ບາງຕົວຢ່າງຄວາມຜິດທີ່ຕ້ອງ ໄດ້ຮັບໂທດຢູ່ຕ່າງປະເທດ
ໂດຍ: ວິເສດ ສະແຫວງສຶກສາ
ມີບາງການກະທຳທີ່ພວກເຮົາອາດເຫັນວ່າເປັນເລື່ອງທຳມະດາ, ແຕ່ຢູ່ບາງປະເທດນັ້ນເຂົາຖືກັນເປັນໂທດໜັກໂທດໜາເຖິງຂັ້ນປັບໄໝໃສ່ໂທດ ເຊັ່ນຢູ່ປະເທດ ຊາອຸດີ ອາຣາບີ ໄດ້ມີຂ່າວອອກມາໃນທ້າຍເດືອນທັນວາປີ 2016 ວ່າ: ຊາຍຄົນໜຶ່ງຖືກສານຕັດສິນຈຳຄຸກເປັນເວລາ 1 ປີ ຍ້ອນພຽງແຕ່ຮຽກຮ້ອງໃຫ້ທາງການຍົກເລີກລະບົບໃຫ້ຜູ້ຊາຍມີສິດຄວບຄຸມຊະຕາກຳຂອງແມ່ຍິງໃນຄອບຄົວ. ໝາຍຄວາມວ່າ: ໃນຄອບຄົວໜຶ່ງໆ ຜູ້ເປັນພໍ່, ເປັນຜົວ, ເປັນອ້າຍ ຫລື ນ້ອງຊາຍ ມີສິດເດັດຂາດໃນການຄຸ້ມຄອງບັນຊາສະມາຊິກເພດຍິງໃນຄອບຄົວ. ຄະດີທີ່ວ່ານີ້ເກີດຂຶ້ນຢູ່ເມືອງດາມມຳ (Dammam) ໃນພາກຕາເວັນອອກຂອງປະເທດ, ເມື່ອຊາຍຄົນໜຶ່ງເຄື່ອນໄຫວຕິດປ້າຍປົດສະເຕີຮຽກຮ້ອງໃຫ້ທາງການຍົກເລີກລະບົບໃຫ້ຜູ້ຊາຍເປັນເຈົ້າຄວບຄຸມບັນຊາແມ່ຍິງ. ນອກຈາກການຕິດຕັ້ງປ້າຍຮຽກຮ້ອງແລ້ວ ຜູ້ກ່ຽວຍັງໄດ້ລົງຂໍ້ຄວາມຮຽກຮ້ອງຜ່ານສື່ສັງຄົມອອນລາຍອີກດ້ວຍ. ນອກຈາກໂທດຈຳຄຸກ 1 ປີແລ້ວ, ຜູ້ຕ້ອງໂທດຍັງຖືກປັບໄໝເປັນເງິນ 30.000 ຣີຢານ (Riyals)(ປະມານ 6.000 ໂດລາສະຫະລັດ) ທີ່ຫ້ອງການສານ, ຊາຍຜູ້ເຄື່ອນໄຫວເພື່ອສິດທິເທົ່າທຽມຂອງເພດຍິງບອກວ່າ: ເຂົາເຮັດໄປພຽງເພື່ອປຸກລະດົມຈິດສຳນຶກກ່ຽວກັບບັນຫາ ພາຍຫລັງເຫັນວ່າມີແມ່ຍິງຈຳນວນຫລາຍໄດ້ຮັບຜົນກະທົບຈາກລະບົບດັ່ງກ່າວ.
ສ່ວນຢູ່ເມືອງບາຕຳ (Batam) ຂອງ ອິນໂດເນເຊຍ ກໍມີຄະດີ ເຊິ່ງຫລາຍຄົນອາດຄິດບໍ່ເຖິງວ່າຈະມີໂທດເຖິງຂັ້ນຕັດອິດສະຫລະພາບ. ເລື່ອງມີຢູ່ວ່າ: ຊາຍນັກທ່ອງທ່ຽວຄົນຣັດເຊຍທີ່ໄປທ່ອງທ່ຽວຢູ່ເມືອງດັ່ງກ່າວນັ້ນໄດ້ນຸ່ງເສື້ອຍືດຄໍມົນທີ່ມີຮູບກ່ຽວ ແລະ ຄ້ອນຕີ (ຂ່າວ The Nation 02/01/2017) ເຊິ່ງເຂົາຊື້ໄປຈາກຫວຽດນາມ. ໃນຂະນະຍ່າງກິນລົມຊົມວິວຢູ່ນັ້ນ ກໍໄດ້ມີກຸ່ມຄົນເຂົ້າມາ ແລະ ບອກນັກທ່ອງທ່ຽວວ່າ: ເຂົາລະເມີດກົດໝາຍ ຍ້ອນນຸ່ງເສື້ອທີ່ມີຮູບກ່ຽວ ແລະ ຄ້ອນຕີ ເຊິ່ງຖືວ່າເປັນເຄື່ອງໝາຍລະບອບກອມມູນິດ. ນັກທ່ອງທ່ຽວຣັດເຊຍ (ຊື່ ອີກໍຣຽບຈຸກ Igor Riabchuk) ຖືກກຸ່ມຄົນດັ່ງກ່າວຄຸມຕົວໄປຫ້ອງການຕຳຫລວດ. ເຈົ້າໜ້າທີ່ໄດ້ຢຶດເສື້ອຍືດເຂົາໄວ້ກ່ອນຈະປ່ອຍເຂົາກັບໂຮງແຮມ ໂດຍໃຫ້ເຫດຜົນວ່າເຂົາບໍ່ເປັນພິດເປັນໄພ ເພາະເປັນພຽງນັກທ່ອງທ່ຽວ. ກ່ອນໜ້ານັ້ນເລັກໜ້ອຍ ນັກທ່ອງທ່ຽວສິງກະໂປກໍຖືກຄວບຄຸມຕົວ ຍ້ອນນຸ່ງເສື້ອຍືດທີ່ມີກາກ່ຽວ ແລະ ຄ້ອນຕີ. ກົດໝາຍອິນໂດເນເຊຍຍັງກຳນົດຫ້າມການກະທຳທີ່ຖືວ່າເປັນກອມມູນິດ ລວມທັງການນຸ່ງຖື ຫລື ມີວັດຖຸທີ່ມີເຄື່ອງໝາຍກ່ຽວກັບລະບອບກອມມູນິດ ເຊິ່ງຜູ້ລະເມີດມີໂທດເຖິງຕິດຄຸກ. ສຳລັບນັກທ່ອງທ່ຽວຣັດເຊຍ ແລະ ສິງກະໂປນັ້ນໄດ້ຮັບການອະນຸໂລມ ຍ້ອນເປັນພຽງນັກທ່ອງທ່ຽວ. ເລື່ອງນີ້ຮູ້ໄວ້ໄດ້ປະໂຫຍດສຳລັບຜູ້ທີ່ຕ້ອງການໄປເຄື່ອນໄຫວ ຫລື ທ່ອງທ່ຽວຢູ່ອິນໂດເນເຊຍ. ເລື່ງຕໍ່ໄປເປັນຄະດີຈາກຄຳເວົ້າໝິ່ນປະໝາດເພດຍິງ ເຊິ່ງບໍ່ມີໃຜຄາດຄິດວ່າມັນຈະອອກມາຈາກປາກສະມາຊິກ ລັດຖະສະພາເອີຣົບ (ອີຢູ EU) ຄົນໜຶ່ງ. ເລື່ອງນີ້ເກີດຂຶ້ນໃນວັນທີ 14 ມີນາປີນີ້ (ວຽງຈັນໃໝ່ 16/03/2017) ເມື່ອທ່ານ ຢຸນຸດ ຄໍວິນ ມິກກີ (Janusz Korwin-Mikke) ສະມາຊິກລັດຖະສະພາເອີຣົບ ສັນຊາດໂປໂລຍ ທີ່ໄດ້ສະເໜີຕໍ່ລັດຖະສະພາເອີຣົບວ່າ: “ຄວນຈ່າຍເງິນເດືອນໃຫ້ແມ່ຍິງໜ້ອຍກວ່າຜູ້ຊາຍ ເພາະວ່າແມ່ຍິງມີຄວາມອ່ອນແອກວ່າ ແລະ ສະຫລາດໜ້ອຍກວ່າຜູ້ຊາຍ”. ຈາກປະໂຫຍກຄຳເວົ້າທີ່ມີບໍ່ພໍເທົ່າໃດພະຍາງນີ້, ທ່ານຜູ້ແທນ ຢານຸດ ອາຍຸ 74 ປີ ກໍຖືກລັດຖະສະພາເອີຣົບຕັດສິນລົງໂທດດ້ວຍການປັບໄໝທາງບໍລິຫານ ຄືຕັດເງິນອຸດໜູນປະຈຳວັນ (Per diem) ຂອງເຂົາເປັນເວລາ 30 ວັນ ຕົກເປັນເງິນຈຳນວນ 9.210 ເອີໂຣ, ຖືກງົດສິດເຂົ້າຮ່ວມການເຄື່ອນໄຫວຂອງລັດຖະສະພາເປັນເວລາ 10 ວັນ ແລະ ຖືກຫ້າມເຮັດໜ້າທີ່ເປັນຕົວແທນໃຫ້ລັດຖະສະພາເອີຣົບເປັນເວລາ 1 ປີ. ບັນຫາຄວາມສະເໝີພາບຍິງ-ຊາຍເປັນເລື່ອງທີ່ກະທົບໄວ, ຖ້າບໍ່ລະວັງກໍຈະເກີດກໍລະນີ “ໄວປາກເສຍສິນ-ໄວຕີນຕົກກົກໄມ້” ຄືຜູ້ແທນ ຢານຸດ ຄົນນີ້ແລ !.
