ແບ່ງຄວາມຮັບຜິດຊອບຂອງ ກອງເລຂາ ຄະນະກຳມະການອະໄພຍະໂທດ ລະດັບຊາດ

ຂປລ. ກອງປະຊຸມແບ່ງຄວາມຮັບຜິດຊອບ ຂອງກອງເລຂາຄະນະກຳມະການອະ ໄພຍະໂທດ ລະດັບຊາດ ຈັດຂຶ້ນເມື່ອບໍ່ດົນມານີ້ ຢູ່ອົງການໄອຍະການປະຊາຊົນສູງສຸດ ພາຍໃຕ້ການເປັນປະທານຂອງ ທ່ານ ບຸນທັນ ບຸນທະວິໄລ ຫົວໜ້າກອງເລຂາຄະນະກໍາມະການອະໄພຍະໂທດ ລະດັບຊາດ, ຮອງຫົວໜ້າອົງການໄອຍະການປະຊາຊົນສູງສຸດ ໂດຍມີບັນດາຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງພະແນກ ທີ່ຮັບຜິດ ຊອບວຽກງານຄະນະກໍາມະການອະໄພຍະໂທດ ລະດັບຊາດ ທີ່ມາຈາກ ກົມຕຳຫລວດຄຸມຂັງ-ດັດສ້າງ ກະຊວງປ້ອງກັນຄວາມສະຫງົບ, ກົມກົດໝາຍ ຫ້ອງວ່າການສຳນັກງານປະທານປະເທດ, ກົມນິຕິກຳ ຫ້ອງວ່າການສຳນັກງານນາຍົກລັດຖະມົນຕີ, ຄະນະສານອາຍາ ສານປະຊາຊົນສູງສຸດ, ກົມຄຸ້ມຄອງການຈັດຕັ້ງປະຕິບັດຄໍາຕັດສິນຂອງສານ ກະຊວງຍຸຕິທໍາ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໃນກອງປະຊຸມ, ທ່ານ ຂັນທະວີ ວິໄລສັກ ຮອງຫົວໜ້າກອງເລຂາຄະນະກໍາມະການອະໄພຍະໂທດ ລະດັບຊາດ, ຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ ພ້ອມດ້ວຍຄະນະກົມ ໄດ້ຜ່ານເນື້ອໃນເອກະສານ ຂໍ້ຕົກລົງ ວ່າດ່ວຍການແຕ່ງຕັ້ງກອງເລຂາຄະນະກໍາມະການອະໄພຍະໂທດ ລະດັບຊາດ ສະບັບເລກທີ 17/ຄອຊ ລົງວັນທີ 29 ເມສາ 2022; ຂໍ້ຕົກລົງວ່າດ້ວຍການແບ່ງຄວາມຮັບຜິດຊອບ ຂອງກອງເລຂາຄະນະກຳມະການອະໄພຍະໂທດ ລະດັບຊາດ ລົງວັນທີ 18/ກລຂ ລົງວັນທີ 05 ພຶດສະພາ 2022 ແລະ ຂໍ້ຕົກລົງວ່າດ້ວຍການແບ່ງຄວາມຮັບຜິດຊອບການຄົ້ນຄວ້າ, ກວດກາ ການສະເໜີໃຫ້ອະໄພຍະໂທດ ປະຈຳປີ 2022 ສະບັບເລກທີ 23 /ຄອຊ. ກລຂ ລົງວັນທີ 12 ພຶດສະພາ 2022. ຈາກນັ້ນ, ບັນດາຜູ້ເຂົ້າຮ່ວມກອງປະຊຸມໄດ້ພ້ອມກັນປຶກສາຫາລື ແລະ ແລກປ່ຽນຄວາມຄິດຄວາມເຫັນ ແນໃສ່ຍົກສູງຄວາມສັກສິດຂອງກົດໝາຍ, ຍົກສູງພາລະບົດບາດ, ສິດ ແລະ ໜ້າທີ່ວຽກງານຂອງ ອົງການໄອຍະການປະຊາຊົນ ໃນການຈັດຕັ້ງປະຕິບັດວຽກງານອະໄພຍະໂທດ ລະດັບຊາດ ເພື່ອເພີ່ມທະວີວຽກງານປະສານສົມທົບ ເເລະ ຮ່ວມມືແຕ່ຂັ້ນສູນກາງ ແລະ ຂັ້ນທ້ອງຖິ່ນ ໃຫ້ໄດ້ຮັບການຈັດຕັ້ງປະຕິບັດໃນຂອບເຂດທົ່ວປະເທດ.

ໃນໂອກາດດັ່ງກ່າວ, ປະທານກອງປະຊຸມໄດ້ຍ້ອງຍໍຊົມເຊີຍຕໍ່ ກອງເລຂາຄະນະກໍາມະການອະໄພຍະໂທດ ລະດັບຊາດ ທີ່ໄດ້ເອົາໃຈໃສ່ຈັດຕັ້ງປະຕິບັດວຽກງານໃນໄລຍະຜ່ານມາ ທີ່ສາມາດຍາດໄດ້ຜົນສຳເລັດ ແລະ ປະຕິບັດໄປຕາມແຜນທີ່ວາງໄວ້. ພ້ອມກັນນັ້ນ, ທ່ານຍັງໄດ້ເນັ້ນຕື່ມ ບາງບັນຫາສຳຄັນ ເປັນຕົ້ນ ຄ່າໃຊ້ຈ່າຍໃນການປັບໄໝການຢັ້ງຢືນຄວາມທຸກຍາກຕ່າງໆຂອງນັກໂທດ; ການສົ່ງຂໍ້ມູນ, ການຫລຸດຜ່ອນຄ່າປັບໄໝໃຫ້ກົມປະຕິບັດຄໍາຕັດສີນຂອງສານ ເພື່ອແຈ້ງຂັ້ນສູນກາງ ແລະ ຂັ້ນທ້ອງຖິ່ນໃນຂອບເຂດທົ່ວປະເທດ; ຄົ້ນຄ້ວາປັບປຸງ ນິຕິກໍາ, ລັດຖະບັນຍັດຂອງປະທານປະເທດ ຫລື ນິຕິກໍາອື່ນໆ ໃຫ້ຖືກຕ້ອງສອດຄອງກັບວຽກງານອະໄພຍະໂທດ ລະດັບຊາດ ໃນປັດຈຸບັນ; ປັບປຸງຂັ້ນຂອດການລາຍງານໃຫ້ວ່ອງໄວ ຮັບປະກັນຄວາມຖືກຕ້ອງຕາມເວລາ; ຄົ້ນຄວ້າຜົນງານໃນການຍໍຍ້ອງຂອງຄະນະກໍາມະການ ຫລື ກອງເລຂາຄະນະກຳມະການ ອະໄພຍະໂທດ ລະດັບຊາດ ຂັ້ນຕ່າງໆ; ການຄົ້ນຄວ້າອະໄພຍະໂທດຜູ້ທີ່ບໍ່ມີຄໍາຮ້ອງ ແລະ ບັນຫາອື່ນໆ ທີ່ກຳນົດໄວ້ໃຫ້ມີຄວາມສຳເລັດຢ່າງຕັ້ງໜ້າ ແລະ ມີປະສິດທິຜົນ.