ທົ່ວປະເທດມີຜູ້ໃຊ້ 4G ຫລາຍກວ່າ 3 ລ້ານບັນຊີ ກວມ 53% ສ້າງລາຍຮັບໃຫ້ລັດ 756 ຕື້ກີບ/ປີ

ໃນວັນທີ 17 ພຶດສະພາ 2022 ທີ່ນະຄອນຫລວງວຽງຈັນ, ທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ ໄດ້ມີຄຳເຫັນບາງຕອນ ເນື່ອງໃນວັນໂທລະຄົມມະນາຄົມ ສາກົນ ຄົບຮອບ 157 ປີ (17/5/1865-17/5/2022) ວ່າ: ໃນປີ 2022 ນີ້ ສະຫະພາບໂທລະຄົມມະນາຄົມສາກົນ ໄດ້ກຳນົດການສະເຫລີມສະ ຫລອງພາຍໃຕ້ຄຳຂວັນ “ເຕັກໂນໂລຊີດີຈິຕອນ ເພື່ອຜູ້ອາວຸໂສ ແລະ ສຸຂະພາບທີ່ດີ”. ອົງການອະນາໄມໂລກ ຄາດຄະເນວ່າ ຮອດປີ 2050 ຈະມີຜູ້ອາວຸໂສກວ່າ 65 ປີ ໃນທົ່ວໂລກປະມານ 1,5 ຕື້ຄົນ ເຊິ່ງຈະກາຍເປັນ ສັດຕະວັດທີ່ສຳຄັນແຫ່ງການປ່ຽນແປງຂອງພົນລະເມືອງ. ການທີ່ມີອາຍຸຍືນ ແມ່ນຜົນສໍາເລັດທີ່ໂດດເດັ່ນ ແຫ່ງການພັດທະນາເຕັກໂນໂລຊີ, ນະວັດຕະກໍາ ແລະ ວິທະຍາສາດທາງການແພດລະດັບສູງ, ສະນັ້ນ ຈຶ່ງມີຄວາມຈຳເປັນນຳໃຊ້ເຕັກໂນໂລຊີ ດີຈິຕອນ ໃນການພັດທະນາ ເສດຖະກິດ-ສັງຄົມ ໃນຫລາຍດ້ານ ເຊັ່ນ: ສ້າງຕົວເມືອງອັດສະລິຍະ ເພື່ອເບິ່ງແຍງຜູ້ອາວຸໂສ, ສ້າງຄວາມສະດວກໃນທຸລະກໍາການເງິນ-ການທະນາຄານ ດ້ວຍເຕັກໂນໂລຊີດີຈີຕອນ ໃຫ້ແກ່ຜູ້ອາວຸໂສ ແລະ ເປັນເຄື່ອງມືຊ່ວຍການເບິ່ງແຍງຜູ້ອາວຸໂສຫລາຍລ້ານຄົນ ແທນຄອບຄົວໃນເວລາທີ່ຈໍາເປັນ.

ໃນໄລຍະ 157 ປີ ຜ່ານມາ, ການພັດທະນາ ເຕັກໂນໂລຊີ ໂທລະຄົມມະນາຄົມ ໄດ້ຂະຫຍາຍຕົວຢ່າງໄວວາ ແລະ ໄດ້ກາຍເປັນປັດໄຈທີ່ຂາດບໍ່ໄດ້ໃນການດໍາລົງຊີວິດ, ໃນອະນາຄົດນີ້ ວຽກງານໂທລະຄົມມະນາຄົມ ຍັງຈະສືບຕໍ່ພັດທະນາຢ່າງເລິກເຊິ່ງ ເພື່ອຕອບສະໜອງຄວາມຮຽກຮ້ອງຕ້ອງການຂອງການດໍາລົງຊີວິດ ແລະ ພັດທະນາ ເສດຖະກິດ-ສັງຄົມ ອີກດ້ວຍ.

ສຳລັບ ສປປ ລາວ ໃນນາມເປັນສະມາຊິກ ສະຫະພາບໂທລະຄົມມະນາຄົມສາກົນ ໄດ້ຈັດຕັ້ງສະເຫລີມສະຫລອງ ວັນໂທລະຄົມມະນາຄົມສາກົນ ພາຍໃຕ້ວິໄສທັດການພັດ ທະນາເສດທະກິດດີຈິຕອນ ຮອດປີ 2040 ຄື: “ນໍາໃຊ້ເຕັກໂນໂລຊີດີຈີຕອນ ເປັນເຄື່ອງມືສໍາຄັນໃນການຂັບເຄື່ອນທຸກຂະແໜງການ ເພື່ອສ້າງເສດຖະກິດດີຈີຕອນ ແນໃສ່ປະກອບ ສ່ວນເຂົ້າໃນການສ້າງເສດຖະກິດຂອງປະເທດເຮົາ ໃຫ້ມີການຂະຫຍາຍຕົວຢ່າງເຂັ້ມແຂງ, ໝັ້ນທ່ຽງ ແລະ ຍືນຍົງ”. ພ້ອມນັ້ນ ສປປ ລາວ ໄດ້ກຳນົດເອົາ ວັນທີ 13 ມີນາ 1965 ເປັນ ວັນສ້າງຕັ້ງ ວັນໂທລະຄົມມະນາຄົມແຫ່ງຊາດ ຕາມມາດຕາ 53 ຂອງກົດໝາຍ ວ່າດ້ວຍການໂທລະຄົມມະນາຄົມ.

ທ່ານ ບໍ່ວຽງຄໍາ ວົງດາລາ ໄດ້ກ່າວຕື່ມວ່າ: ປັດຈຸບັນ, ວຽກງານໂທລະຄົມມະນາຄົມ ຂອງ ສປປ ລາວ ໄດ້ມີການເຄື່ອນໄຫວ ແລະ ພັດທະນາຂຶ້ນຢ່າງຕັ້ງໜ້າ ພາຍໃຕ້ຄວາມຮັບຜິດຊອບ ຂອງອົງການດັດສົມໂທລະຄົມມະນາຄົມ ເຊິ່ງເປັນຫົວໜ່ວຍວິຊາການທຽບເທົ່າກົມ ທີ່ຂຶ້ນກັບກະຊວງເຕັກໂນໂລຊີ ແລະ ການສື່ສານ. ໃນປີຊຸມຜ່ານມາໄດ້ສໍາເລັດການປັບປຸງກົດໝາຍ ວ່າດ້ວຍການໂທລະຄົມມະນາຄົມ ແລະ ສ້າງນິຕິກຳລຸ່ມກົດໝາຍ ຫລາຍສະບັບ ເພື່ອຄຸ້ມຄອງ ແລະ ດັດສົມວຽກໂທລະຄົມມະນາຄົມໃຫ້ແທດທັນກັບການນໍາໃຊ້ເຕັກໂນໂລຊີ ໃນຍຸກອຸດສາຫະກຳ 4.0 ຢູ່ໃນປະເທດເຮົາ.

ຮອດທ້າຍປີ 2021 ພື້ນທີ່ການໃຫ້ບໍລິການໂທລະຄົມມະນາຄົມ ລະບົບ 2G ຄວບຄຸມໄດ້ 95%, 3G ຄວບຄຸມໄດ້ 81%, 4G ຄວບຄຸມໄດ້ 53% ຂອງບ້ານທັງໝົດໃນທົ່ວປະເທດ (ລວມທັງ ໃນເຂດບ້ານເປົ້າໝາຍບ້ານ 3 ສ້າງ). ມີຈຳນວນຜູ້ນໍາໃຊ້ໂທລະສັບຕັ້ງໂຕະ ແລະ ມືຖືໃນລະບົບແລ້ວ 6 ລ້ານກວ່າເລກໝາຍ ຫລື 91 ເລກໝາຍຕໍ່ປະຊາກອນ 100 ຄົນ, ຜູ້ນໍາໃຊ້ອິນເຕີເນັດ (ລະບົບມີສາຍ ແລະ ບໍ່ມີສາຍ) ທັງໝົດ 3 ລ້ານກວ່າບັນຊີ, ມີອັດຕາການຊົມໃຊ້ອິນເຕີເນັດ 51% ຂອງປະຊາກອນ, ມີລະບົບຄຸ້ມຄອງການຂຶ້ນທະບຽນເລກໝາຍໂທລະສັບມືຖື ທີ່ທັນສະໄໝ; ມີຜູ້ໃຫ້ບໍລິການໂທລະຄົມມະນາຄົມ ຈຳນວນ 5 ບໍລິສັດ ແລະ ຜູ້ໃຫ້ບໍລິ ການອິນເຕີເນັດ ປະເພດ 1 ຈໍານວນ 7 ບໍລິສັດ, ປະເພດ 2 ຈໍານວນ 7 ບໍລິສັດ, ປະ ເພດ 3 ຈໍານວນ 17 ບໍລິສັດ ເຊິ່ງສາມາດສ້າງລາຍຮັບເຂົ້າງົບປະມານແຫ່ງຊາດໄດ້ທັງໝົດ 756 ຕື້ກວ່າກີບ (ຍັງບໍ່ໄດ້ລວມເງິນປັນຜົນຈາກບັນດາບໍລິສັດໂທລະຄົມຕ່າງໆ), ໃນນີ້ປະກອບມີລາຍຮັບ ຈາກການນຳໃຊ້ຊັບພະຍາກອນໂທລະຄົມມະນາຄົມ ຈຳນວນ 82 ຕື້ກວ່າກີບ ແລະ ການມອບພັນທະອາກອນ ຂອງບັນດາຫົວໜ່ວຍທຸລະກິດ ຈຳນວນ 672 ກວ່າຕື້ກີບ.

ໃນໄລຍະທີ່ມີການແພ່ລະບາດ ຂອງພະຍາດໂຄວິດ-19, ປີ 2021 ກະຊວງ ເຕັກໂນໂລຊີ ແລະ ການສື່ສານ ໄດ້ປະກອບສ່ວນຊ່ວຍເຫລືອສັງຄົມ ເພື່ອຄວບຄຸມ, ແກ້ໄຂ, ຕ້ານ ແລະ ສະກັດກັ້ນ ການແພ່ລະບາດ ຂອງພະຍາດດັ່ງກ່າວ ດ້ວຍການອະນຸຍາດເລກໝາຍໂທລະສັບພິເສດ 163, 164, 165, 166 ໂດຍບໍ່ໄດ້ເກັບຄ່າທໍານຽມ ແລະ ຄ່າບໍລິ ການ ທີ່ມີມູນຄ່າ 100 ລ້ານກີບຕໍ່ປີ ແລະ ໃຫ້ປະຊາຊົນໂທເຂົ້າໂດຍບໍ່ໄດ້ເສຍຄ່າບໍລິການ. ພ້ອມກັນນັ້ນ, ກໍໄດ້ອອກນະໂຍບາຍພິເສດ ເພື່ອຫລຸດຄ່າບໍລິການໂທລະຄົມມະນາຄົມ ແລະ ອິນເຕີເນັດ ແລະ ຊຸກຍູ້ບັນດາຫົວໜ່ວຍທຸລະກິດໂທລະຄົມມະນາຄົມ ສະໜອງການບໍລິການ ແກ່ພາກລັດໂດຍບໍ່ໄດ້ເກັບຄ່າບໍລິການ. ສຳລັບຜູ້ອາວຸໂສ ຢູ່ ສປປ ລາວ ກໍໄດ້ນຳໃຊ້ ແອັບພລິເຄເຊິນ ລາວສູ້ສູ້ ເພື່ອລົງທະບຽນຈອງການຊັກວັກຊິນລ່ວງໜ້າ ໃນການຕ້ານການແພ່ລະບາດຂອງພະຍາດໂຄວິດ-19 ເພື່ອຫລີກລ້ຽງ ບໍ່ໃຫ້ຜູ້ອາວຸໂສໄປຕໍ່ແຖວ ຫລື ລໍຖ້າເປັນເວລາດົນ.

ການສະເຫລີມສະຫລອງ ວັນໂທລະຄົມມະນາຄົມ ສາກົນດັ່ງກ່າວ, ຍັງເປັນການ ສ້າງຈິດສຳນຶກ ແລະ ຄວາມຮັບຮູ້ ໃຫ້ແກ່ທຸກຄົນໃນສັງຄົມ ເປັນຕົ້ນ ຜູ້ສ້າງລະບຽບການ ແລະ ຄຸ້ມຄອງໂທລະຄົມມະນາຄົມ, ຜູ້ປະກອບການ, ຜູ້ຄ້າຂາຍອອນລາຍ ແລະ ຜູ້ຊົມໃຊ້ທັງຫລາຍ ໃຫ້ເຂົ້າໃຈຢ່າງເລິກເຊິ່ງ ເຖິງບົດບາດ ແລະ ຄວາມສຳຄັນຂອງວຽກງານໂທລະຄົມມະນາຄົມ ຕໍ່ການພັດທະນາເສດຖະກິດ-ສັງຄົມ, ພ້ອມກັນນັ້ນ ກໍເພື່ອພັດທະນາວຽກງານໂທລະຄົມມະນາຄົມ ໃຫ້ຊຸກຍູ້ສົ່ງເສີມການຄ້າແບບອອນລາຍ, ການຜະລິດອຸດສາຫະ ກຳໃນຍຸກດີຈິຕອນ ແລະ ການຖ່າຍທອດເຕັກໂນໂລຊີດີຈິຕອນ ທີ່ກ້າວໜ້າຂອງໂລກເຂົ້າມາໃນປະເທດເຮົາ ເພື່ອປະກອບສ່ວນການຈັດຕັ້ງຜັນຂະຫຍາຍ ແຜນພັດທະນາເສດຖະ ກິດດີຈິຕອນ ຂອງປະເທດເຮົາໃຫ້ປະກົດຜົນເປັນຈິງ.

ໃນໂອກາດແຫ່ງການສະເຫລີມສະຫລອງ ວັນໂທລະຄົມມະນາຄົມສາກົນ ໃນປີນີ້, ທ່ານ ບໍ່ວຽງຄໍາ ວົງດາລາ ໄດ້ຮຽກຮ້ອງມາຍັງ ບັນດາທ່ານທັງຫລາຍ ຈົ່ງນໍາໃຊ້ໂທລະຄົມມະນາຄົມໃຫ້ມີຜົນປະໂຫຍດສູງສຸດໃນທຸກໆຂົງເຂດວຽກງານ ແລະ ທົ່ວທຸກຂະແໜງ ການ ທັງພາກລັດ ແລະ ພາກເອກະຊົນ ເພື່ອຫັນການຜະລິດ ແລະ ການບໍລິການເຂົ້າສູ່ລວງເລິກ, ຍົກສູງ ສະມັດຕະພາບການຜະລິດ ແລະ ຄຸນນະພາບຂອງຜະລິດຕະພັນ, ຫັນເປັນທັນສະໄໝ ແລະ ນຳໃຊ້ເຕັກໂນໂລຊີດີຈິຕອນ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແລະ ປະຕິບັດວາລະແຫ່ງຊາດ ໃນການແກ້ໄຂບັນຫາ ເສດຖະກິດ-ການເງິນ ແລະ ບັນ ຫາຢາເສບຕິດ ໃຫ້ປະກົດຜົນເປັນຈິງ.