ນະຄອນຫລວງວຽງຈັນແນະນໍາໃຫ້ຫົວໜ່ວຍຈຸນລະວິສາຫະກິດ ແລະ ວິສາຫະກິດຂະໜາດນ້ອຍ-ກາງເຂົ້າລະບົບອາກອນມູນຄ່າເພີ່ມ

ສ່ວຍສາອາກອນ ປະຈຳນະຄອນຫລວງວຽງຈັນ ຈັດກອງປະຊຸມເຜີຍແຜ່ແນະນໍາກ່ຽວກັບ ການຫັນຫົວໜ່ວຍຈຸນລະວິສາຫະກິດ, ວິສາຫະກິດຂະໜາດນ້ອຍ-ກາງເຂົ້າລະບົບອາກອນມູນຄ່າເພີ່ມ (ອມພ) ໃຫ້ບັນດາຫົວໜ່ວຍທຸລະກິດຈໍານວນ 90 ຫົວໜ່ວຍຢູ່ເມືອງສີໂຄດຕະບອງ, ເມືອງນາຊາຍທອງ, ເມືອງສັງທອງ ນະຄອນຫຼວງວຽງຈັນ ໃນວັນທີ 4 ພຶດສະພາ ຜ່ານມາ ໂດຍການເປັນປະທານຂອງ ທ່ານ ຄໍາພັນ ພັນທຸລັກ ຫົວໜ້າສ່ວຍສາອາກອນ ປະຈຳນະຄອນຫລວງວຽງຈັນ, ມີຫົວໜ້າ-ຮອງຫົວໜ້າສ່ວຍສາອາກອນປະຈໍາເມືອງ, ຫົວໜ້າ-ຮອງຫົວໜ້າຂະແໜງຂອງສ່ວຍສາອາກອນປະຈໍານະຄອນຫລວງວຽງຈັນ ແລະ ຕາງໜ້າບັນດາຫົວໜ່ວຍທຸລະກິດ ເຂົ້າຮ່ວມ.

ໃນກອງປະຊຸມ ໄດ້ນຳສະເໜີ-ເຜີຍແຜ່ກ່ຽວກັບວຽກງານຂະຫຍາຍຖານອາກອນມູນເພີ່ມ ທີ່ຕິດພັນກັບກົດໝາຍສະບັບເລກທີ 01/ສພຊ, ລົງວັນທີ 07 ສິງຫາ 2021; ການສະເໜີການຂຶ້ນທະບຽນ, ການອະນຸຍາດ ພິມໃບເກັບເງິນຜ່ານເຄື່ອງບັນທຶກການຂາຍສິນຄ້າ ແລະ ການບໍລິການ ແລະ ໂປແກຣມອື່ນໆ; ສະເໜີ ມາດຖານ, ເງື່ອນໄຂຂອງຜູ້ຢູ່ໃນລະບົບອາກອນມູນຄ່າເພີ່ມ, ແນະນໍາກ່ຽວກັບຄວາມໝາຍຄວາມສໍາຄັນຂອງວຽກງານການແຈ້ງ-ມອບອາກອນມູນຄ່າເພີ່ມ, ແນະນໍາວິທີ-ລະບຽບການໃບແຈ້ງມອບພັນທະ ໂດຍເຫັນໄດ້ຄວາມສະດວກສະບາຍໃນການແຈ້ງມອບ ແລະ ຊ່ອງທາງຕ່າງໆ ລວມທັງມາດຕະການຕໍ່ຜູ້ລະເມີດລະບຽບບການແຈ້ງ-ມອບ ແລະ ແນະນໍາດ້ານວິຊາການກ່ຽວກັບ ການຈັດຕັ້ງປະຕິບັດວຽກງາານອາກອນມູນຄ່າເພີ່ມ.

ໂອກາດນີ້, ທ່ານ ຄຳພັນ ພັນທຸລັກ ກໍໄດ້ມີຄໍາເຫັນຕໍ່ການຈັດຕັ້ງປະຕິບັດວຽກງານສ່ວຍສາອາກອນຢູ່ 3 ເມືອງດັ່ງກ່າວ ເຊິ່ງບັນດາໜ້າວຽກຈຸດສຸມແມ່ນມີຄວາມຄືບໜ້າຫລາຍດ້ານ ສະແດງອອກໃຫ້ເຫັນທາງດ້ານຫົວໜ່ວຍທຸລະກິດໃນເມືອງ ເຂົ້າໃນລະບົບອາກອນມູນຄ່າເພີ່ມ ແມ່ນເພີ່ມຂຶ້ນຫລາຍຈາກເມື່ອກ່ອນ. ພ້ອມນັ້ນ, ທ່ານຍັງໄດ້ເນັ້ນໃຫ້ສືບຕໍ່ຊຸກຍູ້, ແນະນໍາໃຫ້ຫົວໜ່ວຍທຸລະກິດມີຄວາມເຂົ້າໃຈໃນການເຂົ້າລະບົບ ອມພ, ຊຸກຍູ້ຫັນຫົວໜ່ວຍທຸລະກິດທີ່ມີລາຍຮັບເກີນ 400 ລ້ານໃຫ້ເຂົ້າລະບົບໃຫ້ສໍາເລັດ ແລະ ທັງແນະນໍາໃຫ້ຮູ້ເຖິງຄວາມຈໍາເປັນທີ່ຕ້ອງໄດ້ເຂົ້າລະບົບອາກອນມູນຄ່າເພີ່ມ ຕື່ມອີກ.