ລັດຖະບານສີລັງກາສັ່ງກອງທັບຍິງຜູ້ຊຸມນຸມ ທີ່ສວຍໂອກາດປຸ້ນ ແລະ ທຳລາຍຊັບສິນ ຂະນະທີ່ປະຊາຊົນຍັງເດີນໜ້າປະທ້ວງ

ທາງການສີລັງກາອອກຄຳສັ່ງເປີດທາງໃຫ້ທະຫານສາມາດຍິງກຸ່ມຜູ້ປະທ້ວງທີ່ໃຊ້ຄວາມຮຸນແຮງໄດ້, ພ້ອມເດີນໜ້າປາບປາມປະຊາຊົນທີ່ອອກມາຮຽກຮ້ອງໃຫ້ທ່ານ ໂກຕາບາຢາ ຣາຊປັກສາ ປະທານາທິບໍດີຂອງສີລັງກາ ລາອອກຈາກຕຳແໜ່ງ ທ່າມກາງວິກິດເສດຖະກິດຮ້າຍແຮງທີ່ສຸດໃນປະຫວັດສາດ.
ໃນວັນທີ 9 ພຶດສະພາຜ່ານມາ, ທ່ານ ມະຫິນທາ ຣາຊປັກສາ ອ້າຍຂອງທ່ານ ໂກຕາບາຢາ ຣາຊປັກສາ ໄດ້ປະກາດລາອອກຈາກຕຳແໜ່ງນາຍົກລັດຖະມົນຕີ ໂດຍຫວັງຈະຫລຸດກະແສຄວາມຄຽດແຄ້ນຂອງປະຊາຊົນ, ແຕ່ເຖິງຢ່າງນັ້ນ ການປະທ້ວງກໍຍັງດຳເນີນຕໍ່ໄປຢ່າງດຸເດືອດ ໂດຍໃນວັນທີ 10 ພຶດສະພາ ລັດຖະບານສີລັງກາໄດ້ສັ່ງໃຫ້ກອງກຳລັງທະຫານສາມາດຍິງຜູ້ປະທ້ວງທີ່ສວຍໂອກາດປຸ້ນ ຫລື ທຳລາຍສາທາລະນະສົມບັດໄດ້ ລວມທັງຜູ້ກໍ່ເຫດຮຸນແຮງຈົນອາດເປັນໄພຕໍ່ຊີວິດຜູ້ອື່ນ.
ທັງນີ້, ລັດຖະບານໄດ້ສັ່ງໃຫ້ເຈົ້າໜ້າທີ່ທະຫານຫລາຍໝື່ນຄົນຈາກທັງກອງທັບບົກ, ກອງທັບເຮືອ ແລະ ກອງທັບອາກາດ ອອກເດີນລາດຕະເວນຕາມທ້ອງຖະໜົນໃນນະຄອນຫລວງໂຄລຳໂບ, ແຕ່ບໍ່ສາມາດຢັບຢັ້ງເຫດການຮຸນແຮງໄດ້ ໂດຍໃນວັນທີ 10 ພຶດສະພາ ມີເຈົ້າໜ້າທີ່ຕຳຫລວດລະດັບສູງທ່ານໜຶ່ງໄດ້ຮັບບາດເຈັບຈາກການໂຈມຕີຂອງຜູ້ປະທ້ວງ ເຊິ່ງຜູ້ກໍ່ເຫດລະບຸວ່າ: ພວກເຂົາຄຽດແຄ້ນທີ່ເຈົ້າໜ້າທີ່ບໍ່ປະຕິບັດໜ້າທີ່ປົກປ້ອງຜູ້ທີ່ມາຊຸມນຸມຢ່າງສະຫງົບ.
ສຳນັກຂ່າວ BBC ລາຍງານວ່າ: ຝູງຊົນຍັງປັກຫລັກລວມຕົວປະທ້ວງ ຢູ່ສວນສາທາລະນະ Galle Face Green ເຊິ່ງເຕັມຕາມແນວຊາຍຝັ່ງທະເລໃນເມືອງຫລວງຂອງສີລັງກາ.
ເຈົ້າໜ້າທີ່ຕຳຫລວດເປີດເຜີຍວ່າ: ມີຜູ້ເສຍຊີວິດຈາກການຊຸມນຸມແລ້ວ 8 ຄົນ. ຂະນະທີ່ໂຮງໝໍຫລັກຂອງເມືອງເປີດເຜີຍວ່າ: ມີຜູ້ໄດ້ຮັບບາດເຈັບ 200 ກວ່າຄົນນັບແຕ່ວັນທີ 9 ພຶດສະພາຜ່ານມາ ໂດຍມີບາງຄົນໄດ້ຮັບບາດເຈັບເພາະເຂົ້າປະທະກັບຜູ້ສະໜັບສະໜູນລັດຖະບານ, ສ່ວນບາງຄົນບາດເຈັບຈາກການໃຊ້ແກັສນ້ຳຕາຂອງເຈົ້າໜ້າທີ່ ໂດຍກຸ້ມທະນາຍຄວາມຂອງຜູ້ຊຸມນຸມເປີດເຜີຍວ່າ: ພວກເຂົາໄດ້ຍື່ນເລື່ອງດຳເນີນຄະດີຕໍ່ຜູ້ສະໜັບສະໜູນນາຍົກລັດຖະມົນຕີທີ່ກໍ່ເຫດຮຸນແຮງແລ້ວ.
ລັດຖະບານຂະຫຍາຍໄລຍະເວລາສະຖານະການສຸກເສີນຈົນຮອດເຊົ້າວັນທີ 12 ພຶດສະພາ, ຂະນະທີ່ເຈົ້າໜ້າທີ່ຍັງຫາຫົນທາງໃນການຢຸດຕິເຫດຮຸນແຮງທີ່ເກີດຂຶ້ນ ໂດຍໃນຄືນວັນທີ 10 ພຶດສະພາຜ່ານມາ ກຸ່ມຜູ້ຊຸມນຸມໄດ້ກໍ່ຈະລາຈົນຫລາຍພື້ນທີ່ທົ່ວນະຄອນຫລວງໂຄລຳໂບ ທັງຍູ້ລົດເມໃຫ້ຈົມລົງໃນທະເລສາບ, ທຸບແວ່ນລົດ ແລະ ຈູດຢາງຕີນລົດ.
ທາງຕາເວັນອອກສຽງເໜືອ ຜູ້ປະທ້ວງລວມຕົວກັນຢູ່ໜ້າຖານທັບເຮືອຕຣິນໂຄມາລີ ຫລັງມີຂ່າວລືວ່າ: ທ່ານ ມະຫິນທາ ຣາຊປັກສາ ຈະເດີນທາງໄປຫລົບໄພຢູ່ບ່ອນນັ້ນ ພ້ອມສະມາຊິກໃນຄອບຄົວ. ຂະນະທີ່ເຮືອນພັກຂອງນັກການເມືອງ 50 ກວ່າຫລັງຖືກຈູດໃນຄືນວັນທີ 10 ພຶດສະພາຜ່ານມາ ໂດຍປະຊາຊົນບາງສ່ວນໄດ້ເດີນທາງໄປປັກຫລັກຢູ່ໜ້າສຳນັກງານປະທານາທິບໍດີ ເພື່ອກົດດັນທ່ານ ໂກຕາບາຢາ ໃຫ້ວາງມືຈາກຕຳແໜ່ງ.
ນອກຈາກນີ້, ກຸ່ມຜູ້ປະທ້ວງທົ່ວປະເທດໄດ້ຈູດໄຟເຜົາເຮືອນທີ່ເປັນຂອງຕະກູນຣາຊປັກສາ ລວມທັງເຮືອນພັກຂອງລັດຖະມົນຕີ ແລະ ສະມາຊິກລັດຖະສະພາອີກຫລາຍທ່ານ. ຂະນະດຽວກັນ ພື້ນທີ່ໃກ້ທຳນຽບປະທານາທິບໍດີກໍຖືກຈູດ ແລະ ມີລາຍງານວ່ານັກການເມືອງລະດັບເທສະບານທ່ານໜຶ່ງເສຍຊີວິດໃນໂຮງໝໍຫລັງຈາກເຮືອນຂອງທ່ານຖືກໂຈມຕີຈາກກຸ່ມຜູ້ປະທ້ວງ.
ເຫດການດັ່ງກ່າວສົ່ງຜົນໃຫ້ບັນດານັກການເມືອງຕ້ອງໜີໄປລີ້ຊ້ອນໃນບ່ອນປອດໄພ ແລະ ຫລີກລ່ຽງຈະປາກົດຕົວໃນບ່ອນສາທາລະນະ ໂດຍສະເພາະນັກການເມືອງທີ່ຢູ່ເບື້ອງລັດຖະບານ ໜຶ່ງໃນນັ້ນຄືທ່ານ ມະຫິນທາ ຣາຊປັກສາ ເຊິ່ງໃນອະດີດທ່ານເຄີຍເປັນຮີໂລ້ຂອງຊາວສີລັງກາຈາກການທີ່ສາມາດເອົາຊະນະກຸ່ມພະຍັກທະມິນອີແລມໄດ້, ແຕ່ບັດນີ້ທ່ານພັດກາຍເປັນຄົນຮ້າຍແຫ່ງຊາດໃນສາຍຕາປະຊາຊົນ.
ອ້າງອີງ:
• https://www.bbc.com/news/world-asia-61389189?fbclid=IwAR3kO187araNDEya2b9rLiaO2b1QKUjBTN7OpLEqeVImOgekqJysMWJYg4g