍຕົວຢ່າງຕໍ່ເນື່ອງ ລວມທັງພື້ນທີ່ຜະລິດຢາເສບຕິດ. ຄາດວ່າຈີນເປັນໜຶ່ງໃນຜູ້ຜະລິດສານເສບຕິດສັງເຄາະລາຍໃຫຍ່ ລວມທັງສານທີ່ຜະລິດມາຈາກຝິ່ນ ເຊິ່ງເປັນວິກິດດ້ານສາທາລະນະສຸກໃນຫລາຍປະເທດເຊັ່ນ: ອາເມລິກາ, ການາດາ ແລະ ອົດສະຕຣາລີ. ນອກຈາກນີ້ ເຈົ້າໜ້າທີ່ສຳນັກງານປ້ອງກັນຢາເສບຕິດກ່າວໃນລາຍງານປະຈຳປີວ່າ: ການຈຳໜ່າຍຢາເສບຕິດທາງອອນລາຍຢູ່ຈີນເຕີບໃຫຍ່ຂຶ້ນຫລາຍຈາກປະຕິບັດການຈັບກຸມຜູ້ຄ້າຢາເສບຕິດທາງອອນລາຍໃນປີຜ່ານມານຳໄປສູ່ການຈັບກຸມໄດ້ 21.000 ຄົນ, ຢຶດຢາເສບຕິດໄດ້ 10,8 ໂຕນ ແລະ ສານເຄມີຕັ້ງຕົ້ນ 52 ໂຕນ ເພື່ອນຳໄປໃຊ້ໃນການຜະລິດສານເສບຕິດປະເພດສັງເຄາະ ເນື່ອງຈາກມີປະລິມານຄວາມຕ້ອງການໃນຕະຫລາດ ຕ່າງປະເທດເພີ່ມຂຶ້ນ.