ເຈົ້າໜ້າທີ່ຢືນຢັນ ເຫດການປຸ້ນຊິງຊັບຍິງສາວ ຍັງຈັບຕົວຜູ້ກໍ່ເຫດບໍ່ໄດ້

ວັນທີ 18 ພຶດສະພາ 2022 ນີ້ ໜັງສືພິມຄວາມສະຫງົບ ໄດ້ລາຍງານຂ່າວວ່າ: ເວລາ 1:30 ຫາ 2:00 ໂມງ ຕອນກາງຄືນຂອງວັນທີ 16-17 ພຶດສະພາ 2022 ໄດ້ມີຄົນຮ້າຍຈຳນວນ 5 ຄົນ ( ຮູບຕາມກ້ອງວົງຈອນ ) ຈີ້ຍິງສາວ ອາຍຸ 30 ປີ, ເຮືອນຢູ່ຮ່ອມ 3 ບ້ານດົງນາໂຊກເຫນືອ ເມືອງສີໂຄດຕະບອງ ນະຄອນຫຼວງວຽງຈັນ ບັງຄັບເມືອເຮືອນ ແລ້ວບອກລະຫັດໄຂຕູ້ເຊັບກວດເອົາຊັບສິນມີຄ່າຈຳນວນຫຼາຍລາຍການແລ້ວຫລົບຫນີໄປ.

ຕາມການສອບສວນເຫດການໃນເບື້ອງຕົ້ນ ໃນເວລາ 19:00 ໂມງ ຂອງວັນທີ 16 ພຶດສະພາ 2022 ຜູ້ເສຍຫາຍໄດ້ຂັບລົດ ໂຕໂຍຕ້າ ແລນກຸຍເຊິ້ ໄປກິນເບຍ ກັບຫມູ່ ຢູ່ຫລາຍຮ້ານ, ຕໍ່ມາໄດ້ຍ້າຍມາກິນຢູ່ຮ້ານແຄມຂອງ ເຊີ່ງເປັນຮ້ານສຸດທ້າຍ ພໍຮອດທ່ຽງຄືນຜູ້ເສຍຫາຍຈະກັບເຮືອນ ຍ່າງມາຫາລົດຢູ່ບ່ອນຈອດລົດ ໃນຂະນະນັ້ນ ມີຜູ້ຊາຍ 5 ຄົນ ໄດ້ເອົາປຶນຈິ້ຜູ້ກ່ຽວບັງຄັບໃຫ້ພາເມືອເຮືອນ ພໍຮອດເຮືອນບັງຄັບໃຫ້ບອກລະຫັດຕູ້ເຊັບຢູ່ຊັ້ນລຸ່ມເຮືອນ ຈາກນັ້ນ ກໍໄຂເອົາຊັບສິນທີ່ມີຄ່າແລ້ວຄົນຮ້າຍກໍຂີ່ລົດຫລົບຫນີ ໂດຍນຳໃຊ້ລົດກະບະ ແລະ ລົດເກັງ ລວມ 2 ຄັນ. ສ່ວນຍິງສາວປອດໄພບໍ່ໄດ້ຮັບບາດເຈັບໃດໆ.

ໃນວັນທີ 18 ພຶດສະພາ 2022 ນີ້, ໄດ້ມີຂ່າວອອນລາຍ ຫລາຍເພຈເຜີຍແຜ່ພາບ ຊາຍ 3 ຄົນ ທີ່ມີລາຍສັກເຕັມໂຕ ວ່າເປັນກຸ້ມແກ້ງປຸ້ນຊັບດັ່ງກ່າວ ຖືກເຈົ້າໜ້າທີ່ຈັບຕົວໄດ້ແລ້ວ, ເຊິ່ງຄວາມຈິງເຈົ້າໜ້າທີ່ຜູ້ຮັບຜິດຊອບຄະດີດັ່ງກ່າວ ໄດ້ຢືນຢັນວ່າ: ຊາຍ 3 ຄົນ ທີ່ສື່ອອນລາຍຕ່າງໆລົງຂ່າວອ້າງວ່າເຈົ້າໜ້າທີ່ຈັບຕົວຜູ້ກໍ່ເຫດປຸ້ນຊີງຊັບຍິງສາວວັນທີ 17 ພຶດສະພາ 2022 ຢູ່ບ້ານດົງນາໂຊກເໜືອ ນັ້ນແມ່ນເປັນຂ່າວປອມ ແລະ ພວກກ່ຽວບໍ່ໄດ້ກ່ຽວຂ້ອງກັບຄະດີປຸ້ນຊັບຄັ້ງນີ້.

ປັດຈຸບັນ ເຈົ້າໜ້າທີ່ຍັງຈັບຕົວຜູ້ກໍ່ເຫດບໍ່ໄດ້ເທື່ອ ແລະ ກຳລັງເລັ່ງສືບສວນ-ສອບສວນຫາກຸ່ມຄົນຮ້າຍມາລົງໂທດຕາມກົດໝາຍ ແລະ ຂໍຮຽກຮ້ອງນຳສື່ສັງຄົມອອນລາຍຢ່າສ້າງກະແສໃຫ້ສັງຄົມປັ່ນປ່ວນ.