ຈະສູ້ຊົນ ຮັບປະກັນເຮັດໃຫ້ ປະຊາຊົນ ມີຄວາມປອດໄພສູງທີ່ສຸດ ຈາກລູກລະເບີດບໍ່ທັນແຕກທີ່ຕົກຄ້າງ ຈາກສົງຄາມ
ກອງກວດ-ກູ້ລະເບີດ 58 ເພື່ອມະນຸດສະທຳ ກົມຊ່າງແສງ ກົມໃຫຍ່ເສນາທິການ ກອງທັບຈະຕັ້ງໜ້າປະຕິບັດໜ້າທີ່ສຳຫລວດ ກວດ-ກູ້ລະເບີດບໍ່ທັນແຕກທີ່ຕົກຄ້າງຈາກສົງຄາມ ໃຫ້ໝົດຈາກຜືນແຜ່ນດິນລາວ ແນໃສ່ຮັບປະກັນ ເຮັດໃຫ້ ການດຳລົງຊີວິດ-ທຳມາຫາກິນ ຂອງປະຊາຊົນ ທີ່ໄດ້ຮັບຜົນກະທົບ ມີຄວາມປອດໄພ ແລະ ມີຄວາມສະດວກສະບາຍຫຼາຍຂຶ້ນ .
ສະຫາຍ ພັນໂທ ພອນແກ້ວ ອໍລະດົມ ຫົວໜ້າການທະຫານ ກອງກວດ-ກູ້ ລະເບີດ 58 ເພຶ່ອມະນຸດສະທຳ ລາຍງານໃຫ້ຮູ້ວ່າ : ໂດຍຕອບສະໜອງຄວາມຮຽກຮ້ອງຕ້ອງການຂອງໜ້າທີ່ວຽກງານວິຊາສະເພາະ, ກອງກວດ-ກູ້ລະເບີດ ເພື່ອມະນຸດສະທຳ 58 ແມ່ນກົມກອງໜຶ່ງທີ່ໄດ້ຮັບການສ້າງຂື້ນຈາກກະຊວງປ້ອງກັນປະເທດ ເພື່ອປະຕິບັດໜ້າທີ່ການສຳຫຼວດ ກວດ-ກູ້ ແລະ ທໍາລາຍລະເບີດບໍ່ທັນແຕກທີ່ຕົກຄ້າງຢູ່ ສປປລາວ, ແນ່ໃສຮັບປະກັນ ເຮັດໃຫ້ ປະຊາຊົນ ມີຄວາມປອດໄພຈາກລູກລະເບີດ, ສຳຫຼວດ ກວດ-ກູ້ ແລະ ທຳລາຍລະເບີດທີ່ຕົກຄ້າງອອກຈາກພື້ນທີ່ທຳການຜະລິດ ແລະ ໂຄງການກໍ່ສ້າງຂອງລັດຖະບານ, ເພື່ອສະໜັບສະໜູນແຜນພັດທະນາເສດຖະກິດ-ສັງຄົມແຫ່ງຊາດ ເຊິ່ງເປັນໜ້າທີ່ ອັນອົງອາດກ້າຫານ ແລະ ລໍ້າຄ່າຂອງກົມກອງ ໃນການປະຕິບັດໜ້າທີ່ຂອງຊາດ.
ໃນໄລຍະຜ່ານມາ ກອງກວດ-ກູ້ລະເບີດ 58 ເພື່ອມະນຸດສະທຳໄດ້ປະຕິບັດວຽກງານວິຊາສະເພາະ ດ້ວຍຄວາມຫ້າວຫັນ ຮ່ວມກັບອົງການສາກົນ ແລະ ປະເທດເພື່ອນມິດ ທີ່ໃຫ້ການສະໜັບສະໜູນສຳຫລວດ ກວດ-ກູ້ ລະເບີດ ບໍ່ທັນແຕກ ໃນພື້ນທີ່ສ່ຽງຂອບເຂດທົ່ວປະເທດ ແມ່ນໄດ້ຮັບຜົນສຳເລັດຕາມໄລຍະ.
ຈາກຜົນງານການເຄື່ອນໃຫວດັ່ງກ່າວ ເຮັດໃຫ້ ກອງ ກວດ-ກູ້ ລະເບີດ 58 ເພື່ອມະນຸດສະທຳ ໄດ້ຮັບການຍ້ອງຍໍ ຈາກພາກ-ລັດ ແລະ ການຈັດຕັ້ງຂັ້ນເທິງ ປະເພດ ຫຼຽນໄຊ ແລະ ໃບຍ້ອງຍໍຕ່າງໆ ໃຫ້ບຸກຄົນ ແລະ ກົມກອງລວມໝູ່ຢ່າງສົມກຽດ.
ສະຫາຍ ພັນໂທ ພອນແກ້ວ ອໍລະດົມ ລາຍງານໃຫ້ຮູ້ຕື່ມວ່າ : ສປປ ລາວ ຖ້າຄິດໄລ່ຕໍ່ຫົວຄົນ, ແມ່ນເປັນປະເທດທີ່ຖືກຖິ້ມລະເບີດໃສ່ຫຼາຍທີ່ສຸດໃນໂລກ. ຕະຫຼອດສົງຄາມອິນດູຈີນຄັ້ງທີສອງ (ປີ 1964-1973) ມີຫຼາຍກວ່າ 580.000 ຖ້ຽວບີນທີ່ຖິ້ມລະເບີດ (ຫລືຖ້ຽວບິນຖິ້ມລະເບີດທຸກໆ 8 ນາທີ, 24 ຊົ່ວໂມງຕໍ່ມື້, ເປັນເວລາ 9 ປີ) ແລະ ມີການສູ້ຮົບທາງໜ້າດິນຢ່າງກວ້າງຂວາງ, ເຮັດໃຫ້ລະເບີດຫຼາຍກ່ວາ 2 ລ້ານໂຕນຖືກຖິ້ມລົງໃສ່ແຜ່ນດີນຂອງ ສປປ ລາວ, ລະເບີດລູກຫວ່ານໄດ້ຖືກນຳໃຊ້ຫຼາຍກວ່າ 270 ລ້ານ ໜ່ວຍ, ໃນນັ້ນມີປະມານ 80 ລ້ານໜ່ວຍທີ່ບໍ່ທັນແຕກ ແລະ ຕົກຄ້າງ, ຝັງຢູ່ໃນພູມສັນຖານຂອງ ສປປ ລາວ ຫຼັງສົງຄາມສິ້ນສຸດລົງ.
ໃນປັດຈຸບັນ ລະເບີດທີ່ຍັງບໍ່ທັນແຕກ (ລບຕ) ຍັງສືບຕໍ່ສົ່ງຜົນກະທົບຢູ່ບໍລິເວນກວ້າງຂວາງຂອງປະເທດເຮົາເຊັ່ນ: ໃນປ່າດົງ, ທົ່ງໄຮ່ນາ, ບ້ານ, ໂຮງຮຽນ, ຖະໜົນຫົນທາງ ແລະ ເຂດທີ່ຢູ່ອາໃສ ຂອງປະຊາຊົນ ຢ່າງຫລວງຫລາຍ. ສະນັ້ນແລ້ວ ຄະນະພັກ-ຄະນະບັນຊາ ກໍຄື ພະນັກງານ-ນັກຮົບທົ່ວກອງ ກວດ-ກູ້ ລະເບີດ 58 ເພື່ອມະນຸດສະທຳ ຜູ້ທີ່ປະຕິບັດໜ້າທີ່ຕົວຈິ່ງ ໄດ້ຮັບຮູ້ ແລະ ເຂົ້າໃຈເຖີງຜົນຮ້າຍແຮງຂອງລູກລະເບີດ .
ດັ່ງນັ້ນ, ກົມກອງພວກເຮົາ ຈະສູ້ຊົນ ປະຕິບັດໜ້າ ທີ່ດ້ວຍຄວາມຮັບຜິດຊອບສູງ ເພື່ອຮັບປະກັນ ເຮັດໃຫ້ປະຊາຊົນ ໄດ້ຮັບຄວາມປອດໄພ ສູງທີ່ສຸດ ຈາກລູກລະເບີດ ບໍ່ທັນແຕກ ທີ່ຕົກຄ້າງຈາກສົງຄາມ .
