ອາເມລິກາຢືນຢັນພົບຜູ້ຕິດເຊື້ອພະຍາດ ‘ຝີດາດລີງ’ ຄົນທຳອິດຂອງປີ 2022
ວັນທີ 18 ພຶດສະພາ 2022, ສຳນັກຂ່າວຊິນຮົວລາຍງານວ່າ: ທາງການສາທາລະນະສຸກລັດແມສຊາຊູເຊດຂອງອາເມລິກາ ຢືນຢັນການກວດພົບຜູ້ຕິດເຊື້ອພະຍາດຝີດາດລີງ (Monkeypox) ຄົນທຳອິດຂອງປະເທດໃນປີ 2022 ເຊິ່ງເປັນຊາຍໄວຜູ້ໃຫຍ່ທີ່ອາໄສຢູ່ໃນລັດດັ່ງກ່າວ ແລະ ມີປະຫວັດເດີນທາງຢ້ຽມຢາມການາດາ, ແຕ່ຜູ້ຕິດເຊື້ອຄົນນີ້ “ຍັງບໍ່ກໍ່ໃຫ້ເກີດຄວາມສ່ຽງຕໍ່ສາທາລະນະ”.
ທາງການລະບຸວ່າ: ການທົດລອງເບື້ອງຕົ້ນສຳເລັດເມື່ອວັນທີ 17 ພຶດສະພາຜ່ານມາ ກ່ອນຫ້ອງປະຕິບັດການຂອງສູນຄວບຄຸມ ແລະ ປ້ອງກັນພະຍາດອາເມລິກາ (CDC) ຈະຢືນຢັນພົບການຕິດເຊື້ອພະຍາດຝີດາດລີງໃນຕອນບ່າຍວັນທີ 18 ພຶດສະພາ ໂດຍຄະນະນັກວິທະຍາສາດຂອງ CDC ກຳລັງເຮັດວຽກຮ່ວມກັບສຳນັກງານສາທາລະນະສຸກແມສຊາຊູເຊດເພື່ອສອບສວນຜູ້ຕິດເຊື້ອຄົນນີ້.
CDC ກຳລັງຕິດຕາມການຕິດເຊື້ອພະຍາດຝີດາດລີງແບບກຸ່ມກ້ອນຫລາຍກຸ່ມທີ່ຖືກກວດພົບໃນຫລາຍປະເທດໄລຍະ 2 ອາທິດຜ່ານມາ ເຊິ່ງລວມທັງປັອກຕຸຍການ, ແອັສປາຍ ແລະ ອັງກິດ. ພ້ອມຮຽກຮ້ອງຜູ້ໃຫ້ບໍລິການເບິ່ງແຍງສຸຂະພາບເຝົ້າລະວັງຜູ້ປ່ວຍທີ່ມີອາການສອດຄ່ອງກັບພະຍາດຝີດາດລີງ ບໍ່ວ່າພວກເຂົາຈະມີປະຫວັດການເດີນທາງບາງຢ່າງ ຫລື ມີປັດໄຈສ່ຽງສະເພາະສຳລັບພະຍາດດັ່ງກ່າວ ຫລື ບໍ່ກໍຕາມ.
ອີກຢ່າງໜຶ່ງ, ອົງການອະນາໄມໂລກລະບຸວ່າ: ພະຍາດຝີດາດລີງເປັນພະຍາດເກີດຈາກສັດໃນປ່າ (Sylvatic Zoonosis) ທີ່ອາດເຮັດໃຫ້ເກີດການຕິດເຊື້ອໃນມະນຸດ ແລະ ມັກເກີດຂຶ້ນໃນພື້ນທີ່ປ່າຂອງອາຟຣິກາກາງ ແລະ ຕາເວັນຕົກ ໂດຍພະຍາດນີ້ເກີດຈາກການຕິດເຊື້ອໄວຣັສຝີດາດລີງ ເຊິ່ງຈັດຢູ່ໃນສະກຸນອໍໂທພອກໄວຣັສ (Orthopoxvirus).
ອ້າງອີງ:
