ສະຫລອງປີໃໝ່ດ້ວຍຈິດໃຈປະຢັດ

​     ເພື່ອນຜູ້ອ່ານທີ່ຮັກແພງ, ບຸນສົງການປີໃໝ່ປີນີ້ກໍຫຍັບເຂົ້າມາທຸກທີ່ ເພື່ອພວກເຮົາຈະໄດ້ພ້ອມກັນສະເຫລີມສະຫລອງດ້ວຍຄວາມເບີກບານມ່ວນຊື່ນ ບົນຈິດໃຈປະຢັດມັດທະຍັດ ແລະ ຕ້ານການຟຸມເຟືອຍ. ໃນຂະນະທີ່ ເສດຖະກິດຂອງປະເທດເຮົາຍັງພົບຄວາມຫຍຸ້ງຍາກຫລາຍດ້ານ, ກະທັ້ງທີ່ການນຳຂັ້ນສູງຂອງເຮົາກໍຕ້ອງໄດ້ເສຍສະລະປະມູນຂາຍລົດປະຈຳຕຳແໜ່ງຂອງເພິ່ນເພື່ອປະກອບສ່ວນລາຍຮັບໃຫ້ຊາດບ້ານເມືອງ ແລະ ທ່ານນາຍົກເອງ ເພິ່ນກໍໄດ້ມີຄຳສັ່ງແນະນຳໃຫ້ທົ່ວສັງຄົມຈົ່ງຊ່ວຍກັນປະຢັດ ແລະ ຕ້ານການຟຸມເຟືອຍໃຫ້ມີປະສິດທິຜົນ ແລະ ເປັນຮູບປະທຳ.

ແຕ່ຜ່ານການສັງເກດເຫັນໃນການສະເຫລີມສະຫລອງປີໃໝ່ລາວເຮົາໃນຫລາຍປີຜ່ານມາຂ້ອນຂ້າງມີລັກສະນະຟຸມເຟືອຍ ທັງການເວລາ ແລະ ວັດຖຸສິ່ງຂອງເງິນຄຳ. ຖ້າໄລ່ໃນສຳນັກງານອົງການລັດເກືອບວ່າບ່ອນໃດກໍຈັດຕັ້ງບາສີສູ່ຂວັນຈັດງານລ້ຽງຫລິ້ນກິນຢ່າງຫລູຫລາ, ບໍ່ແມ່ນໃນລັກສະນະເຫລົ້າໄຫໄກ່ໂຕດັ່ງເມື່ອກ່ອນ, ມັນແມ່ນເຫລົ້າ ວິດສະກີ-ງົວປິ່ນນັບເປັນໂຕສອງໂຕນຳມາຕິກໆແບບບໍ່ເມົາບໍ່ເລີກບໍ່ລາກິນແຕ່ເຊົ້າຈົນຮອດຄໍ່າ, ໃຊ້ຈ່າຍເງິນລັດເງິນຫລວງເຂົ້າໃນການສະຫລອງດັ່ງກ່າວຢ່າງບໍ່ເສຍດາຍ ເຊິ່ງຍັງບໍ່ທັນເວົ້າເຖິງຂະແໜງເສດຖະກິດບ່ອນເພິ່ນຫາເງິນຫາຄຳໄດ້ແດ່ຈົນບໍ່ຢາກພັນລະນາ, ນອກຈາກແຈກເງິນໂບນັດຕ່າງໆຜູ້ 5 ຜູ້ 10 ແລ້ວ, ຍັງຈັດຕັ້ງກັນໄປປິກນິກ, ພັກຜ່ອນກິນປູກິນປາ, ໄປເສບໄປງັນຢູ່ສວນຢູ່ນາຂອງເພິ່ນກໍຈັ່ງແມ່ນສະໃຈ. ຖ້າໃຜເຄີຍໄດ້ໄປຮ່ວມແລ້ວກໍຄົງຈະຮູ້ດີ, ບາງ ບ່ອນເຈົ້ານາຍໃຫຍ່ແດ່ກໍມີຫລາຍຂອງຝາກຂອງຕ້ອນ, ສ່ວນກະຕ່າດອກໄມ້ ແລະ ຂອງຂວັນກໍຈົນຈະບໍ່ມີບ່ອນມ້ຽນ ເຊິ່ງຍັງບໍ່ຮູ້ວ່າໃນຊອງອວຍພອນນັ້ນມັນມີໜ້ອຍຫລາຍພຽງໃດ ? ເຊິ່ງທັງໝົດນີ້ກໍມາຈາກເງິນລັດເງິນຫລວງທັງນັ້ນ ແລະ ມາເວົ້າເຖິງຝ່າຍມວນຊົນກໍບໍ່ແມ່ນຂອງຢອກຖ້າໄລ່ແຕ່ເສັ້ນທາງແຄມຂອງກໍອາດຈະນັບແຕ່ອຸບມຸງສີຖານມາຈົນສຸດທາດຂາວ ແລະ ຖ້າແມ່ນທາງເບີໜຶ່ງກໍອາດຈະແມ່ນແຕ່ສີໄຄເກົ້າລ້ຽວໄປຈົນຮອດຄ້າຍຈີ່ໂຈນເຕີບ (ຈີ່ນາຍໂມ້). ຕາມສອງຝາກທາງດັ່ງກ່າວບ່ອນໃດກໍເຫັນຕັ້ງວົງເຫລົ້າ, ວົງເບຍກິນດື່ມເຮຮາ, ເມົາແລ້ວຟ້ອນແອະຟ້ອນແອ່ນເບິ່ງໃຜກໍຫົວແດງຫົວເຫລືອງ, ສັກລີງສັກລາຍເຕັມເອິກເຕັມອາງປານເພິ່ນບໍ່ແມ່ນຄົນລາວ, ກິນແຕ່ເຊົ້າຮອດຄໍ່າ 2 ມື້ 3 ມື້ກໍບໍ່ເລີກລາ, ເບິ່ງແລ້ວມັນເປັນການຟຸມເຟືອຍທັງວັດຖຸສິ່ງຂອງເງິນຄຳ ແລະ ການເວລາອັນມີຄ່າ ແລະ ທັງເປັນການຝືນຕໍ່ວັດທະນະທຳ ແລະ ຮີດຄອງຂອງການສະຫລອງປີໃໝ່ລາວດ້ວຍການສົງພະສົງເຈົ້າ, ດ້ວຍການເຂົ້າຢ້ຽມຂໍ່ານັບອວຍພອນຜູ້ຫລັກຜູ້ໃຫຍ່ຄອບຄົວພໍ່ແມ່ດ້ວຍຄວາມບໍລິສຸດໃຈ… ຖ້າເວົ້າເຖິງການຟຸມເຟືອຍຂອງບາງບໍລິສັດຍັກໃຫຍ່ຈັດງານປີໃໝ່ຢູ່ແຄມຂອງເມື່ອປີສອງປີຜ່ານມານອກຈາກຈັດລຳວົງກິນດື່ມເຮຮາແລ້ວຍັງນຳເອົາຮອດລົດດັບເພີງ (ລົດນ້ຳມອດໄຟ) ເຂົ້າມາຫົດສົງກັນດ້ວຍຄວາມຟຸມເຟືອຍ ແລະ ທັງບໍ່ແທດເໝາະກັບຈັນຍາບັນຂອງຕົນ.

ເອົາລະ ! ເວົ້າມາກໍຫລາຍແລ້ວ ແລະ ຫວັງວ່າການສະຫລອງປີໃໝ່ປີນີ້ຈະບໍ່ມີສິ່ງຟຸມເຟືອຍດັ່ງກ່າວເກີດຂຶ້ນອີກ.