ເຊີນສົ່ງບົດຂຽນເຂົ້າແຂ່ງຂັນ ເພື່ອສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022
ວັນທີ 16 ພຶດສະພາ 2022 ນີ້ ຄະນະໂຄສະນາອົບຮົມສູນກາງພັກ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ສະ ມາຄົມນັກປະພັນລາວ ໄດ້ຮ່ວມກັນປຸກລະດົມຂະບວນການແຂ່ງຂັນກວດສອບປະພັນວັນນະຄະດີທົ່ວປະເທດເພື່ອສະເຫຼີມສະຫຼອງປິສາມັກຄີມິດຕະພາບລາວ-ຫວຽດນາມ ປີ 2022 ໂດຍທ່ານ ຄຳພັນ ເຜີຍຍະວົງ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ຮອງປະທານຄະນະຊີ້ນຳລະດັບຊາດເພື່ອສະເຫຼີມສະຫຼອງປີສາ ມັກຄີມິດຕະພາບ ລາວ-ຫວຽດນາມ 2022 ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ ຜິວລາວັນ ຫລວງວັນນາ ຮອງປະທານສະມາຄົມນັກປະພັນລາວ ກ່າວວ່າ: ກິດຈະກຳແຂ່ງຂັນບົດປະພັນວັນນະຄະດີ ແລະ ຈັດພິມປຶ້ມຜົນງານ ມີ 4 ປະເພດຄື ເລື່ອງຍາວ(ນະວະນິຍາຍ), ເລື່ອງສັ້ນ, ບົດບັນທຶກ(ບົດຫວນຄືນ, ເລື່ອງຈິງຄົນແທ້) ແລະ ກະວີ(ກາບກອນເລົ່າເລື່ອງ, ສັນລະເສີນມູນເຊື້ອ) ໂດຍ ວັນທີ 30 ມິຖຸນາ 2022 ປິດຮັບບົດຂອງນັກຂຽນກິດຕິມະສັກ, ວັນທີ 16 ສິງຫາ 2022 ປິດຮັບບົດແຂ່ງ ຂັນ ແລະ ວັນທີ 1 ກັນຍາ 2022 ປະກາດຜົນ, ມອບລາງວັນ ແລະ ຈັດພິມປຶ້ມສຳ ເລັດ. ຂະນະທີ່ລາງ ວັນນັ້ນ, ລາງວັນທີ 1 ມີ 2 ລາງວັນໆລະ 5 ລ້ານກີບພ້ອມໃບກຽດຕິຄຸນ, ລາງວັນທີ 2 ມີ 4 ລາງວັນໆລະ 4 ລ້ານກີບພ້ອມໃບກຽດຕິຄຸນ, ລາງວັນທີ 3 ມີ 6 ລາງວັນໆລະ 3 ລ້ານກີບພ້ອມໃບກຽດຕິຄຸນແລະ ລາງວັນຊົມເຊີຍ ມີ 30 ລາງວັນໆລະ 1 ລ້ານກີບພ້ອມໃບກຽດຕິຄຸນ, ສຳລັບປຶ້ມ ຈະພິມ 3 ຫົວເລື່ອງ ປະມານ 6.000 ຫົວ.
ທ່ານ ຄຳພັນ ເຜີຍຍະວົງ ເນັ້ນວ່າ:ເພື່ອຈັດຕັ້ງສະເຫຼີມສະຫຼອງວັນປະຫວັດສາດດັ່ງກ່າວໃຫ້ມີຄວາມໝາຍເລິກເຊິ່ງ ມີເນື້ອໃນໜັກແໜ້ນ, ສູນກາງພັກ ປປ ລາວ ໄດ້ຊີ້ນໍາແຜນການຈັດຕັ້ງສະເຫຼີມສະຫຼອງຫຼາຍກິດຈະກໍາທີ່ຫວນຄືນ, ລະນຶກເຖິງປະຫວັດສາດແຫ່ງການພົວພັນຮ່ວມມືຂອງສອງຊາດ ເພື່ອໃຫ້ບົດຮຽນໃຫ້ແກ່ຄົນຮຸ່ນໃໝ່ ໂດຍກິດຈະກໍາທີ່ຈະຫວນຄືນ, ລະນຶກມູນເຊື້ອສາມັກຄີມິດຕະພາບໄດ້ຢ່າງລະອຽດ ແລະ ມີຊີ ວິດຊີວາ ແມ່ນການບັນທຶກຂຽນຄືນໃນຮູບແບບວັນນະຄະດີ, ບົດເລື່ອງ, ບົດກາບກອນ ກະວີ ເຊິ່ງນັກປະ ພັນ, ນັກກະວີ, ນັກຂຽນປະຫວັດມູນເຊື້ອ ໃຫ້ເນັ້ນໃສ່ສະເພາະການຂຽນຄືນມູນເຊື້ອຄວາມສາມັກຄີມິດຕະ ພາບ ແລະ ການຮ່ວມມື ລະຫວ່າງລາວ ແລະ ຫວຽດນາມ ພ້ອມດ້ວຍຂໍ້ຄິດເຫັນທີ່ກ່ຽວພັນເຖິງການຂຽນແນວໃດ ເພື່ອໃຫ້ຫວນຄືນມູນເຊື້ອອັນດີງາມໄດ້ຢ່າງເລິກເຊິ່ງເຖິງຖອງ ແລະ ໜ້າສົນໃຈຂອງຜູ້ອ່ານ.
ທ່ານກ່າວຕື່ມວ່າ: ເພື່ອໃຫ້ຄົນຮຸ່ນປັດຈຸບັນ ແລະ ອະນາຄົດຮັບຮູ້, ເຂົ້າໃຈ ແລະ ສືບທອດ, ເສີມຂະ ຫຍາຍສາຍພົວພັນສາມັກຄີມິດຕະພາບແບບພິເສດ ທີ່ມີໜຶ່ງດຽວໃນໂລກ, ເປັນແວ່ນແຍງໃສແຈ້ງ, ເປັນມໍ ລະດົກອັນປະເສີດຂອງສອງຊາດ ລາວ-ຫວຽດນາມ ຕ້ອງໄດ້ທົບທວນຫວນຄືນ, ບັນທຶກຈົດຈໍາການພົວ ພັນຮ່ວມມືດັ່ງກ່າວໃນຮູບແບບວັນນະຄະດີ ທີ່ສາມາດຂຽນໄດ້ຢ່າງເລິກເຊິ່ງ, ດຶງດູດຄວາມສົນໃຈຂອງມວນຊົນແລ້ວຈັດພິມເປັນປຶ້ມເຜີຍແຜ່ໃຫ້ມວນຊົນໄດ້ສຶກສາ, ຮຽນຮູ້, ນັກປະພັນ, ນັກຂີດຂຽນທັງຫຼາຍມີຄວາມສໍາຄັນ ແລະ ມີຄວາມສາມາດຊອກຄົ້ນບົດຮຽນອັນດີງາມ, ອັນລະອຽດໃນຕົວຈິງໃນອະດີດ ແລະ ປັດຈຸບັນມາຂຽນ, ປະດິດແຕ່ງດ້ວຍສິລະປະ.
ສະເພາະຂຽນວັນນະຄະດີ ພາຍໃຕ້ຫົວເລື່ອງ ການພົວພັນຮ່ວມມືແບບພິເສດລະຫວ່າງ ລາວ-ຫວຽດນາມຈຶ່ງເປັນໜ້າທີ່ຂອງນັກປະພັນ, ນັກຂຽນທັງຫຼາຍ ຂຽນຄືນຄວາມເປັນຈິງແຫ່ງການພົວພັນຮ່ວມມືລາວ-ຫວຽດນາມ ໃຫ້ຜູ້ອ່ານເຫັນໄດ້ຮູບແບບວິທີການ, ໝາກຜົນຂອງການ ພົວພັນຮ່ວມມືທຸກດ້ານ, ທຸກຂະແໜງການຕະຫຼອດໄລຍະປະຫວັດສາດການປະຕິວັດຂອງສອງປະເທດ, ໃຫ້ຜູ້ອ່ານຮູ້ເຖິງຈິດໃຈສາມັກຄີ, ຮັກແພງລະຫວ່າງພະນັກງານ, ທະຫານ, ປະຊາຊົນລາວ ແລະ ຫວຽດ ນາມ. ຜ່ານມາ, ມີບົດປະພັນວັນນຄະດີ ຂຽນກ່ຽວກັບຫົວເລື່ອງນີ້ຫຼາຍແລ້ວ, ແຕ່ສ່ວນຫຼາຍສ່ອງແສງເຖິງການຮ່ວມສູ້ຮົບໃນໄລຍະຕໍ່ສູ້ກູ້ຊາດ.
ສ່ວນການຂຽນຄັ້ງນີ້ ຂໍໃຫ້ຂຽນສ່ອງແສງຕະຫຼອດໄລຍະການພົວພັນຮ່ວມມືຂອງສອງປະເທດ, ຂຽນເຖິງໄລຍະການຕໍ່ສູ້ກູ້ຊາດກໍດີ, ແຕ່ພິເສດໃຫ້ມີບົດຂຽນເຖິງການພົວພັນຮ່ວມມືໃນໄລຍະສ້າງສາພັດທະນາປະເທດຊາດ ໂດຍສະເພາະໄລຍະດໍາເນີນພາລະກິດປ່ຽນແປງໃໝ່ຢູ່ແຕ່ລະປະເທດ ຍ້ອນວ່າບົດວັນນະຄະດີຂຽນກ່ຽວກັບໄລຍະນີ້ ບໍ່ທັນມີຫຼາຍ ແຕ່ບົດຮຽນ, ແບບຢ່າງອັນດີແຫ່ງການພົວພັນຮ່ວມມືມີຫລາຍ ມີທຸກໆຂົງເຂດວຽກງານ, ຂະແໜງການຂອງທັງສອງຊາດ.ເພື່ອໃຫ້ບົດປະພັນ ຂອງຕົນສ່ອງແສງໄດ້ຄວາມເປັນຈິງ ທີ່ເປັນບົດຮຽນອັນລໍ້າຄ່າ, ຜູ້ຂຽນຄວນໄດ້ຊອກຮູ້, ຄົ້ນຫາຂໍ້ມູນນໍາພະ ນັກງານ, ທະຫານ, ປະຊາຊົນ ທີ່ເຄີຍໄດ້ຜ່ານປະສົບການ ຫຼື ຮູ້ຈັກການພົວພັນຮ່ວມມື ລາວ-ຫວຽດນາມ ໃນຫົວເລື່ອງທີ່ຕົນຈະຂຽນ, ອົງການຈັດຕັ້ງສະມາຄົມ, ອົງການລັດທີ່ກ່ຽວຂ້ອງ ຕ້ອງສ້າງເງື່ອນໄຂ ແລະ ອໍານວຍຄວາມສະດວກໃຫ້ຜູ້ຈະຂຽນເກັບກໍາຂໍ້ມູນ, ເຖິງວ່າບໍ່ໄດ້ຊ່ວຍໃຊ້ຈ່າຍ ກໍຊ່ວຍແນະນໍາຕິດຕໍ່ປະສານງານ ຫຼື ອອກໜັງສືພົວພັນເກັບກໍາຂໍ້ມູນນໍາບຸກຄົນ ແລະ ສະຖານທີ່ກ່ຽວຂ້ອງ.
