ເທນ ຮາກ ສົ່ງທ້າຍນັດອຳລາ ພາ ອາແຈັກ ຖະຫລົ່ມຄູ່ແຂ່ງຄວ້າແຊ໊ມລີກດັດ, ກ່ອນມາຄຸມ ແມນຢູ

ເອຣິກ ເທນ ຮາກ ຜູ້ຈັດການທີມໃຫມ່ຂອງ ແມນເຊສເຕີ ຢູໄນເຕັດ ພາ ອາແຈັກ ອຳເຕີດຳ ກາລັນຕີຄວ້່າແຊ໊ມລີກດັດ ລະດູການນີ້ມາຄອງໄດ້ສຳເລັດ ຫລັງເອົາຊະນະ ຮີເຣນວີນ ໃນຄືນຜ່ານມາ.

ການແຂ່ງຂັນບານເຕະ ເອເຣດີວີຊີລີກ ເນເທີແລນ ລະດູການ 2021-22 ນັດຮອງສຸດທ້າຍ ເມື່ອຄືນວັນພຸດທີ 11 ພຶດສະພາ ຄູ່ທີ່ຫນ້າສົນໃຈ ອາແຈັກ ອຳເຕີດຳ ທີມຜູ້ນຳຂອງຕາຕະລາງ ພາຍໃຕ້ການຄຸມທີມຂອງ ເອຣິກ ເທນ ຮາກ ຜູ້ຈັດການທີມຄົນໃຫມ່ ຜີແດງ ແມນເຊສເຕີ ຢູໄນເຕັດ ເປີດສະຫນາມ ໂຢອັນ ຄຣັຟ ອາຣານາ ຕ້ອນຮັບການມາຢາມຂອງ ຮີເຣນວີນ ໂດຍຖ້າເກມນີ້ ອາແຈັກ ຊະນະ ຈະຄວ້າແຊ໊ມທັນທີ.

ຜົນປາກົດວ່າ ອາແຈັກ ເອົາຊະນະ ຮີເຣນວີນ 5-0 ສົ່ງຜົນໃຫ້ ອາແຈັກ ເກັບເພີ່ມເປັນ 82 ຄະແນນ ນຳເປັນຜູ້ນຳຕໍ່ໄປ ໂດຍມີຄະແນນຫລາຍກວ່າ ພີເອສວີ ໄອໂຮເຟັນ ຢູ່ 4 ຄະແນນ ແລະ ເຫລືອການແຂ່ງຂັນອີກພຽງ 1 ນັດ ເຮັດໃຫ້ ອາແຈັກ ຄວ້າແຊ໊ມລີກສູງສຸດຂອງເນເທີແລນ ມາຄອງເປັນສະໄຫມທີ 36 ພ້ອມຄວ້າໂຄຕ້າໄປ ຢູຟາ ແຊ໊ມປຽນລີກ ລະດູການຫນ້າ.

ທັງນີ້ ແຊ໊ມນີ້ຖືເປັນການສັ່ງລາ ເອຣິກ ເທນ ຮາກ ຜູ້ຈັດການທີມຄົນເກ່ັງຂອງ ອາແຈັກ ທີ່ຈະຍ້າຍມາເປັນຜູ້ຈັດການທີມຄົນໃຫມ່ຂອງ ແມນເຊສເຕີ ຢູໄນເຕັດ ຕັ້ງແຕ່່ລະດູການຫນ້າເປັນຕົ້ນໄປ.