ຣູດີເກີ ຍ້າຍໄປ ຣຽວ ມາດຣິດ ເຊັນສັນຍາ 4 ປີແບບບໍ່ມີຄ່າຕົວໃນລະດູການຫນ້າ

ອັນໂຕນີໂອ ຣູດີເກີ ຕອບຕົກລົງຍ້າຍໄປຢູ່ກັບ ຣຽວ ມາດຣິດ ແບບບໍ່ມີຄ່າຕົວໃນລະດູການຫນ້າ ດ້ວຍສັນຍາ 4 ປີ ເຊິ່ງລາວຈະຫມົດສັນຍາກັບເຊລຊີ ແລ້ວເລືອກບໍ່ຢູ່ຕໍ່.

ສຳນັກຂ່າວ ສະກາຍ ສະປອດ ລາຍງານວ່າ : ອັນໂຕນີໂອ ຣູດີເກີ ກອງຫລັງຄົນເກ່ັງຂອງ ເຊລຊີ ແຫ່ງພຣີເມຍລີກອັງກິດ ຕອບຕົກລົງຍ້າຍໄປຫລິ້ນໃຫ້ ຣຽວ ມາດຣິດ ຍອດທີມແຫ່ງ ລາລີກາ ສະເປນ ແບບບໍ່ມີຄ່າຕົວໃນລະດູການຫນ້າ.

ຣູດີເກີ ຈະຫມົດສັນຍາກັບເຊລຊີ ເມື່ອຈົບລະດູການນນີ້ ເຖິງສະໂມສອນຈະພະຍາຍາມດຶງຕົວໄວ້ກໍຕາມ ແຕ່ນັກເຕະທີມຊາດເຢຍລະມັນກໍຍັງເລືອກທີ່ຈະບໍ່ຢູ່ຕໍ່ ໂດຍລະບຸວ່າ ລາວໄດ້ຕົກລົງກັບ ຣຽວ ມາດຣິດ ເປັນເວລາ 4 ປີ ຮັບຄ່າເມື່ອຍອາທິດລະ 400,000 ຢູໂຣ.

ຜ່ານມາ ຣູດີເກີ ຕົກເປັນຂ່າວເຊື່ອມໂຍງກັບກັບຫລາຍສະໂມສອນໃນຢູໂຣບ ແຕ່ລາຍງານລະບຸວ່າ ຣຽວ ມາດຣິດ ເປັນສະໂມສອນທຳອິດທີ່ຕິດຕໍ່ເຂົ້າມາເຈລະຈາຢ່າງເປັນທາງການ ເຊິ່ງນັກເຕະອາຍຸ 29 ປີຮູ້ສຶກປະທັບໃຈໃນການເຈລະຈາກັບ ຣຽວ ມາດຣິດ ຈົນຕອບຕົກລົງດັ່ງກ່າວ.

ສຳລັບ ຣູດີເກີ  ຍ້າຍຈາກ ໂຣມາ ທີມໃນ ເຊເຣຍ ອາ ອີຕາລີ ມາຢູ່ກັບເຊລຊີ ຕັ້ງແຕ່ປີ 2017 ເຊິ່ງລາວພັດທະນາສີຕີນຈົນກ້າວຂຶ້ນມາເປັນກຳລັງສຳຄັນຂອງຕົ້ນສັງກັດປັດຈຸບັນ ແລະ ມີສ່ວນສຳຄັນນຳທີມຄວ້າແຊ໊ ຢູຟາ ແຊ໊ມປຽນລີກ ລະດູການຜ່ານມາ.