ສານປະຊາຊົນແຂວງຄໍາມ່ວນຕັດສີນລົງໂທດ ຄາດຕະກອນຈໍາຄຸກ 14 ປີ
ເມື່ອບໍ່ດົນມານີ້, ສານປະຊາຊົນແຂວງຄຳມ່ວນໄດ້ຕັດສີນລົງໂທດທ້າວ ທົດສະກັນ ອາຍຸ 43 ປີ ຢູ່ບ້ານຫ້ວຍເຢັນເມືອງຍົມມະລາດແຂວງຄຳມ່ວນໃຫ້ຈໍາຄຸກເປັນເວລາ 14 ປີພ້ອມປັບໄໝ 3 ລ້ານກີບໃນຄະດີຄາດຕະກຳ.
ຄະດີມີຢູ່ວ່າ: ເມື່ອປີ 2009 ທ້າວທົດສະກັນ, ໄດ້ແຕ່ງງານກັບນາງພາວ ຢູ່ບ້ານຫ້ວຍເຢັນເມືອງຍົມມະລາດ ແລະ ມີລູກນຳກັນ 3 ຄົນ, ຕົກມາໄລຍະປີ 2011 ທ້າວທົດສະກັນ ແລະ ທ້າວ ຄະລື ຊຶ່ງເປັນນ້ອງເມຍມັກມີບັນຫາຜິດຖຽງກັນປະຈໍາ, ຍ້ອນທ້າວ ຄະລື ມັກດື່ມມືນເມົາແລ້ວອາລະວາດຄອບຄົວ ແລະ ມາຮອດປີ 2016 ທ້າວ ຄະລື ໄດ້ອອກເຮືອນໄປປຸກເຮືອນຢູ່ຕ່າງຫາກຕໍ່ໜ້າເຮືອນທ້າວທົດສະກັນ, ແຕ່ກໍທຽວໄປຂໍເງິນນຳເອື້ອຍ ແລະ ອ້າຍເຂີຍ, ຖ້າບໍ່ໄດ້ເງິນກໍ່ເກີດອາລົມໂມໂຫອາລະວາດ ແລະ ໃນມື້ເກີດເຫດທ້າວ ທົດສະກັນໄດ້ນັ່ງກິນຊຸມແຊວກັບໝູ່ບ້ານດຽວກັນຈົນເມົາ ແລະ ໃນຂະນະນັ້ນທ້າວຄະລື ກໍຍ່າງມາດ້ວຍຄວາມເມົາເຊັ່ນກັນ ແລະ ມີໂວຍວາຍຢູ່ໜ້າເຮືອນ, ເມື່ອເຫັນສະພາບແນວນັ້ນ, ທ້າວທົດສະກັນຈຶ່ງໄດ້ອອກຈາກເຮືອນແລ້ວໄປດື່ມກິ່ນຢູ່ເຮືອນໃກ້ ແລະ ເວລານັ້ນທ້າວຄະລື ໄດ້ເຍືອງໂຄມໃສ່ໜ້າທ້າວທົດສະກັນ ຈຶ່ງເກີດຄວາມໂມໂຫແຮງ ແລະ ພໍຕົກຍາມຄໍ່າມາທ້າວ ທົດສະກັນ ໄດ້ຈັບພ້າແລະ ໄມ້ຄ້ອນຍ່າງໄປເຮືອນຂອງທ້າວຄະລື, ຈາກນັ້ນໃຊ້ຄ້ອນຕີງ່ອນຫລາຍ ບາດແລ້ວເອົາພ້າຟັນຫົວອີກຫລາຍບາດຈົນທ້າວຄະລືເສຍຊີວິດ, ຈາກນັ້ນກໍຍ່າງໄປນັ່ງດື່ມກິນນຳໝູ່ຄືບໍ່ມີຫຍັງເກີດຂຶ້ນ, ພໍຮຸ່ງເຊົ້າມື້ຕໍ່ມາ, ເມຍຂອງທ້າວທົດສະກັນ ກໍພົບເຫັນນ້ອງຊາຍນອນເສຍຊີວິດຢູ່ເຮືອນ, ຈຶ່ງແຈ້ງຄວາມຕໍ່ເຈົ້າໜ້າທີ່ ແລະ ສືບສວນຮູ້ວ່າແມ່ນທ້າວທົດສະກັນເປັນຜູ້ລົງມືກໍ່ເຫດຈຶ່ງໄດ້ຈັບຕົວດຳເນີນຄະດີຕາມກົດໝາຍດັ່ງກ່າວ.
ຂ່າວ-ພາບ : ຫນັງສືພິມ ປກສ
