ປະທານາທິບໍດີ ສ.ເກົາຫລີ ຄົນໃໝ່ ກ່າວ ພ້ອມເຈລະຈາ ຍື່ນຂໍ້ສະເໜີຊ່ວຍຟື້ນຟູເສດຖະກິດ ສປປ ເກົາຫລີ ຖ້າຍອມປົດອາວຸດນິວເຄຼຍ

ທ່ານ ຢຸນ ຊອກຢໍ ສາບານຕົນຮັບຕຳແໜ່ງປະທານາທິບໍດີ ສ.ເກົາຫລີ ຄົນໃໝ່ ເຜີຍໂຄງການນິວເຄຼຍຂອງ ສປປ ເກົາຫລີ ເປັນໄພຄຸກຄາມ, ແຕ່ປະຕູສູ່ການເຈລະຈາ ແລະ ແກ້ໄຂບັນຫາຢ່າງສັນຕິຍັງເປີດກວ້າງ, ພ້ອມສະເໜີການຊ່ວຍເຫລືອເພື່ອຟື້ນຟູເສດຖະກິດ ຖ້າ ສປປ ເກົາຫລີ ຮັບຂໍ້ສະເໜີຍອມປົດນິວເຄຼຍ.

ວັນທີ 10 ພຶດສະພາ 2022, ສຳນັກຂ່າວຕ່າງປະເທດລາຍງານວ່າ: ທ່ານ ຢຸນ ຊອກຢໍ ເຂົ້າພິທີສາບານຕົນຮັບຕຳແໜ່ງປະທານາທິບໍດີ ສ.ເກົາຫລີ ຄົນໃໝ່ໃນວັນທີ 10 ພຶດສະພານີ້ ໂດຍຢືນຢັນວ່າ: ຍັງເປີດກວ້າງສຳລັບການເຈລະຈາກັບ ສປປ ເກົາຫລີ ພ້ອມມອບການຊ່ວຍເຫລືອດ້ານເສດຖະກິດ ຖ້າ ສປປ ເກົາຫລີ ຮັບຮອງວ່າຈະປົດອາວຸດນິວເຄຼຍ.

ປະທານາທິບໍດີຄົນໃໝ່ຂອງ ສ.ເກົາຫລີ ຍັງກ່າວອີກວ່າ: “ການປົດອາວຸດນິວເຄຼຍມີສ່ວນສຳຄັນຫລາຍໃນການນຳສັນຕິພາບ ແລະ ຄວາມຈະເລີນຮຸ່ງເຮືອງທີ່ຍືນຍົງມາສູ່ແຫລມເກົາຫລີ ແລະ ບ່ອນອື່ນໆ”.

ທັງນີ້, ທ່ານ ຢຸນ ຊອກຢໍ ອາຍຸ 61 ປີ ເປັນຜູ້ແທນພັກພີເພິລ ພາວເວີ ພັກຝ່າຍຄ້ານແນວອະນຸລັກນິຍົມ ເຊິ່ງສາມາດເອົາຊະນະຄູ່ແຂ່ງ ຄືທ່ານ ລີ ແຈມຢອງ ຈາກພັກເດໂມເຄຣຕິກຂອງຝ່າຍລັດຖະບານໃນການເລືອກຕັ້ງເດືອນມີນາມາໄດ້ຢ່າງຫວຸດຫວິດ ກ້າວຂຶ້ນສູ່ຕຳແໜ່ງປະທານາທິບໍດີຄົນທີ 20 ຂອງ ສ.ເກົາຫລີ.

ທ່ານ ຢຸນ ຊອກຢໍ ເຂົ້າຮັບຕຳແໜ່ງປະທານາທິບໍດີ ສ.ເກົາຫລີ ໃນໄລຍະເວລາທີ່ຕ້ອງຜະເຊີນກັບຄວາມທ້າທາຍຫລາຍຢ່າງ ທັງຈາກການຍົກລະດັບການພັດທະນາອາວຸດນິວເຄຼຍຂອງ ສປປ ເກົາຫລີ ຫລັງຈາກການເຈລະຈາປົດນິວເຄຼຍໄດ້ຢຸດສະງັກລົງມາເປັນເວລາຫລາຍປີ ລວມທັງບັນຫາເງິນເຟີ້ທີ່ເພີ່ມຂຶ້ນຕໍ່ເນື່ອງ ເຊິ່ງໄດ້ກາຍມາເປັນອຸປະສັກສຳຄັນສຳລັບການຟື້ນຕົວຂອງເສດຖະກິດ ສ.ເກົາຫລີ ທີ່ໄດ້ຮັບຜົນກະທົບຈາກການແພ່ລະບາດຂອງພະຍາດໂຄວິດ-19 ໄລຍະ 2 ປີກວ່າ.

ຜ່ານມາ, ທ່ານ ຢຸນ ຊອກຢໍ ໄດ້ສະແດງທ່າທີແຂງກະດ້າງຕໍ່ ສປປ ເກົາຫລີ ມາໂດຍຕະຫລອດ ໂດຍລະຫວ່າງການຫາສຽງເລືອກຕັ້ງ ທ່ານໄດ້ໃຫ້ຄຳໝັ້ນວ່າຈະສະແດງຈຸດຢືນທີ່ເຂັ້ມງວດຂຶ້ນຕໍ່ ສປປ ເກົາຫລີ ເຊິ່ງເປັນແນວທາງທີ່ແຕກຕ່າງຈາກອະດີດປະທານາທິບໍດີ ມຸນ ແຈອິນ ທີ່ສົ່ງເສີມການປອງດອງຢ່າງສັນຕິລະຫວ່າງສອງເກົາຫລີສະເໝີມາ.

ຂະນະດຽວກັນ, ທ່ານ ຢຸນ ຊອກຢໍ ຍັງເຄີຍປະກາດຈະແຈ້ງວ່າ: ຈະບໍ່ຫລຸດຜ່ອນມາດຕະການຂວ້ຳບາດ ຫລື ກຽມສົນທິສັນຍາລະຫວ່າງ ສປປ ເກົາຫລີ ແລະ ສ.ເກົາຫລີ ເອົາໄວ້ ຈົນກວ່າ ສປປ ເກົາຫລີ ຈະສະແດງໃຫ້ເຫັນເຖິງຄວາມພະຍາຍາມຢ່າງແຂງແຮງທີ່ຈະປົດອາວຸດນິວເຄຼຍໂດຍສົມບູນ ແລະ ສາມາດກວດສອບໄດ້. ພ້ອມລະບຸວ່າ: ທ່ານຈະສ້າງກອງກຳລັງທະຫານທີ່ແຂງແກ່ນ ເຊິ່ງຈະສາມາດຢັບຢັ້ງການຍຸຍົງຈາກ ສປປ ເກົາຫລີ ໄດ້ຢ່າງແນ່ນອນ.

ອ້າງອີງ:

https://edition.cnn.com/…/yoon-suk-yeol…/index.html

https://www.reuters.com/…/new-south-korean-president…/