ກຳປູເຈຍເກັບກູ້ລະເບີດອາເມລິກາ ໜັກ 900 ກວ່າກິໂລ ຈາກພື້ນແມ່ນ້ຳໃກ້ພະລາດຊະວັງ
ວັນທີ 5 ພຶດສະພາຜ່ານມາ, ທີມຜູ້ຊ່ຽວຊານດ້ານລະເບີດປະຈຳສູນປະຕິບັດການທຸ່ນລະເບີດກຳປູເຈຍ (CMAC) ເກັບກູ້ລະເບີດທາງອາກາດ AN-M66 ທີ່ຫລົງເຫລືອຈາກສົງຄາມ ແລະ ຍັງບໍ່ລະເບີດຈາກພື້ນແມ່ນ້ຳຕຸມຸກໃນນະຄອນຫລວງພະນົມເປັນໄດ້ຢ່າງປອດໄພ.
ທ່ານ ເຮັງ ຣັດຕະນາ ຫົວໜ້າ CMAC ກ່າວວ່າ: ລະເບີດຜະລິດໂດຍອາເມລິກາລູກນີ້ມີນ້ຳໜັກປະມານ 907 ກິໂລ ແລະ ບັນຈຸວັດຖຸລະເບີດປະມານ 453 ກິໂລ ໂດຍຖືກພົບຂະນະກຳມະກອນກຳລັງເຮັດຄວາມສະອາດພື້ນແມ່ນ້ຳໃກ້ໂຮງແຮມສຸຂະພະນົມເປັນ ກົງກັນຂ້າມກັບພະລາດຊະວັງ.
ທັງນີ້, ຕົວເລກປະມານການເຜີຍວ່າ: ອາເມລິກາໄດ້ຖິ້ມວັດຖຸລະເບີດປະມານ 2,7 ລ້ານໂຕນ ໃນພື້ນທີ່ 113.716 ຈຸດທົ່ວກຳປູເຈຍ ລະຫວ່າງປີ 1965-1973.
ສົງຄາມ ແລະ ຄວາມຂັດແຍ່ງພາຍໃນປະເທດໄລຍະກາງທົດສະວັດ 1960 ຈົນຮອດປີ 1998 ສົ່ງຜົນໃຫ້ກຳປູເຈຍກາຍເປັນໜຶ່ງໃນປະເທດທີ່ໄດ້ຮັບຜົນກະທົບຈາກທຸ່ນລະເບີດ ແລະ ວັດຖຸລະເບີດຕົກຄ້າງຈາກສົງຄາມຫລາຍທີ່ສຸດໃນໂລກ ໂດຍໃນໄລຍະທີ່ເກີດຄວາມຂັດແຍ່ງຍາວນານເກືອບ 3 ທົດສະວັດ ມີທຸ່ນລະເບີດ ແລະ ອາວຸດອື່ນໆ ຖືກຖິ້ມໄວ້ໃນກຳປູເຈຍປະມານ 4-6 ລ້ານອັນ.
ກຳປູເຈຍພົບຜູ້ບາດເຈັບ ຫລື ເສຍຊີວິດຈາກລະເບີດບໍ່ທັນແຕກ ແລະ ວັດຖຸລະເບີດຕົກຄ້າງຈາກສົງຄາມ 64.964 ຄົນ ລະຫວ່າງປີ 1979-2021 ໂດຍໃນຈຳນວນນີ້ມີຜູ້ເສຍຊີວິດ 19.808 ຄົນ ແລະ ຜູ້ບາດເຈັບ ຫລື ສູນເສຍອະໄວຍະວະອີກ 45.156 ຄົນ.
ອ້າງອີງ:
‘กัมพูชา’ กู้ระเบิดสหรัฐฯ หนักกว่า 900 กก. จากก้นแม่น้ำใกล้พระราชวัง
