ທ່ານ ບອງບອງ ມາຣກອດ ໃຫ້ຄຳໝັ້ນເຮັດວຽກເພື່ອປະຊາຊົນຟີລິບປິນ ຫລັງຊະນະເລືອກຕັ້ງປະທານາທິບໍດີ
ທ່ານ ບອງບອງ ມາຣກອດ ລູກຊາຍອະດີດປະທານາທິບໍດີ ເຟີດິນານ ມາຣກອດ ປະກາດພາຍຫລັງໄດ້ຮັບໄຊຊະນະການເລືອກຕັ້ງປະທານາທິບໍດີໃນວັນທີ 10 ພຶດສະພາ 2022 ຜ່ານມາ, ໂດຍສັນຍາວ່າ: ຈະເຮັດວຽກເພື່ອປະຊາຊົນທຸກຄົນ. ຂະນະທີ່ຂໍ້ຄວາມສົ່ງໄປທົ່ວໂລກທີ່ເຜີຍແພ່ໂດຍໂຄສົກຂອງທ່ານລະບຸວ່າ: “ຈົ່ງຕັດສິນຂ້າພະເຈົ້າບໍ່ແມ່ນຈາກບັນພະບູລຸດ, ແຕ່ຈາກການກະທຳຂອງຂ້າພະເຈົ້າເອງ”.
ທ່ານ ບອງບອງ ມາຣກອດ ສ້າງປະຫວັດສາດເປັນຜູ້ສະໝັກຊີງຕຳແໜ່ງປະທານາທິບໍດີຟີລິບປິນ ຄົນທຳອິດທີ່ໄດ້ຮັບໄຊຊະນະຈາກການເລືອກຕັ້ງ ໄດ້ຄະແນນສຽງຢ່າງຫລວງຫລາຍ ແລະ ຫ່າງຄູ່ແຂ່ງຢ່າງຂາດລອຍໂດຍຜົນການນັບຄະແນນຫລ້າສຸດບໍ່ເປັນທາງການ ຮອດເວລາ 10:00 ໂມງຂອງວັນທີ 11 ພຶດສະພາ 2022 ຕາມເວລາທ້ອງຖິ່ນ, ທ່ານ ບອງບອງ ມາຣກອດ ໄດ້ຄະແນນສຽງກວ່າ 31 ລ້ານສຽງນຳໜ້າຄູ່ແຂ່ງອັນດັບ 1 ຄື ທ່ານ ເລນີ ໂຣເບຣໂດ ຮອງປະທານາທິບໍດີຄົນປັດຈຸບັນ ທີ່ໄດ້ຄະແນນສຽງປະມານ 14,8 ລ້ານສຽງ ເຊິ່ງການນັບຄະແນນຈົນຮອດຕອນນີ້ສຳເລັດແລ້ວກວ່າ 98% ແລະ ຄາດວ່າຜົນນັບຄະແນນຢ່າງເປັນທາງການຈະປະກາດໃນທ້າຍເດືອນພຶດສະພານີ້.
ອ້າງອີງ:
- https://www.reuters.com/world/asia-pacific/philippines-election-win-returns-marcos-power-polarisation-2022-05-10/
- https://news.abs-cbn.com/news/05/11/22/bongbong-marcos-visits-fathers-grave-after-elections
