WHO ເຜີຍ “ຄອງໂກ” ຢືນຢັນ ພົບຜູ້ຕິດເຊື້ອ “ອີໂບລາ” ຄົນໃໝ່
ອົງການອະນາໄມໂລກເຜີຍ ໄດ້ຮັບລາຍງານຈາກກະຊວງສາທາລະນະສຸກຄອງໂກ ຢືນຢັນພົບຜູ້ຕິດເຊື້ອໄວຣັສອີໂບລາຄົນໃໝ່ເປັນຄົນທີ 3 ຫລັງປະກາດການແພ່ລະບາດຂອງພະຍາດອີໂບລາຄັ້ງທີ 14 ໃນປະເທດ.
ວັນທີ 6 ພຶດສະພາ 2022, ອົງການອະນາໄມໂລກ (WHO) ລາຍງານວ່າ: ສາທາລະນະລັດ ປະຊາທິປະໄຕ ຄອງໂກ ຫລື ດີອາຣຄອງໂກ (DRC) ຢືນຢັນການກວດພົບຜູ້ຕິດເຊື້ອໄວຣັສອີໂບລາຄົນໃໝ່ໃນພາກຕາເວັນຕົກສຽງເໜືອປະເທດ ເຮັດໃຫ້ຈຳນວນຄົນເຈັບຢືນຢັນຜົນລວມມີທັງໝົດ 3 ຄົນ ນັບແຕ່ຄອງໂກປະກາດການລະບາດຂອງພະຍາດອີໂບລາ ຄັ້ງທີ 14 ໃນທ້າຍເດືອນເມສາຜ່ານມາ.
ສຳນັກງານຂອງ WHO ປະຈຳພາກພື້ນອາຟຣິກາລະບຸວ່າ: ກະຊວງສາທາລະນະສຸກຄອງໂກຢືນຢັນການກວດພົບຜູ້ຕິດເຊື້ອໄວຣັສອີໂບລາຄົນທີ 3 ໃນເມືອງມະບັນດາກາ ເມື່ອວັນທີ 4 ພຶດສະພາ ເຊິ່ງເປັນຜູ້ຊາຍອາຍຸ 48 ປີ ທີ່ມີປະຫວັດສ່ຽງສູງຈາກການໃກ້ຊິດກັບຜູ້ຕິດເຊື້ອຄົນທຳອິດ ໂດຍປັດຈຸບັນມີການລະບຸຕົວຜູ້ມີປະຫວັດສຳຜັດໃກ້ຊິດຜູ້ຕິດເຊື້ອ 444 ຄົນແລ້ວ.
ທັງນີ້, ຄອງໂກປະກາດການລະບາດຂອງພະຍາດອີໂບລາ ຄັ້ງທີ 14 ເມື່ອວັນທີ 23 ເມສາ ຫລັງຢືນຢັນການກວດພົບຜູ້ຕິດເຊື້ອຄົນທຳອິດໃນເມືອງມະບັນດາກາຂອງແຂວງອິເຄວເຄີ ທາງຕາເວັນຕົກສຽງເໜືອ ໂດຍຜູ້ຕິດເຊື້ອຢືນຢັນຜົນສອງຄົນທຳອິດເປັນພີ່ນ້ອງກັນ ແລະ ເສຍຊີວິດຫລັງສະແດງອາການ.
WHO ລະບຸວ່າ: ຄອງໂກກຳລັງປະສົບການລະບາດຂອງອີໂບລາ ຄັ້ງທີ 14 ນັບແຕ່ປີ 1976. ຂະນະທີ່ການລະບາດໃນປັດຈຸບັນຖືເປັນຄັ້ງທີ 6 ຖ້ານັບສະເພາະນັບແຕ່ປີ 2008 ເຊິ່ງເປັນປີທີ່ເກີດການລະບາດຂອງອີໂບລາຫລາຍທີ່ສຸດໃນປະຫວັດສາດຂອງຄອງໂກ, ສ່ວນການລະບາດຫລາຍຄັ້ງກ່ອນໜ້າໃນແຂວງອິເຄວເຕີຄືໃນປີ 2020 ແລະ 2018 ເຊິ່ງມີຜູ້ຕິດເຊື້ອ 130 ຄົນ ແລະ 54 ຄົນ ຕາມລຳດັບ.
ສຳນັກຂ່າວຊິນຮົວລາຍງານວ່າ: ກ່ອນໜ້ານີ້, ຄອງໂກໄດ້ປະກາດຈຸດສິ້ນສຸດການລະບາດຂອງອີໂບລາ ຄັ້ງທີ 13 ເຊິ່ງມີຜູ້ຕິດເຊື້ອຢືນຢັນຜົນ 8 ຄົນ, ຜູ້ເຂົ້າຂ່າຍຕິດເຊື້ອ 3 ຄົນ ແລະ ຜູ້ເສຍຊີວິດ 6 ຄົນ ໃນແຂວງນອດ ກີວູ ທາງຕາເວັນອອກສຽງເໜືອຂອງປະເທດ ໃນເດືອນທັນວາ 2021.
ອ້າງອີງ:
https://www.xinhuathai.com/inter/280953_20220505
