67 ປີວຽກງານສື່ຍິ່ງແກ່ຍິ່ງມັນ
ໂດຍ: ທ່ຽງທຳ
ເພື່ອນຜູ້ອ່ານທີ່ຮັກແພງ, ຍັງອີກ 2 ມື້ ອົງການສື່ມວນຊົນເຮົາກໍຈະໄດ້ພ້ອມກັນສະຫລອງວັນກຳເນີດຂອງຕົນຄົບຮອບ 67 ປີ (13 ສິງຫາ 1950 – 13 ສິງຫາ 2017) ດ້ວຍຄວາມເອກອ້າງທະນົງໃຈບົນເສັ້ນທາງດັ່ງກ່າວ, ຖ້າແມ່ນຄົນກໍກ້າວສູ່ອາຍຸກະສຽນບຳນານແລ້ວ ແຕ່ວຽກງານພັດຍິ່ງແກ່ຍິ່ງມັນ ແລະ ຍິ່ງມີບົດຮຽນ ແລະ ປະສົບການ.
ໃນຄວາມຈິງກໍແມ່ນແນວນັ້ນແທ້, ມາຮອດປັດຈຸບັນກຳລັງສື່ມວນຊົນເຮົາໄດ້ກ້າວໜ້າຂະຫຍາຍຕົວ ແລະ ນັບມື້ທັນສະໄໝ. ຖ້າໄລ່ຈຳນວນສື່ສິ່ງພິມກຳນັບເປັນຮ້ອຍ ແລະ ສະເພາະໜັງສືພິມລາຍວັນກໍມີຫລາຍກວ່າ 10 ສະບັບ ເມື່ອທຽບໃສ່ແຕ່ກ່ອນກໍມີພຽງໜັງສືພິມປະຊາຊົນເທົ່ານັ້ນ, ສ່ວນສື່ເອເລັກໂຕຣນິກ ດັ່ງວິທະຍຸກະຈາຍສຽງກໍມີ 63 ສະຖານີ, ຖ້າທຽບໃສ່ 5 ປີກ່ອນນີ້ກໍເພີ່ມຂຶ້ນຫລາຍເຖິງ 20 ສະຖານີ, ສ່ວນໂທລະພາບກໍເພີ່ມຂຶ້ນເປັນ 37 ສະຖານີ ແລະ ທຸກແຂວງໄດ້ມີສະຖານີໂທລະພາບຂອງຕົນ, ການກະຈາຍສຽງ ແລະ ພາບກໍນັບມື້ກວ້າງຂວາງ ສຳລັບກະຈາຍພາກພື້ນດິນກໍສາມາດກວມເອົາ 80-90% ຂອງເນື້ອທີ່ທົ່ວປະເທດ ແລະ ກະຈາຍຜ່ານດາວທຽມ ແລະ ລະບົບອິນເຕີເນັດກວມເອົາ 100%, ສ່ວນສື່ໃໝ່ (New Media) ກໍມີການຂະຫຍາຍຕົວຢ່າງແຂງແຮງໄປຕາມກະແສຂອງໂລກ IT. ປັດຈຸບັນເກືອບວ່າທຸກສື່ມວນຊົນລາວໄດ້ມີເວັບໄຊເປັນຂອງຕົນເອງ ແລະ ສາມາດນຳໃຊ້ທຸກຊ່ອງທາງທີ່ມີຢູ່ໃນລະບົບອິນເຕີເນັດ ອັນໄດ້ຊ່ວຍໃຫ້ການນຳສົ່ງຂໍ້ມູນຂ່າວສານລະຫວ່າງພາຍໃນ ແລະ ຕ່າງປະເທດໄດ້ວ່ອງໄວ ແລະ ກວ້າງຂວາງກວ່າເກົ່າ.
ແຕ່ຄຽງຄູ່ກັນນັ້ນ ເມື່ອທຽບກັບຄວາມຮຽກຮ້ອງຕ້ອງການຂອງໜ້າທີ່ການເມືອງແລ້ວ ແມ່ນກຳລັງສື່ເຮົາຍັງຈະຕ້ອງໄດ້ເພີ່ມທະວີການປັບປຸງຕົນເອງຫລາຍດ້ານ ເພື່ອເຮັດແນວໃດໃຫ້ຮູບແບບ ແລະ ເນື້ອໃນມີຄວາມດຶງດູດ ແລະ ຈັບອົກຈັບໃຈຜູ້ອ່ານ, ຜູ້ເບິ່ງ, ຜູ້ຟັງໄດ້ຫລາຍຂຶ້ນ, ການໂຄສະນາເຜີຍແຜ່ຂໍ້ມູນຂ່າວສານໃຫ້ຫລາກຫລາຍ ແລະ ອຸດົມສົມບູນໄປດ້ວຍເນື້ອໃນທີ່ເປັນປະໂຫຍດ ສາມາດສ່ອງແສງຄວາມເປັນຈິງຂອງຊີວິດສັງຄົມ ແລະ ຮູ້ເລືອກເຟັ້ນເອົາການຕຳນິຕິຊົມ ແລະ ຄຳຄິດຄຳເຫັນຂອງມະຫາຊົນມາສ່ອງແສງຜ່ານສື່ໃຫ້ຫລາຍ. ພ້ອມນັ້ນ ຜູ້ເຮັດວຽກສື່ກໍຕ້ອງມີຄວາມສະດຸ້ງໄວໃນການຕອບຕ້ານຖ້ອຍທຳນອງໂຄສະນາບິດເບືອນໃສ່ຮ້າຍປ້າຍສີຂອງພວກອິດທິກຳລັງປໍລະປັກ ແລະ ກຸ່ມຄົນບໍ່ດີໃຫ້ທັນການ ແລະ ມີສະຕິລະວັງຕົວສູງຕໍ່ກົນອຸບາຍຂອງຄົນທີ່ບໍ່ດີເຫລົ່ານັ້ນ. ພ້ອມນັ້ນ ໃນເບື້ອງການລົງທຶນ ເພື່ອພັດທະນາສື່ເຮົາຂອງເບື້ອງພັກ-ລັດກໍມີຄວາມສຳຄັນ ແລະ ຈຳເປັນຍິ່ງ ເພື່ອໃຫ້ສື່ເຮົາເຕີບໃຫຍ່ເຂັ້ມແຂງ ແລະ ສາມາດເຊື່ອມໂຍງເຂົ້າກັບຂົງເຂດ ແລະ ສາກົນເທື່ອລະກ້າວ.
