ເທນ ຮາກ ຢືນຢັນບໍ່ປ່ອຍ ໂຣນັລໂດ ອອກຈາກທີມໃນລະດູການຫນ້າ

ເອຣິກ ເທນ ຮາກ ຜູ້ຈັດການທີມຄົນໃຫມ່ຂອງ ແມນເຊສເຕີ ຢູໄນເຕັດ ຢືນຢັນວ່າຈະບໍ່ປ່ອຍ ຄຣິສຕຽນໂນ ໂຣນັລໂດ ກອງຫນ້າຊຸບເປີສະຕາອອກຈາກທີມໃນລະດູການຫນ້າ ພ້ອມຕັ້ງຕາລໍຖ້າທີ່ຈະໄດ້ຮ່ວມງານກັບດາວເຕະຄົນນີ້ນຳອີກ.

ສຳລັບອະນາຄົດຂອງ ໂຣນັລໂດ ກັບ ແມນເຊສເຕີ ຢູໄນເຕັດ ເຕັມໄປດ້ວຍຄວາມບໍ່ແນ່ນອນ ຈາກຫລາຍປັດໄຈ ທັງຜົນງານຂອງ ແມນຢູ ໃນລະດູການນີ້ຫນ້າຜິດຫວັງດ້ວຍການພາດແຊ໊ມທຸກລາຍການ ແລະ ພາດໂຄຕ້າໄປຫລິ້ນໃນການແຂ່ງຂັນ ຢູຟາ ແຊ໊ມປຽນລີກ ລະດູການນີ້.

ລວມເຖິງການທີ່ ແມນຢູ ໄດ້ ເອຣິກ ເທນ ຮາກ ຜູ້ຈັດການທີມຊາວຮອນແລນ ເຂົ້າມາເຮັດຫນ້າທີ່ຜູ້ຈັດການທີມຄົນໃຫມ່ ແລະ ຍັງບໍ່ມີການຢືນຢັນວ່າ ດາວເຕະອາຍຸ 37 ປີຈະຢູ່ໃນແຜນການເຮັດທີມຂອງລາວຫລືບໍ່.

ແນວໃດກໍຕາມ ຫລ້າສຸດ ເທນ ຮາກ ໄດ້ໃຫ້ສຳພາດເຖິງອະນາຄົດຂອງ ໂຣນັລໂດ ກັບທີມວ່າຕົນເອງບໍ່ມີແຜນທີ່ຈະປ່ອຍ ໂຣນັລໂດ ອອກຈາກສະໂມສອນ ຕັ້ງຕາຖ້າຮ່ວມງານກັບດາວຍິງທີມຊາດໂປຣຕຸເກສລາຍນີ້ ລາວຄືສຸດຍອດ.

‘‘ ຂ້ອຍຄິດວ່າລາວຍັງມີຄວາມທະເຍີທະຍານຫລາຍ ລາວມີຄວາມສຳຄັນຢ່າງຍິ່ງສຳລັບ ແມນເຊສເຕີ ຢູໄນເຕັດ ໃນປີນີ້ ແລະມີສະຖິິຕິທີ່ຍອດຢ້ຽມ ຂ້ອຍກັບແມນເຊສເຕີ ຢູໄນເຕັດ ໃຈກົງກັນໃນຫລາຍສິ່ງທີ່ຈະຕ້ອງໄດ້ຮັບການແກ້ໄຂ ແລະວິທີທີ່ຂ້ອຍຕ້ອງການເຮັດແບບນັ້ນ ’’.