ທ່ານ ໄບເດນ ຫາທາງແກ້ໄຂວິກິດນົມຜົງຂາດຕະຫລາດ ເລັ່ງນຳເຂົ້າຈາກຕ່າງປະເທດ
ປະທານາທິບໍດີອາເມລິກາ ຫາລືກັບຫລາຍຝ່າຍທີ່ກ່ຽວຂ້ອງ ເພື່ອຫາທາງແກ້ໄຂວິກິດຂາດເຂີນນົມຜົງສຳລັບເດັກນ້ອຍໃນປະເທດ.
ວັນທີ 13 ພຶດສະພາ 2022, ສຳນັກຂ່າວຕ່າງປະເທດລາຍງານວ່າ: ປະທານາທິບໍດີ ໂຈ ໄບເດນ ພົບປະຫາລືກັບຜູ້ບໍລິຫານລະດັບສູງຂອງບໍລິສັດຜະລິດນົມຜົງຫລາຍແຫ່ງຂອງອາເມລິກາ ແລະ ຕົວແທນຈາກບໍລິສັດຂາຍຍ່ອຍຂະໜາດໃຫຍ່ ລວມທັງວໍມາດ ແລະ ທາຣເກັດ ກ່ຽວກັບວິກິດຂາດເຂີນນົມຜົງສຳລັບເດັກນ້ອຍ.
ຜູ້ນຳອາເມລິກາກຳລັງພິຈາລະນາມາດຕະການຫລາຍຂໍ້ ເຊິ່ງລວມທັງການໃຊ້ກົດໝາຍການຜະລິດໃນຍາມສົງຄາມ (Defense Production Act) ເຊິ່ງຈະເປັນການທີ່ປະທານາທິບໍດີມີອຳນາດໂດຍກົງ ໃນການສັ່ງໃຫ້ຜູ້ປະກອບການຕ້ອງຜະລິດສິນຄ້າ ແລະ ຈັດລຳດັບຄວາມສຳຄັນຂອງສິນຄ້າທີ່ຕ້ອງຜະລິດ ເມື່ອເກີດສະພາບຂາດເຂີນ ໂດຍທ່ານ ໄບເດນ ແລະ ຜູ້ນຳອາເມລິກາຄົນກ່ອນໜ້າ ຄືປະທານາທິບໍດີ ໂດນັລ ທຣຳ ເຄີຍໃຊ້ກົດໝາຍນີ້ມາແລ້ວ ໃນໄລຍະທີ່ປະເທດກຳລັງຜະເຊີນສະຖານະການພະຍາດໂຄວິດ-19 ຂັ້ນວິກິດ.
ຂະນະດຽວກັນ, ທ່ານ ໄບເດນ ສັ່ງໃຫ້ຄະນະກຳມະການການຄ້າແຫ່ງຊາດ (FTC) ກວດສອບວ່າມີການກັກຕຸນສິນຄ້າ ແລະ ການຂຶ້ນລາຄາໂດຍບໍ່ມີເຫດຜົນສົມຄວນ ຫລື ບໍ່. ດ້ານຄະນະກຳມະການອາຫານ ແລະ ຢາ (FDA) ກຽມປະກາດມາດຕະການ ເຊິ່ງລວມທັງການນຳເຂົ້ານົມຜົງຈາກຕ່າງປະເທດ.
ທັງນີ້, ອາເມລິກາປະສົບສະພາບຂາດເຂີນນົມຜົງມາຫລາຍເດືອນແລ້ວ ໂດຍເປັນຜົນມາຈາກອຸປະສັກຫລາຍປະການທີ່ເກີດຂຶ້ນກັບຕ່ອງໂສ້ອຸປະທານ ແລະ ສະພາບເງິນເຟີ້ທີ່ສູງຂຶ້ນໃນຮອບຫລາຍທົດສະວັດ ສົ່ງຜົນໃຫ້ປະລິມານການຜະລິດ ແລະ ການກະຈາຍນົມຜົງໃນປະເທດຫລຸດລົງປະມານ 40%.
ອີກຢ່າງໜຶ່ງ, ບັນຫາເລື່ອງການຂາດເຂີນນົມຜົງໃນອາເມລິກາຍິ່ງເຮັດໃຫ້ລັດຖະບານ ໄບເດນ ແລະ ສະພາຄອງເກຣດ ຕົກເປັນເປົ້າໝາຍຂອງການວິຈານຈາກຊາວອາເມລິກາຫລາຍຂຶ້ນ ເນື່ອງຈາກໃນອາທິດນີ້ ສະພາຜູ້ແທນລາຊະດອນຜ່ານຮ່າງງົບປະມານຊ່ວຍເຫລືອຢູເຄຣນສະບັບໃໝ່ ເປັນວົງເງິນເກືອບ 40.000 ລ້ານໂດລາ ໂດຍພັກລີພັບລິກັນວິຈານເລື່ອງນີ້ຢ່າງໜັກ.
