ທ່ານ ມາຄຣົງ ສາບານຕົນຮັບຕຳແໜ່ງ ຜູ້ນຳຝຣັ່ງສະໄໝທີສອງ

ປະທານາທິບໍດີ ເອັມມານູເອລ ມາຄຣົງ ສາບານຕົນ ເພື່ອຮັບຕຳແໜ່ງຜູ້ນຳຝຣັ່ງ ສະໄໝທີສອງຢ່າງເປັນທາງການ.

ວັນທີ 7 ພຶດສະພາ 2022, ສຳນັກຂ່າວຕ່າງປະເທດລາຍງານວ່າ: ປະທານາທິບໍດີ ເອັມມານູເອລ ມາຄຣົງ ສາບານຕົນຕໍ່ທ່ານ ໂລຣອງ ຟາບິອູ ປະທານຄະນະມົນຕີລັດຖະທຳມະນູນ ເພື່ອຮັບຕຳແໜ່ງຜູ້ນຳຝຣັ່ງສະໄໝທີສອງ ຢ່າງເປັນທາງການ ໂດຍພິທີດັ່ງກ່າວຈັດຂຶ້ນພາຍໃນທຳນຽບ ປາແລ ເດິ ເລລີເຊ ໃນນະຄອນຫລວງປາຣີສ.

ທັງນີ້, ທ່ານ ມາຄຣົງ ອາຍຸ 44 ປີ ຈາກພັກສາຍກາງ ສ້າງປະຫວັດສາດເປັນຜູ້ນຳຝຣັ່ງຄົນທຳອິດໃນຮອບ 20 ປີ ທີ່ຊະນະການເລືອກຕັ້ງສອງສະໄໝຕິດຕໍ່ກັນ ນັບແຕ່ປະທານາທິບໍດີ ໝັກ ຊີຣັກ ຊະນະການເລືອກຕັ້ງເມື່ອປີ 2002 ຫລັງເອົາຊະນະນາງ ມາຣີນ ເລີ ແປນ ຄູ່ແຂ່ງຄົນສຳຄັນຈາກພັກຂວາຈັດ ໃນການເລືອກຕັ້ງຮອບຕັດສິນ ຫລື ຮອບຊີງດຳ ເມື່ອວັນທີ 24 ເມສາຜ່ານມາ.

ຫລັງຈາກນັ້ນ, ຜູ້ນຳຝຣັ່ງກ່າວຄຳຖະແຫລງເລັກໜ້ອຍ ມີໃຈຄວາມສຳຄັນກ່ຽວກັບ “ການລິເລີ່ມ” ແລະ “ການສ້າງການປ່ຽນແປງ” ທ່າມກາງຄວາມທ້າທາຍຈຳນວນຫລາຍທີ່ໂລກ ແລະ ຝຣັ່ງກຳລັງຜະເຊີນ. ພ້ອມທັງກ່າວເປັນໄນວ່າ: ການດຳລົງຕຳແໜ່ງສະໄໝທີສອງຂອງທ່ານ “ບໍ່ແມ່ນການສານຕໍ່” ຈາກການດຳລົງຕຳແໜ່ງສະໄໝທຳອິດ ເມື່ອ 5 ປີກ່ອນ ເນື່ອງຈາກທຸກພາກສ່ວນຕ້ອງຮ່ວມກັນສະແຫວງຫາຫົນທາງໃໝ່ທີ່ສ້າງສັນ ແລະ ໃຫ້ຄຳໝັ້ນວ່າ: ການດຳເນີນນະໂຍບາຍຂອງທ່ານຈະຕັ້ງຢູ່ໃນພື້ນຖານຂອງການເຄົາລົບ ແລະ ການໃຫ້ກຽດ.