ຫວຽດນາມ ກຽມຫ້າມນຳໃຊ້ ‘ຖົງປລາສຕິກ’ ພາຍໃນປີ 2030

ວັນທີ 14 ພຶດສະພາ 2022,​ ສຳນັກຂ່າວຫວຽດນາມລາຍງານວ່າ: ຫວຽດນາມຈະສັ່ງຫ້າມນຳໃຊ້ “ຖົງປລາສຕິກ” ທັງໝົດ ເຊິ່ງລວມທັງຖົງປລາສຕິກໃນຕະຫລາດ ພາຍໃນປີ 2030.

ລາຍງານອ້າງອີງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຫວຽດນາມ ເຊິ່ງເຜີຍວ່າ: ຫວຽດນາມຍັງຕັ້ງເປົ້າໃຫ້ສູນການຄ້າ ແລະ ຊຸບເປີມາເກັດປ່ຽນມາໃຊ້ຖົງທີ່ເປັນມິດກັບສິ່ງແວດລ້ອມ ພາຍໃນປີ 2025.

ຜົນສຳຫລວດໂດຍສະຖາບັນຍຸດທະສາດ ແລະ ນະໂຍບາຍດ້ານຊັບພະຍາກອນ ແລະ ສິ່ງແວດລ້ອມແຫ່ງຊາດ ສັງກັດກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຊີ້ວ່າ: ຊຸບເປີມາເກັດຂອງຫວຽດນາມໃຊ້ຖົງປລາສຕິກແບບໃຊ້ເທື່ອດຽວຖິ້ມສູງເຖິງ 104.000 ໜ່ວຍຕໍ່ວັນ ຫລື 38 ລ້ານໜ່ວຍຕໍ່ປີ.

ດ້ານທະນາຄານໂລກລະບຸວ່າ: ຊາວຫວຽດນາມໃຊ້ປລາສຕິກປະມານ 3,9 ລ້ານໂຕນຕໍ່ປີ, ແຕ່ປລາສຕິກທີ່ຖືກນຳເອົາກັບມາໃຊ້ໃໝ່ມີພຽງ 1,28 ລ້ານໂຕນເທົ່ານັ້ນ. ພ້ອມກ່າວວ່າ: ປລາສຕິກມັກຖືກນຳໄປໃຊ້ໃນຫລາຍອຸດສາຫະກຳຂອງປະເທດເຊັ່ນ: ບັນຈຸພັນ, ສິນຄ້າອຸປະໂພກ-ບໍລິໂພກ, ເອເລັກໂຕຣນິກ, ລົດຍົນ, ການບິນ, ຕັດຫຍິບ ແລະ ກະສິກຳ.