ທູດລາວປະຈຳ ຣາຊະອານາຈັກ ກຳປູເຈຍ ເຂົ້າຢ້ຽມຂໍ່ານັບ ສົມເດັດ ເຮັງ ຊໍາຣິນ

ວັນທີ 10 ພຶດສະພາ 2022, ທ່ານ ບົວແກ້ວ ພູມວົງໄຊ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ຣາຊະອານາຈັກ ກຳປູເຈຍ ໄດ້ເຂົ້າຢ້ຽມຂໍ່ານັບ ສົມເດັດ ເຮັງ ຊໍາຣິນ ປະທານສະພາແຫ່ງຊາດ ແຫ່ງ ຣາຊະອານາຈັກຳປູເຈຍ.

ໂອກາດດັ່ງກ່າວ, ທ່ານ ບົວແກ້ວ ພູມວົງໄຊ ກໍໄດ້ນຳເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ຈາກ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດລາວ ເຖິງ ສົມເດັດ ເຮັງ ຊໍາຣິນ ແລະ ຄອບຄົວ. ພ້ອມນີ້, ທ່ານທູດ ກໍໄດ້ຕີລາຄາສູງຕໍ່ການພົວພັນຮ່ວມມືອັນດີ ລະຫວ່າງ ສປປ ລາວ ແລະ ກຳປູເຈຍ ເຊິ່ງແມ່ນສາຍພົວພັນຮ່ວມມື ທີ່ມີມູນເຊື້ອມາແຕ່ດົນນານ ຖານປະເທດອ້າຍນ້ອງ ບ້ານໃກ້ເຮືອນຄຽງ, ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນກໍາປູເຈຍ ທີ່ໄດ້ໃຫ້ການຊ່ວຍເຫລືອ ສປປ ລາວ ທາງດ້ານວັກຊິນປ້ອງກັນພະຍາດ ໂຄວິດ-19, ລົດຂົນສົ່ງວັກຊິນ ຈຳນວນ 13 ຄັນ ແລະ ເງິນຊ່ວຍເຫລືອຈຳນວນໜຶ່ງ, ເຊິ່ງເປັນການປະກອບສ່ວນເຂົ້າໃນການຮັດແໜ້ນ ສາຍພົວພັນຮ່ວມມືລະຫວ່າງສອງປະເທດ.

ພ້ອມນີ້, ທ່ານ ບົວແກ້ວ ພູມວົງໄຊ ກໍໄດ້ສະແດງຄວາມຊົມເຊີຍຕໍ່ຜົນສຳເລັດການຢ້ຽມຢາມຣາຊະອານາຈັກກຳປູເຈຍ ຢ່າງເປັນທາງການຂອງ ທ່ານ ພັນຄຳ ວິພາວັນນາຍົກລັດຖະມົນຕີ ແຫ່ງ ສປປ ລາວ ໃນເດືອນພະຈິກ 2021 ທີ່ຜ່ານມາ ພ້ອມກັບ ການຢ້ຽມຢາມກຳປູເຈຍ ແລະ ການເຂົ້າຮ່ວມກອງປະຊຸມ ລັດຖະມົນຕີຕ່າງປະເທດອາຊຽນແບບວົງແຄບ ຂອງ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສສປ ລາວ ໃນວັນທີ 15-17 ກຸມພາ 2022 ຜ່ານມາ. ນອກຈາກນັ້ນ, ຍັງໄດ້ສະແດງຄວາມຊົມເຊີຍ ຣາຊະອານາຈັກ ກຳປູເຈຍ ຕໍ່ການເປັນປະທານອາຊຽນໃນປີ 2022 ນີ້.

ສົມເດັດ ເຮັງ ຊໍາຣິນ ກໍໄດ້ສະແດງຄວາມຊົມເຊີຍມາຍັງ ທ່ານ ບົວແກ້ວ ພູມວົງໄຊທີ່ໄດ້ຮັບການແຕ່ງຕັ້ງໃຫ້ມາດຳລົງຕຳແໜ່ງ ເປັນເອກອັກຄະລັດຖະທູດ ແຫ່ງ ສປປ ລາວ ຄົນໃໝ່ ປະຈຳ ຣາຊະອານາຈັກ ກຳປູເຈຍ ເພື່ອປະຕິບັດໜ້າທີ່ອັນຊົງກຽດ ແລະ ສູງສົ່ງ; ໄດ້ສະແດງຄວາມປິຕິຍິນດີທີ່ເຫັນວ່າ ສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືລະຫວ່າງສອງປະເທດ ແລະ ສອງສະພາແຫ່ງຊາດ ທີ່ມີຄວາມຈະເລີນກ້າວໜ້າຢ່າງເນື່ອງນິດລຽນຕິດໃນທຸກດ້ານ. ນອກຈາກນີ້, ຍັງໄດ້ສະແດງຄວາມຫວັງວ່າ ທ່ານເອກອັກຄະລັດຖະທູດ ຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືນີ້ ໃຫ້ນັບມື້ນັບເຂັ້ມແຂງ ແລະ ເລິກເຊິ່ງເພີ່ມອີກ ເພື່ອຜົນປະໂຫຍດຂອງສອງປະເທດ ແລະ ປະຊາຊົນສອງຊາດພວກເຮົາ.

ທ່ານ ບົວແກ້ວ ພູມວົງໄຊ ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ແລະ ຄຳເວົ້າອັນຈົບງາມຂອງ ສົມເດັດ ເຮັງ ຊໍາຣິນ ທີ່ມີຕໍ່ສາຍພົວພັນມິດຕະພາບ ແລະ ມູນເຊື້ອມາແຕ່ດົນນານ. ພ້ອມກັນນັ້ນ, ກໍໄດ້ອວຍພອນໄຊອັນປະເສີດໄປຍັງສົມເດັດ ເຮັງ ຊໍາຣິນ ຈົ່ງມີພະລານາໄມສົມບູນ ແລະ ປະສົບຜົນສຳເລັດໃນໜ້າທີ່ວຽກງານອັນສູງສົ່ງຂອງສົມເດັດ.